Luk 24:3-19

³Mi eka köt köteŋ uruŋe öŋgögetmö, Kembu Jisösgö qamötŋi qahö miwikŋaiget.

⁴Miaŋgöra mötkurumkurum möta kingetka azi yahöt malukuŋiri tuatŋi kölköl-bilikbilikŋambuk yetkön wösöŋine kinohotka etkeket.

⁵Mi etkeka awöwöliba gölmenöŋ geba dapkögetka kewö jiyohot mötket, “Jebuk mal köhöizawi, i mönö denöwögöra kömukömuŋi yeŋgö sutŋine jaruze?

⁶Yaŋön ki qahö ahözapmö, mönö guliba wahötza. Galili prowinsnöŋ mala keu jii mötkeri, mi mönö mötmörime:

⁷Yaŋön kewö jiyök, ‘Kunöŋ Suep gölmegö azi ölŋi mamalolo mem waŋgiiga bölöŋi meme yeŋgö böröŋine geiga maripomnöŋ qeget kömumba wehön karöbut aiga guliba wahötma.’”

⁸Mewö jiyohotka keuŋi mi mötmötŋine aŋgoriga mötmöriget.

⁹Mewö mötmöriba qaksirinöhök liliŋgöba kaba yuai pakpak asuhuyöhi, miaŋgö buzup keuŋi mi gwarek 11 aka tosatŋi pakpak yeŋgöra jiget mötket.

¹⁰Keu mi jigeri, mi Magdalagöra Maria, Joana aka Maria Jeimsgö namŋi aka ambi tosatŋi yembuk malgeri, yeŋön mi kaba aposol yeŋgöra jiget mötket.

¹¹Buzup keu mi jiget mötketmö, keu jigeri, mi keu omaŋi tandök ahöhi, mewö mötmöriba mi qahö möt nariget.

¹²Qahö möt narigetmö, Pitönöŋ wahöta ösumŋan qaksirinöŋ anda köt köteŋ uruŋe ui aniga opo esu miyök miaŋgöreŋ tari ehök. Mi eka yuai asuhuyöhi, mi nanŋök mötmöriba welipköba mire liliŋgöyök. Mewö.

¹³Wehön miaŋgöreŋök Jisösgö gwarekurupŋi yeŋgöreŋök yahötŋan Jerusalem siti mosöta miri qetŋi Emeus sewen mail miaŋgöreŋ anbitkö anohot.

¹⁴Könanöŋ anda yuai asuhuyöhi, mi pakpak nanŋirök eraum mörohot.

¹⁵Mi eraum möta könaŋi jim lömböriba anohotka Jisösnöŋ nanŋak kösutŋire aŋgota mohotŋe anget.

¹⁶Angetmö, jeŋiri közamböri i qahö ek kutuyohot.

¹⁷Qahö ek kutuyohotka kewö jiyök, “Iŋiri nanŋirök wani keuya könanöŋ eraum möta kazahot?” Mewö jiiga dörök mitiba wösöbirik jeje uba eka kinohot.

¹⁸Eka kinda yetköreŋök kun qetŋi Kliopas yaŋön kewö qesim waŋgiyök, “Pasowa kendonöŋ yuai asuhuyöhi, mi Jerusalem ambazip körekŋan mötze. Gi mohotŋan kiana aka mi qahö mötzan me?”

¹⁹Qesim waŋgiiga “Mi wania?” jiiga möta kewö jiyohot mörök, “Nazaret azi Jisösgöra yuai asuhuyök mi. Yaŋön kezapqetok azia mala Anutu aka ambazip pakpak yeŋgö jeŋine ahakmeme kukösumŋambuk aka keu köhöikŋi jiba malök.