1Nambame pii lelyo datupa namba Kataisanya akali dokome kiningi lelyo. Sambo laa naelyo. Oli Sipitisa dokome nambanya masingi doko isipumopa masingi dokome kiningi leenona lao namba langilyamoaka.
2Namba tata mendai nambanya kaiminingi Juta dupa lao masetala etete mona kenda kayao koteaka lao mona tanda kaelyo. Kaitini dakenya-kaita dupa nisepenge jipyali kandao doko, Goteme namba Kataisa-pipa saa lasetala watao yuu koo dokonya pyasina lapuli.
4Dupa Isataele. Goteme dupa baanya wane jina lao yapao nyia-pyaa. Gote dupa-pipa awapa kateamopa dupame baanya tii pipae doko kandeami-pyaa. Goteme dopa pito lao pii dupa lanya setea-pyaa. Dee baame baanya mana setapae dupapi, baa tama pyoo kundi maipenge mana dupapi, epe maitona leamo pii dupapi dupa maiyaka-pyaa.
5Dupa yumbange toto Apotakamepi, Aisakepi, Jekopepi akali dutupanya yumbange. Dee dupanya tata dokonya Kataisa baa endakali jia. Baame yuupi kaitipi dupa pitaka isoo kalyamo. Tanga tangapi lalyepenge Gote doko baaka lamo! Kiniaka.
6Goteme pitona leamo doko mee jiana lao nambame laa naelyo. Isataelenya mandipaenya mandipae paliuu patamo dupa pitaka Gotenya endakali angi daa.
7Dee Apotakamenya mandipae paliuu patamo dupa pitaka baanya wane angi daaka. Dokonya Goteme Apotakame lamaiyoo, “Aisakaenya mandipaenya mandipae paliuu patamo dupa iki emba tata lao palitamina,” lea-pyaa.
8Dopana, endakalimi mandengeli pyoo mandipae wane dupa Gotenya wane daa. Goteme epe maitona leamoli pyoo mandipae wane dupa iki baame Apotakamenya wanena lao masingi.
9Doko Goteme dapa pitona lea-pyaa: “Pipenge gii doko ipatamopa namba dee pilyoo ipato. Dopa pitopa Setame wane ane mende manditana,” lea-pyaa.
10Goteme pii dopale dupa enda Seta iki lamaiya naya-pyaa. Dee maitakao enda Lepekame naimanya yumbange Aisakepa tole pyatala wane ane lapoma pakao tongota peteamo doko apata Goteme pii dopale dupa lamaiyaka-pyaa.
11Dopaka doko, mandipala nayamopa wane dolapome mana koo epepi mende minatala nayambinopaka Goteme enda doko lamaiyoo, “Wane wambao manditino dokome maitakao manditino dokonya kendemane pyakamaitana,” lea-pyaa. Dopana, Gote tangeme pitoo lao masilyali pyoo endakali dupa yapao nyingi. Yapao nyilyamo endakali dupame kalai mende pilyaminosa daa. Ipupa lelyamo akali dokonya kalai pyoo iki dopa pingi.
13Dokonya dapa lao pepa pyapae silyamo: “Nambame akali Jekope auu kayo. Dopaka doko, akali Iso maka kayona,” lapae silyamo.
14Dopana, dokonya naimame aipa latamape? Goteme kopeta pingina latamape? Daa, dopa etete nalapenge!
15Doko baame Mosese lamaiyoo, “Nambame endakali mende kondo kayatoo lao masilyo doko, kondo kaenge. Nisotoo lao masilyo doko, nisingina,” lea-pyaa.
16Dopana, kalai doko endakali mendenya pipuli lao masingipi kalai pingipi dolaponya kalai mende daa. Doko kondo kaenge Gote dokonya kalai.
17Dee Goteme akali Peto kandao, “Nambame emba sakatasio doko, emba-kisa nambame nambanya pupu lapae doko laitaka pitoo lao, dee yuu dupa pitakanya endakali dupame namba masinaka lao sakatasiona,” leana lapae Gotenya pii pepa pyapae dokonya silyamo.
18Dopana, baame endakali mende kondo kayatoo lao masilyamo doko, kondo kaenge. Dee baame endakali mendenya ingi monapi kana injisotoo lao masilyamo doko, kana injisingi.
19Dokonya nyakamanya mendeme namba pisoo, “Dopa tamo kandao doko, aipa petala Goteme endakali mende-kisa pii setatape? Baame pitona lao masingi doko apimi kaita lyokapengepe?” latami.
20Dopaka doko, kaimia, emba akali apimi Gotenya pii tanga latepe? Titopene penge yuumi wasepae mendeme wasingi akali doko kandao, “Aipuma embame dapa pyoo namba wasiipi?” lao pisingipi?
21Titopene penge yuumi wasingi akali dokome yuu mendatupa nyepala baa tangenya kalai pyoo wasingi daape! Baame yuu momanga pipae mendaimi penge tata lapoma wasotoo lao masilyamo kandao doko, kapa pao penge etete epe mende wasepa dee mee koo mende wasepa pingi daape!
22Goteme mana mendai dopaleaka minao baame baanya imbutongo mandenge dokopa pupu lapae dokopa dolapo endakali dupa laitaka pitona lao masoo katea-pyaa. Dopaka doko, baame imbu kayao pyapenge endakali dupa pyao koyasepenge jetae kateaminopa baame dupa yapa maka nakaenya malisoo mee katea-pyaa.
23Baame kondo kayapala tii pyoo katasetona lao wamba depa leamo endakali dupa kandao mana epe etete longo miningi dupa laitaka pyaanya dopa pia-pyaa.
24Nambame Juta tata dokonyapi tata waka dupanyapi apata naima ipupa latae endakali dupa kandao lelyo.
25Dopaka pyoo potopesa Osiame pepa piamo dokonya Goteme dapa lea doko lapae silyamo: “Nambame nambanya joo nakateami endakali dupa nambanyana lato. Nambame auu nakayo dupa nambanya auu kayapaena lato.
26Dee nambame dupa kandao, ‘Nyakama nambanya endakali daana,’ leo panda dosaka nyakama ‘Gote lete katenge dokonya wanena’ latamina,” lea-pyaa.
27Dee Aisayame Isataele endakali dupa kandao kyoto joo dapa lea-pyaa: “Isataele endakali dupa aipi pete andakenya kee silyamoli pyoo palitamino kandawapi, kuki malatamo dupa iki pyoo nyepae katatami.
28Doko, Kamongome malisoo katenge gii dupa kaketatala pupae lao yuu dakenya tange endakali dupa-kisa yanu nyalakao nyetana,” lea-pyaa.
29Dokonya wamba baame dapa leaka-pyaa: “Ketae kaitinya amii dupanya Kamongo dokome naimanya mendatupa malala nayali kandao doko, naima Sotoma tange dupa piaminoli petala Gomota tange dupa wangi teamalina,” lea-pyaa.
30Dopana, naimame aipa latamape? Dapa lapenge: endakali tata waka dupame Gotenya enomba dokonya tolatae joo katamana lao mende pyaanya napiamino dupa tolatae jiami. Kini, masoo miningi dokonya-kaita tolatae jiami.
31Dopaka doko, Isataele endakali dupame Gotenya enomba dokonya tolatae joo katasina lao mana mende watao minalanya piaminoaka doko, angi doko kandao nanyiami.
32Doko aipuma? Dupame masoo miningi dokonya-kaita kayapala mana setapaeme lelyamoli pyoo petala nyamana lao masiaminosa nanyiami. Lombasingi kana dokome dupa lombasia.
33Dokonya dapa lao pii pepa pyapae silyamo: “Kandeleno! Endakali dupa pyalya minatala lombapae sina lao nambame kana mende yuu taono Sayone dokonya pisetelyo. Dopaka doko, baa lao masoo minatamo endakali doko elya kayala nayatana,” Goteme lea-pyaana lapae silyamo.
