Lukasi 24:3-19

³Wenjile mgati mchilaga hawauwene lukuli lwa Mkulu Yesu.

⁴Wang'hali wabubuwale na mbuli ayo, bahala wanhu weli wavalile nguwo nzelu chweya! Wema behi na howali.

⁵Wadala wazangudumba ng'hatu na wenamiza hanyi. Ila wala wanhu wawalonjela, “Lekachoni mwangumpala nayali mkomu kuli wanhu wabagame?

⁶Yesu haduhu hano, nakazilipuka. Mkumbuchile vyonayakulonjeleni loyali kula Galilaya,

⁷‘Mwana wa Munhu kolavigwa kulimhoko ga wanhu wehile, hewo womgaza na kumuwamba mumsalaba, ila zuwa lya kadatu kozilipuka.’ ”

⁸Baho wala wadala wakumbuchila mbuli ila yoyawalonjele.

⁹Lowahiluche kulawa kuchilaga, wawalonjela mbuli yila wala walanguswa kumi na yumwe na wanhu weng'ha.

¹⁰Walonjile mbuli azo kwa watumigwa wali, Maliya Madelena na Yohana na Maliya mayake Yakubu na wadala wanji wawele hamwe kuli chilaga.

¹¹Watumigwe na wona mbuli azo kota hazitanganiche, nahawakundile.

¹²Ila Petili kalawa hala na kubilima mbaka kuli chilaga. Loyafichile, kenamiza na kusunjilila mgati, baho kayona ila sanda. Kahiluka kaye aku yabubuwale kwa gala galawile.

¹³Kuli zuwa lilila, wanhu weli walwele walanguswa wa Yesu wali woluta kuli chijiji chilinguchemigwa Emau, utali wa chilomita kumi na imwe kulawa Yelusalemu.

¹⁴Wazangulonga mbuli zila za vinhu vyeng'ha lozilawile.

¹⁵Lowaliwolonga na kiuza, heye Yesu nakalawila, kaza kilongoza na hewo.

¹⁶Wazakumona na meho ila hawali womzela kota ndo Yesu.

¹⁷Yesu nakawauza, “Mbuli zachi zino zomlonga kuno mjenda?” Wema tulu, wakwisuche kumeho kuno wesinzile.

¹⁸Yumwe yalinguchemigwa Kiliopasi, nakamlonjela, “Hegwe kwa mjenzi hano Yelusalemu, hugazelele galawile ako mazuwa gano?”

¹⁹Yesu nakawauza, “Mbuli zachi?” Na hewo nawamwidichila, “Mbuli zimlawile Yesu wa Nasaleti, heye nayali mloli wa Nguluwi, yadahile kulangusa mbuli zeng'ha hali Nguluwi na hali wanhu weng'ha.