San Lucas 24:3-19

³Lëë me kwsëëb leñ paa, per kondy me xcuerp Jesús.

⁴Por ngo, tir ptsyeb me, nandy me pe kwxaak me, tsiñee kolpsye lëë me kon nii lëë chop mguiy so lo me nonsyke ladx xpibëly nakw xaa.

⁵Lo xtseeb ko lëë me pkiits kë lyu, per lëë chop xaa go chëb lo me: —¿Penak nii sëëd kyub to tu meñ nii mbañ lady meñ kuty?

⁶Kindy meñ nii xyub to nu, lëë me pañ. Kol ksaladzy nii kwnee me lo do worñee bii no me Galilea.

⁷Kwnee me nii no nii kyab me ña meñ ngoptol, ni lëë meñ jkëë me lo crusy, per tse nii loxo tson kpidz lëë me kpañ.

⁸Tsigo lëë kwnaa go psaladzy xtiits Jesús,

⁹aan tsi lëë me bikche chu paa, lëë me kukso cuento lo ksa tsiiptub apostle ni lo meñ nii nak ksa Jesús.

¹⁰Lëë María Magdalena, ni Xwan, ni Mariy xñaa Jacob, ni stubla kwnaa kunitiits lo apostle.

¹¹Per kwxaak apostle nii chak wety me aan bnilasty xaa xtiits me.

¹²Per lëënlëdy lëë Pedre kwey chu paa, aan tsiñee lëë xaa buy leñ paa, xaktyee ladx nii pchal Jesús kon xaa. Loxsye ngo lëë xaa sey chu yu aan psee xaa kon xaa kchë nii kok.

¹³Misme gak tse go lëë chop xpëëdscuel Jesús no nëz si Emaús. Tsiiptub mily metre nak nëz tsiñee xchoo meñ Jerusalén.

¹⁴Chutiits xaa kchë nii kok Jerusalén.

¹⁵Lëë xaa pkaa lo Jesús aan lëë xaa si ksa xaa.

¹⁶Per nikxe kon xaa Jesús, pchilody nyeñ xaa nii Jesúso.

¹⁷Lëë Jesús chëb lo xaa: —¿Pe cos chutiits to dyon na nii sëëd to nëz? ¿Penak nii mban chak to?

¹⁸Tsigo lëë tu xaa nii lë Cleofas chëb: —¿Nandyoo nawen pe cos kok Jerusalén leñ tse re, aan kwlësoo Jerusalén?

¹⁹Lëë Jesús chëb: —¿Pe cos kok? Aan lëë xaa chëb: —Nii ptsyool Jesús Nazaret wo. Tu profet nii kwnee xtiits Dios kok xaa ni kon gaa meñ nii nakni Dios xaa, por kchë nii beeñtsyey xaa.