Romanos 9

1

2

3

4

5

6

7

8

9

10

11

12

13

14

15

16

¹Imi an Cristobal-naidbal an chunchunnad pemalga chogdo: an kwen kakanzhejul. Imi Pab Purpa Nued an-ulubgin-maidbal an itomodo, an chunchunnad chunma.

²Imi Israel-tulemal-pel-kwapa Jesucristo-abingejulmal-choggu, al an naga ulubgin pukib-itogedbal an nunma-ito. Tenal an pukib-itoged keg-pel-chulgubal.

³Tenal an naga itodo, an Pabzhe pul ukapchalegelen, pul nabirin, tegin an Cristo-maidzhe melle pal omogelen, pul nabirbalin, an-kwenamalad-sanaled-Israel-tulemal an-anal Cristoje abonolenonimalgal.

⁴Imi Israel-tulemal igal-nikamal Pab-nuskanga kunonigal, tegin Pab-yer-takleged ampa Israel-tulemalgadmo. Tegin Pab Tummad Israel-tulemalbak aga kaka-ukchamal. Tegin Pab Tummad Moisésbal Israel-tulemalga igal-mezhisbal. Tegin Israel-tulemal igal-nikabal Pabzhe-koled-neggin Pab-otummomalgal. Tegin Pab Tummad Israel-tulemalga kaka-ukchabal immal imagal.

⁵Tegin tadgan-Pab-Tummad-tar-chusmalad ampa Israel-tulemalmo. Tegin Israel-tule-e-tadgan-akar, Cristo sanal nonibal. Imi Cristo Pab-chunchunnad, tegin Cristo pel-kwapa-immalmal e-tummadga maibal. Al Cristo pane-pane ilagwen-nadgu otummoledi-kuelen, nabirin. Pitogua.

⁶Imi pemal keg chogmalal, Pab Tummad e-kaka-ukchad-pallí keg immal ima. Tenal Pab Tummad e-chogzhad-pallí pél immal imada. Imi Israel-tulemal pel-kwapa Israel-tule-chunchunnad chul, pinche wal-walgwen Israel-tule-chunchunnadmalad.

⁷Teginbal tule-Abraham-akar-tanimalad pel-kwapa Abraham-e-wagwagan-chunchunnad-chulbal, tenal tule pinche wal-walgwen Abraham-e-wagwagan-chunchunnad. Tenal Pab Tummad Abrahamga chogzhado: Isaacbal pe-wagwagan-chunchunnadga kunoniko.

⁸Imi wedin choglejundo, tule-Abrahambal-sanal-mimmilenonimalad Abraham-wagwagan-chunchunnad-chul. Tenal tule-Pab-Tummad-kaka-ukchadbal-mimmilenonimaladbi Pab-nuskanga kunonimal.

⁹Imi Pab Abrahamga kaka-ukchadbal Abrahamga chogzhado: Imi an wegiidzhe kannan peje nonibalil, an taknoniko pe-ome-Sara machi-nika.

¹⁰Teginbal, Rebeca-nuskan-walbo-nikaddin pab-walkwénnagwadgad. Tenal we machimal-e-pabdin anmal-tad-Isaacgad.

¹¹Imi Isaac-machimal ampayo mimmilegeddu, tegin ampayo immal-akaloeddu o ampayo immal-nuegan imakeddu, Pab Tummad oyos ede kusgu e-itolegedbal tule-chu.

¹²Al Pab Tummad e-chogzhadbal Rebeca-machi-walgwen-chus, tenal machi-immal-nuegan-imakedbal-chul. Tenal Pab Tummad iktualeba Rebecaga chogzhado: Pe-machi-tummad e-urpa-mosga kuo.

¹³Imi Pab-kartagin ampa nermakal-maimodo: Pab Tummad chogzha: “Antin napírra Jacob-pilalgus, tenal antin istar Esaú-taknoni.”

¹⁴Imi Pab-chogzhadyob Isaac-machimalgin kus-choggu, ¿tegil anmal igi Pab Tummadgin chogmojun? ¿Tegil Pab Tummad nuekwá tulegin kwen pinzhejuldé? Chulá.

¹⁵Imi Pab Moisésga chogzhado: Imi an wilejakwa tule-takpiel, an wilejakwa tule-takodo. Tenal an wilejakwa tule-takpijulil, an wilejakwa tule-kwen-takojul. Tegin an tule-pentabiel, an tule-pentakodo. Tenal an tule-pentabijulil, an tule-kwen-pentakojul.

¹⁶Tenal Pab wilejakwa tule-takedbal yer tule-tako, tenal tule-itolegedbal chul tegin tule-e-immal-imakedbal chulbal.

¹⁷Imi Pab-kartagin nermakal maido, Pab Tummad Faraónga chogzhado: Imi antin tule-tummadga pe-odos, an-kannaleged pebal mag taklenonigal, tegin tulemal napa-naid-ugakche an-nug otummomalgal.

¹⁸Al Pab Tummad e-itolegedbal wilejakwa toa-tule-takpídin, wilejakwa tule-takodo. Tenal Pab Tummad e-itolegedbal egin-melle-ibzhegal toa-tule-imabídin, egin-ibzhejulgal tule-imabalodo.

¹⁹Al an wisdo, pemal-wal-walgwen chogdamalo: “Imi Pab egin-melle-ibzhegal tule-imakel, ¿tede ibiga Pabde ankin chognejun iskued ankin tani? Pab ankin weob choged-wilubzhulin. Imi Pab Tummad an-okannos-choggu melle egin ibzhegal, ¿tede an igi Pabga chogojun Pab-anka-imajadyob an melle nanegal? Chulá. Keg kue.”

²⁰Tenal pe Pabzhul-choggu, ¿tede pe igi Pab Tummadgin chogo: “Pedin noal immal imas?” Chulá. Keg kue. Imi Pab-kartagin chogdo: ¿Mete tule-e-chobzhadga chogo pe ebinzhe: “Ibiga pe weob an-chobzha?” Chulá. Keg kue.

²¹¿Imi tule-napchagin-arpaged igal-nikajulzhí napcha-choggwénnagwadgin e-itoleged akal-akal mete chobgal, kwéntin immal-nuedga ebugal, kwéntin immal-polega ebugal? Teobdo.

²²Imi Pab Tummad wal-walgwen-tule-opinnis e-itolegedbal tule-opelogal. Tenal Pab melu tulemal-abintadi-kus tulemalbal e-kannaleged oyogal. Tegin Pab tulemal-abintadi-kusbal sapejul-tule-oturdaked oyogalbal. Tenal Pab tule-opinnijadbal igal-nika tule-opelogal o tule-pentagal.

²³Tenal Pab Tummad untar tule-iskana-abintadi-kujadbal Pab wilejakwa-tule-takmaladga kep oyononijun, ede pela-pela kannaleged nika. Tenal Pab Tummad iktualeba kuakwa tule-wilejakwa-taklesmalad-urpis, e-neggin otummolegal.

²⁴Imi Pab anmalzhe-kochadbal ampa wilejakwa anmal-taknonimalmo. Tenal Pab Tummad anmal-Judiomalzhe-kochamaladbijul, tenal Judiojulmaladzhe-kochamalad ampamo.

²⁵Imi Pab Tummad e-kaka-palchoged-Oseasbal weob chogzhado: Imi antin, an-tulejulmaladzhe kolo, an-tulega kugal. Tegin an-istar-tule-takedzhe an kolnoniko: “An pemal-pilal.”

²⁶Tegin Oseas chogzhabaldo: Imi Pab Tummad ampa aka-we-neggin-tulemalgin chogzhado: “Pemal an-tulejulmal.” Tenal Pab Tummad ampa aka-we-neggin we tulemalgin chognonibalo: “Pemal Pab-Tummad-Tulad-e-nuskan.”

²⁷Tegin Pab-kaka-palchoged-Isaías Israel-tulemalgin chogzhamodo: Imi Israel-tulemal ichejul nika, termal-kakpal ukub-nikadyob unnijul pel epised. Tenal Israel-tulemal yabli walpókwa wis abonolenoniko.

²⁸Tenal Pab Tummad sapejul iti-napkin-tulemal-oturdanonikidgin, ilgwen tulemal-opelononiko.

²⁹Imi akpene Pab-kaka-palchoged-Isaías chogzhadyob kunonido. Tenal teun Isaías chogzhado: Imi Pab-Pela-Pela-Kannaleged-Nikaddin anmalga mimmigan-kwen-ebeszhulilen, anmal-tule-pukmalad-kwen-nikchulin, anmal Sodoma tegin Gomorra-neg-kweburganyob pelgusmogan.

³⁰Imi Israel-tulemalgin weob kus-choggu, ¿tegil anmal igi chognemojun? Nabir. Imi akpene Judiojulmalad kwen alamaszhulmal napírra nanegal. Tenal Judiojulmalad Pab-Jesúsgin-penzhulidbal tule-iskued-nikchulmaladga kunonimal.

³¹Tenal Israel-tulemal pela-pela alamasmalan igal-napírragwadgin nanegal. Tenal Israel-tulemal kwen unnijulgus tule-iskued-nikchulmaladga kunonigal.

³²¿Imi Israel-tulemal, ibiga tule-iskued-nikchulmaladga kunonijulmaldé? Imi Israel-tulemal Pab-Jesús-penzhulidbal kwen nanaszhulmaladbal tule-iskued-nikchulmaladga kunonijulmal. Tenal Israel-tulemal sanal alamajadbal tule-iskued-nikchulmaladga kubimal. Al Israel-tulemal nosmal, tule akwa-mulgin-yolejadbal agladedyob. Tenal we akwa choglege, Jesucristo.

³³Imi Pab-kartagin ampa weob nermakal maimodo: Imi Pab Tummad chogdo: “Imi pe takto, antin neg-kwebur-Sióngin akwa-mul-tummad chis. Tenal tule we akwa-mul-tummadgin yolenonimalal, agladamal. Tenal tule we akwagin pengunonijulmalal, kwen pinkeguojulmal.”