Luk 24:3-19

³Sen bia dal ga laka dal pa ga nes no palatamai Jisas.

⁴Ma ing bia dal ga lilik uta iakan ra linge, kaik at mon airuo tunaan dir ga tur huat taar ta dal. Ma ira kiniasi dir ga laklakituan hoira hile.

⁵Ira hahin dal ga manga burut kaik dal gaam tutudung ma ira matmataan ta dal uras napu tano pise. Iesen ira iruo tunaan dir ga tange ta dal, “Wara bih mutal silsilihe no lilona nalamin ta ira minaat?

⁶Ie panim kai. I te tut hut sukun ra minaat! Na tahut bia mutal na lik leh ira uno nianga ing ga kis tika ma mutal aras Galili. Ga tange hoken:

⁷‘Da tar se Nong a Tunotunoi ta ira lima diet ira ut na sakena. Da tut ie tano ula kabai ma tano aitul a bung na tut hut baling.’”

⁸Io, ing dal ga hadade dal ga lik leh ira uno nianga.

⁹Ma bia dal ga tapukus balin mekaia ra midi dal ga hinawase ira sangahul ma tikai na bulu na harausur ma ira mes ta kaiken ra linge bakut.

¹⁰Dal Maria me Magadalen, Ioana, Maria no pawasi Jemes ma ari mah dal ing dal ga hinawase ira apostolo.

¹¹Iesen diet pa ga nurnur ta ira hahin kanong diet ga lik bia a linge bia kaike ra udal nianga.

¹²Ma Pita balik ga taman tut ma ga hilau ukaia hono midi. Ga tudu suur ga nes leh ira katona maal sen kaia napu. Io, ga haan sukun iakano katon gaam manga lilik uta iakan ra linge.

¹³Ma ta iakano bung airuo ta diet ga hanahaan uras tiga taman di kilam ie bia Emaus, haruat ma ra sangahul ma tikai na kilomita meram Ierusalem.

¹⁴Ma dir ga wawor tika haan uta ira linge bakut ing ga hanuat.

¹⁵Bia dir ga harianga haan ta dir, Jisas at ga hanuat tupas dir ma ga tiktika haan ma dir.

¹⁶Iesen dir pa ga petlaar wara nesnes kilam ie.

¹⁷Io, ga tiri dir, “Mur waworana sa ing mur tiktika haan?” Io, dir ga tur matien, ma ira iruo matmataan ta dir ga nanaas marmaris.

¹⁸Ma tikai ta dir, a hinsana Kiliopas ga tirii, “Augu sen mon ta ira wasire aram Ierusalem pau nunure ira linge ing i hanuat kaiken ra bar bung?”

¹⁹Io, ga tirii, “A linge sa?” Dir ga babalu bia, “Ira linge uta Jisas meras Nasaret. Iakan ra tunotuno a tangesot ie. Ira uno nianga ma ira uno pinapalim ga dadas ra matmataan ta God ma ira matanaiabar mah.