Luka 24:3-19

³Isi se lulau, Guiau Iesu sinarena wa nige se lobai.

⁴Isi nuadi se ponopono ariri, na tatao labui gegesidi eai se totoro adi lulu se namanamari:

⁵isi ma matausidi, to matadi se durudurudobi tano eai, se ribalau aridi eai, si ene, “Aue saha maumaurina au eooi matematedi boeadi eai?

⁶Ia inai nige’e, na i toroo: omi Galilaia sora nige au laugabaei ena riba i ribalaowa arimiu eai au nuatui wa,

⁷i ene, Tau Natuna abo se moselaei tatao baaea nimadi eai, abo se hesatauro, eo asubena hehaionana eai abo i torouio.”

⁸Ena riba wa abo se henuaisinidi.

⁹Bousa eai se uio, teina ginauri gamagaridi saudoudoi‐esega se heribadi, eo tatao headiyao hinage.

¹⁰Ia ede Maria Magadala, eo Ioane, eo Maria, Iamesi sinana, eo sisine headi maediyao, isi teina ginauri gamagaridi aposotolo tauheribadi ede.

¹¹Edi riba si ene doha piripiridai mo, isi nige se nuatuwataidi.

¹²Petero abo i toro, i aitautau ie lau bousa eai; ie durudobi nige ginauri esau i ita, lulu linen wa isibom se torehesuaradi i itadi, abo ie uio, ginauri wa se tubu wa i noonooedi.

¹³Na, nei asubenana ne adi sasaguyao labui se lau eanua esau esana Emausa, Ierusalema i laoma eanua wa edana lohana maila haligigi‐esega.

¹⁴Taudi labui edi ribariba paana ede teina ginauri gamagaridi se tubu wa.

¹⁵Na, isi ma ribaribadi eo ma nuanuatuidi, Iesu iabom i laoma maedi se laulau esega.

¹⁶Isi matadi nige se lala arinai ia nige se ita lobai.

¹⁷Ia i ribalau aridi eai, i ene, “Emi ribariba saha ina omi au ribariba ma laulaumiu, eo ma nuadubumiu hinage?”

¹⁸Esau, esana Kaleopa, ia arinana i heuio, i ene, “Oa laolaoma tauna mo Ierusalema eai, ginauri wa nei eai se tubu teina asubenadi eai nige u nuatuidi?”

¹⁹Ia ie ribalau aridi eai, i ene, “Ginauridi saha?” Isi se heriba si ene, “Iesu, Nasareta tauna, ribana, ia ede peroveta tauna Eaubada matana eai, eo tatao gamagaridi matadi eai, ena laulau eo ena riba se gigibori ariri.