1Basef amama aeꞌ aꞌiemi endilisi, aeꞌ aman Kraisi eaꞌ ina ambaseꞌam, owaꞌ. Ambal Buꞌunai Godi nihiꞌambe nalome umafi basef mape opaf nomoni mihiꞌambe maꞌipi aꞌi basef endilisimi atom.
2Basef amama naꞌama. Opaf aeꞌanai nimanina endilisi eaꞌ okom naꞌi nataga aona laꞌelaꞌef.
3Aeꞌ okom naꞌi endilisi ma aꞌi God nofaꞌai esis alupusi esimbel aeꞌami Israel sotanimani. Iꞌi anona eaf nope, aeꞌ endaꞌ betena Kraisa aeꞌ hegigili ehoꞌofa esis sefeꞌ wambel buꞌunai heven, eaꞌ aeꞌ owaꞌ.
4Apeꞌ Israel God nandandepapa eaꞌ, nandaꞌapa mataga awasi ananipai eaꞌ naꞌi ahoꞌma mitiꞌ nafifili ananinai. Anan naꞌi basef ananimi endilisimi atom nalomapa eaꞌ naseꞌapa miꞌuli buꞌunai ananinai naloma waf endilisinai mondaꞌ lotumanai. Apeꞌ mofaꞌ basef amama God naꞌi endilisimi atomi.
5Bafapapa akupapa apeꞌimi dambami maliꞌi amama apeꞌimi atom. Eaꞌ esimbel apeꞌimi atom, Krais nataga epen, anan God nandandepana nasapaꞌana nafiꞌi, nape naliꞌma epes saloma amamaga hiami numafiam. Anan God endilisinai eaꞌ mefela agel ananinai laꞌelaꞌef. Endilisi.
6Eaꞌ basef amama God naꞌipa esis Israel naꞌi endilisimi atom ina higilalam etin, owaꞌ. Epes sataga wambota Israeli, hiesi ina Israel endilisi God nandandepas ananisi etis, owaꞌ. Esis ina sombaleꞌefana.
7Eaꞌ apeꞌ ina miꞌiam naꞌama miꞌi, “Esis sataga esimbel Abrahami esis hiesi sombaleꞌefa God sape batawisana ananisi,” owaꞌ. Enis ina sombaleꞌefa Anan, owaꞌ. Fowaꞌ gani God naꞌipana naꞌama naꞌi, “Esis esimbel Aisaki atom owagama sofaꞌ agel wambota ineꞌinai.”
8Amama naꞌama. Enis batawis Abrahami ina awasi Godi, owaꞌ. Isima sataga basef amama God naꞌi endilisimi atom naꞌipa Abrahamami, agel napomas eaꞌ bafasana Abrahami endilisi.
9Basef amama endilisimi atom maꞌi naꞌama maꞌi, “Nemaf anama andandepana eaꞌ, anona nemaf itanimai eaꞌ Sara kola awani aman.”
10Eaꞌ ina amama atom, owaꞌ. Bafapana biam Rebekai ahalomam atotona eaꞌ Aisak atona ahalomapa apeꞌinai.
11Naꞌama God okom naꞌi eaꞌ ma waf nandandepa epesi. Anan ina okom naꞌi maol epes sandaꞌanai eaꞌ nandandepas, owaꞌ. Bafasana amama biam ataꞌ mape nomona opaf akwaꞌunai God naꞌipakw naꞌi, “Naliꞌi dembinai nope owina awagufunai nagiꞌi. Sahalomana anona nemaf nondaꞌmana maol owalomana.” God naila okom ananinai atona deiꞌ naꞌipakw naꞌama. Anan ina okom naꞌi anona maol buꞌunai aonai amam anona nemaf mondaꞌanai, owaꞌ. Anan naila okom ananinai atona naꞌi basef naꞌama.
13Amama siꞌi Baibel naꞌi, “Aeꞌ okom nainaila Jekop, eaꞌ Iso andaiwaꞌmana endilisi.”
14Eaꞌ apeꞌ deiꞌ ataꞌ miꞌi main? Miꞌi, “God nandaꞌ waf aonai?” Owaꞌetin!
15Anan fowaꞌ naꞌipa Moses naꞌi, “Endilisi, anona nemaf aeꞌ iꞌi uwahipis emi egafis iꞌi uwahipisi eaꞌ igiambama emi egafis aeꞌ okom naꞌi igiambamasi.”
16Eaꞌ apeꞌ ina miꞌi ukup epesi atom maloma maol epesi atona sandaꞌ God nagiambamapa, owaꞌ. God atona nati apeꞌ uwahipipa deiꞌ okom Ananinai atona nagiambamapa etin.
17Eaꞌ Baibel naꞌi God naꞌipa dembinai king Fero naꞌama naꞌi, “Aeꞌ aꞌi ihiꞌambasa pepel aeꞌanai epes hiesi ma anona nemaf sowalapa agel aeꞌanai ma etap hiagoma. Amama atom deiꞌ afelena nandaꞌ amamaga amama.”
18Apeꞌ mogawa iꞌi God niꞌi nigiambama enin epen etin, anan nigiambaman. Eaꞌ iꞌi nosopama okom enin epen, anan nosopama okom ananinai.
19Eaꞌ anona ma ipeꞌ atuwasi niꞌipa aeꞌ naꞌama niꞌi, “Iꞌi naꞌama, deiꞌ maina God ataꞌ naꞌiam etin naꞌi epen ofagema mapomana waf aonai anan nandaꞌanai? Emi laꞌifina nesambaloꞌ okom Godi? Owaꞌetin.”
20Ipeꞌ epes emi egafipa ma piꞌi pinifala God? Owaꞌ. Aꞌi malep sandaꞌ nombol sandaꞌanai laꞌifina ninifala aman anama nandaꞌanai niꞌi, “Deiꞌ maina ineꞌ nandaꞌe naꞌama?” Owaꞌetin.
21Aman nandaꞌ malihi nefaꞌai anona etap nandaꞌ maloh biam, anona maol buꞌunai, anona falafunai maol aonai. Endilisi amama andeandeꞌ.
22God wapotiꞌ nandaꞌam naꞌama etin siꞌi aman nandaꞌ malihi. Fowaꞌ nandaꞌ epes sataga eaꞌ naila okom ananinai atona naꞌi ahoꞌma enis epes sefeꞌ eaf hagililasanai. Esis safeꞌ eaf anama, eaꞌ anan ina nagwamasa waf aonai esis sandaꞌanai ulal, owaꞌ. Anan ataꞌ nanimbelis nape nohafas nogota laonai ma anona nemaf nohambombagas. Deiꞌ main, anan naꞌi nowalapa okom wandafunai ananinai notaga alihina noloma pepel ananinai ma epes hiesi sogawana.
23Anan naꞌi nowalapam motaga alihim amamaga nafifili buꞌunai ananinai ma enis epes anan nati uwahipis sogawam. Epes isima anan naila okom ananinai atona fowaꞌ nandandepasa noseꞌasa nafifili esis.
24Amama maꞌi apeꞌ atepa. Anan nofalapa eaꞌ. Ina nofala enis Juda etis, owaꞌ. Nofala enis owaꞌ Judaisi wapotiꞌ.
25Basef amama aman profet Hosea fowaꞌ gani nandaꞌami wapotiꞌ maꞌi naꞌama maꞌi, “Esis amam nematawa isima fowaꞌ ina epes aeꞌasi, anona nemaf iꞌi epes isima aeꞌasi, eaꞌ epes isima fowaꞌ aeꞌ owaꞌ okom ninilas eseꞌasa opaf, anona nemaf okom ninilas.
26Eaꞌ wambel aliꞌ aꞌipas aꞌi, ‘Ipeꞌ ina epes aeꞌipei’, anona nemaf wambel anama atona sofalas siꞌi, ‘Awasi God nape namunai laꞌelaꞌef ananisi.’ ”
27Fowaꞌ profet Aisaia nandaꞌ ikwafa esis Israel naꞌama naꞌi, “Iꞌi esis Israel sotaga hias endilisi siꞌi wesan naꞌoh naoh akata, eaꞌ hapaisi. Anona nemaf Dembinai nofaꞌai kwawieꞌis nofaꞌas sotanimani nokwahomasa waf aonai.
28Anan anona nemaf nondaꞌmasa basef laꞌifimi notopaꞌam mehip nogwamasa nimanimi epes hiesi etapasi hiꞌilas.”
29Eaꞌ naꞌama etin siꞌi fowaꞌ Aisaia naꞌiama esis amam nematawa Israel naꞌi, “Iꞌi Dembinai laꞌifinai numafi amamaga hiami owaꞌ neasopama nimanimi epes isima sape etap anaeꞌ, anona nemaf apeꞌ motaga higililapa siꞌi wambel anama biafina Sodom naloma Gomora. Owaꞌetin. Anan nasopamam eaꞌ.”
30Deiꞌ apeꞌ ataꞌ miꞌiam miꞌimama? Apeꞌ miꞌiam naꞌama miꞌi, “Esis owaꞌ Judaisi ina sandaꞌ maol luꞌunai ma sefaꞌ waf buꞌunai, esis sefaꞌam eaꞌ. Esis sembaleꞌefa God sefaꞌ waf anama buꞌunai.
31Eaꞌ esis Israel sandaꞌ maol luꞌunai ma saila miꞌuli God fowaꞌ nasoꞌ Mosesanai ma sefaꞌ waf anama buꞌunai, esis ina sefaꞌana, owaꞌ.”
32Deiꞌ main, esis sandaiwaꞌma sembaleꞌefana sofaꞌ waf buꞌunai. Esis ukup maꞌi sondaꞌ maol atona sefaꞌana. Naꞌama sandasisiꞌip anona owap sowa.
33Amama siꞌi Baibel naꞌi, “Peme! Aeꞌ ambeꞌ anona owap wambel luꞌunai esis Israel agel Saion. Owap anama pepel napaina nohambombaga epes sondasisiꞌip sowa. Eaꞌ emi egafis sembaleꞌefa aman anama, anona nemaf esis ina ukup aom, owaꞌ. Sope sondanifel.”
