Luka 24:3-19

³Motong la di garup tina ngan tidewe a tilo pang agoro tani in lono, ngan tikamata Tool Mai Yesu bobono tani in iken tiap.

⁴Le nga lodi kaua urata ye go, inbe pattu leu be tikamata di tooltool ru yo sousoungu kidi ikoko le pilik pilikbe nga, ngan yaru pombe le tikodo potai ye di.

⁵Ngan di garup tina ngan tikamata di, le nga titattadai le titur so pang tana. Motong la di tooltool ru tina ngan tiwete pang di nen, “Ai, nga yelei a kaman be man kasere tool maurene yo si iyepe kataunu ye di tooltool matedi in nga?

⁶Ya in iyepe ni tiap. Ya in imadit mulu ye ni ke matenge oo. Ngan lomim tut ye betanga yo muku ngan kaye kayepe Galili inbe iwete pang nga.

⁷Ngan ya in iwete nen, ‘Ole tikaua Tool Moolmool ke Maro a titaru la di tooltool dook tiap ke noonoo baedi, a nen ngan tipatota lo kai palasingi kaini a imata. Ngan ole iken ye ke ru, bong ye ke tol ki nga, ngan ole amadit mulu.’ ”

⁸Motong la di garup tina ngan lodi tut ye betanga tina ke Yesu nga.

⁹Motong la tiyege agoro ke matenge tani, inbe timulu a tilo lo tiwete pang di aposol ke Yesu yo sangaul be atu nga, ngan tipa ye di galiunu kapala.

¹⁰Ngan di garup tina yo tilo tikaua bingi pang di aposol ke Yesu ye so yo pombe nga, ngan atu in ene la Madia ke malala mai Makdala i, inbe Yoana iye Madia san yo Yemis tinana i, inbe di garup kapala lapau.

¹¹Bong ngan di aposol ke Yesu tina ngan titara lodi medana ye betanga kidi tiap, yesoo betanga kidi tina yo tiwete, ngan tilongo ngan ben kidi tooltool kapakapa nga.

¹²Bong ngan Pita imadit tina le idada a idu pang ye agoro ke matenge tani yo titara Yesu bobono ye i. Idu, motong la itur a ipakele lo pang agoro lono, ngan ikamata wam tina yo tiduku Yesu ye nga, ngan leu ikenen. Motong la imulu tak a ilo pang malala, inbe ya taunu lon kaua urata ye so yo pombe in nga.

¹³Ye kene tani in Yesu di galiunu ru tipa a be tidu pang ye malala atu yo ene Emeus i. Ngan manga yo iken kataunu ye Yerusalem inbe Emeus nga, ngan mooloo kasin. 

¹⁴Le nga Yesu di galiunu ru tina ngan tipa, inbe tiwetewete ye so tina le imot yo pompombe Yerusalem nga.

¹⁵Ye kene yo yaru tipa be tiwetewete a di tapdi tipartortor ye in nga, ngan Yesu ya taunu pombe pang ye di le lo iye di tipa gaongo.

¹⁶Bong ngan Maro iwonokala matadi, le ke be yaru tikilala Yesu tiap.

¹⁷Motong la Yesu itor di yaru nen, “Ai, soo so angru kapa a kasi ngan kaweteweta i?” Yesu itor di nen, le tina betanga imot ye di yaru, inbe matadi mallikanga a sila tikodo so.

¹⁸Motong la di galiunu ru tina ngan atu yo ene Kiliopas i, in iman tina le itoro Yesu nen, “So yo amwetewete ye i, in di tooltool ke Yerusalem nga, ngan di le imot lodi galanga ye. Ngan ong i lowo atu ke malala mai Yerusalem lapau, e yelei be lom galanga ye so yo airi ngan pombe i, in tiap nga?”

¹⁹Motong la Yesu iyei ne, “Soo so pombe i?” Motong la di galiunu tina ngan tiyei ne, “Amru nga amwetewete ye Yesu yo ke Nasaret i. Ya in Maro koonoo atu, le urata ki yo iyei inbe betanga ki yo iwete la di tooltool matadi nga, ngan ipa ye gurana ke Maro lapau.