1Na Kraistinga iyemu moro na ungu paimbomu nio. Kolo naa toro. Mini Kake Telimuni nanga konopuna paa nino nimona lipo manjiro.
2Nanga ango kame, anda kolepalemani na peya kalko ltingi Israel imbo akuma, enoni teremelemunga Goteni eno tepa kenjimbelo, kombu kerina molko kenjiko kau punge na lipo manjipolio niomuni, nanga konopuna paa kondo kolopo waliwalima kamele ambolopo mindili paa nombo moro akumu paa nio. Akumunga wendo liembo nimbo nani nanga Israel imboma lipo tapondambo nimbo Goteni eno molko kenjinge aulkena naa pangei nimbe na Pol Kraist kinye peya molombolo aulke purona naa pambo nimbe pipi tipe, enonga kolo wangopo molopo kenjimbo aulkena pambo, eno nanga kolo wangoko molko kondonge aulkena pangei nilka aulke te lekanje nani Gotendo aku teko niwi nilka.
4Oi Goteni Israel imboma kanopa lipe nanga bakuluma molangei nimbe tepa ltimu ulumu kinye Gotenga pa telimu kinye, ungu nendo yando nimbe panjipe mi lierimu unguma kinye, Mosesini ungu mane tirimu ungu manema kinye, Gote popo toko kapi ninge ulumu kinye, eno kinye i tepo i tepo tembo nimbe panjirimu unguma kinye, ima pali enonga.
5Pulu polko anda kolepa iye awilima Israel imboma enongala. Kraist maina iye molombaindo anda kolepalemani yandopa kalko ltingi imbo teni Kraist merimuna yu enonga talapena wendo orumula. Yu melema pali nokoromo Gote. Yu takiraki kapi nimbo tiye naa kolopo imbi lipo ola mundemili. I paa.
6Linonga kolepa Israeleni kalopa ltimu imbo nanga ango kame mare awini Gote umbulu tirimelemunga kondo teremo nalo eno teremelemunga tepo niomu Goteni Israel imboma kinye tembo nimbe panjirimu ungumu kamukumu mainye pumo nimbo naa nio. Linonga kolepa Israeleni kalopa ltimu imboma pali Israel lapu imbi akuna naa moromele.
7Abrahameni kalopa ltimu imboma pali yunge bakuluma moromele manda naala nimolo. Oi Goteni Abrahamendo aku tepa nimbelie nimbeindo, Aisakeni kalopa limbelo imboma kau imbi leko Abrahameni kalopa ltimu imboma ninge, nimu.
8Aku ungumunga pulumu i tepa: Lino Abrahameni kalopa ltimumunga Gotenga bakuluma moromolo manda naa ninge. Goteni Abrahamendo imboma kinye tembo nimbe panjirimu ungumu paimbo ningo ipuki tirimele imboma kau Goteni Abrahamenga bakuluma nimbe karomo.
9Goteni tembo nimbe panjirimu ungumu i tepa. Wai wendo ombalo niomu wendo ombalo wali kelepo yando ombo wali Sarani ungulu te membalo nimu.
10Akumu kau molo. Rebekani merimu ungulu talonga lapa tendekumu kau, akumu linonga anda kolepa Aisak kanomu.
11Akumu paimbo nalo olo pakilieme ungulu talo oi naa meli wali, oi ulu keri pengama naa pilko teangili kape Goteni Rebekando nimbeindo, Komomuni akiliomunga kongono kendemande tendembalo, nimu. Goteni yunu waliwalima pilipe wendo opili nimbe kanopa ltimu mele lipe manjipelie aku ungu nimu. Ungulu taloni ulu teringili mele kanopa naa apurupe, yu yunge konopuna kau pilipe kanopa lipelie aku tepa nimu.
13Aku tepa mele Gotenga bukuna ungu te moromo, akumu i tepa: Goteni nimbeindo, “Jekop konopu mondopo nanga iyemu molopili, nio nalo Iso konopu naa mondoro,” nimu.
14Goteni aku ulu terimumunga linoni ambele nimoloya? Goteni aku tepa terimu mele alowa tepa, tepa kenjirimu nimoloya? Akumu paa manda molo.
15Aku ulumunga Goteni Mosesindo nimbeindo, Nani nanu imbo te tepa kenjimbelo wali kanopolio kondo kolopo mindili naa nopili nimbo konopu lembo imbomu kondo kolopo mindili naa nopili nimbo. Nani nanu imbo te umbuni pembalo wali kanopolio kondo kolopo lipo tapondombo konopu lembo imbomu kondo kolopo lipo tapondombo, nimu.
16Akumunga imbo teni Goteni na yunge imbomu nimbe mako topili konopu ltemomunga Goteni yunge nimbe mako naa toromo. Molo imbo teni Na mako topili nimbelie mindili nomba ulu teremo akuma kanopa mako naala toromo. Goteni yunu, yunge kondo koromo akumuni kau aku ulu teremo.
17Aku ulumunga Goteni Mosesinga kerena Isip iye nomi kingimundo nimu ungumu Gote yunge Bukuna moromo akumu i tepa, Nu kinye tembo mele imbomani kanoko nanga engemu kanangei. Na imbi molopili temanemu mai kombumanga pali toko molangei nimbo nu Isip imbomanga iye nomi kingimu molani nindu, nimu.
18Akumunga, kinye lino i tepo pimolo. Goteni Imbo te kondo kolombo konopu lemo imbomu paimbo kondo koromo. Nanga ungumu naa pilipe tui tipili nimbo konopu lemo imbomu paimbo aku tepa moromo.
19Akumunga kinye eno imbomanga teni na walipe pilipelie nimbeindo, Goteni aku teremo lemo lino ulu kerima teremolo mele kanopalie lino ambe temona teko kenjirimele nimoya? Goteni konopuna pilipe tembo konopu lemo mele narini manda molo nimbeloya nilka.
20Aku nilkala nalo maina imbo narini Goteni ulu teremomanga teko kenjirino nimbe iri tombaloya? Imbo teni melte wamoromo wali aku melemuni imbomundo na ambe temona aku teko wamoronoya nimbeloya?
21Maini mingima wamoromo iye teni mingi talo wamopalie kamukumu noimbei mingi te wamopa, koieka noimbei mingi te wamopa aku tepa manda naa wamombaloya? Akumu yunge kongonomu.
22Aku lemo Goteni aku tepa manda naa tembaloya? Goteni Yunge mumindili kolto mele mona wendo opili, yunge engemu kanangei nimbe, mele tepo kenjimbo konopu lemo melema tepa kenjimbelo walimu wendo ombalo kinye tembalo waimu we liepili tiye koromo aku ulu teremonje?
23Yunge oi wamopa noindirimu mele pengama kondo kolopa yu kinye lepa kondopili nimbelie yunge pa telimu kinye engemu talo kanoko, yunge molopa kondoli ulumu mele pengamani kanangei nimbe oi mele kerima we liepili nimonje.
24Melema kondo kolombaindo tembalo melema nio akuma lino maina imbo Goteni kanopa ltimu imboma. Lino Juda imbomanga mare kau molo. We imbo mare kape waye.
25Akumundo Goteni oi nimu ungu Hoseani bukuna torumu moromo mele i tepa, Nanga imbo naa moloringima eno nanga imboma nimbo. Imbo na konopu naa mondoruma nanga konopu mondoli imboma nimbo.
26Kombu tenga eno nanga imboma molo niu aku kombuna eno koinjo molopa kau puli ulu pulumu peremo Gotenga bakuluma nimbo, nimula.
27Aisaiani Israel imboma moloringi mele lipe manjipelie nimbeindo, Israel imboma nomu kuta kulendona ukiye ltemo kano mele paa awini moromele nalo Goteni maina imbomanga kot pilipelie enonga ulu teremelemanga tumbi tipe kamukumu pundu topa mindili timbelo akumunga eno imbo pokore tukundo limbelo, nimu.
29Imbo pokore kau molonge aku Aisaiani nimu mele akumu i tepa: Gote paa engema pali peremo Awilimuni lino pali topa kondopa linonga imbo mare we koinjo molko yandopa imboma kalko liengei naa nilkanje ulke kombu Sodom kinye Gomora talonga imboma topa kalorumuna lino aku tepo te koinjo paa naa molemala.
30Aku lemo kinye linoni ambele nimoloya? I tepo nemili, Israel imboma ningo naa moromele imbo lupemani imbo toya tolima molamili ningo mindili nongo uluma naa teko moloringi aku imboma Goteni imbo toya tolima nimbe kanorumu. Gotenga ungumu paimbo ningo ipuki tiringimunga Goteni eno imbo toya tolima nimbe kanorumu.
31Nalo Goteni yunge nimbe kanopa ltimu Israel imbomani eno Goteni imbo toya tolima nimbe kanombalo ungu mane te lombilemili ningo molkolio te naa lierimuna koroko kelkolio Goteni eno imbo toya tolima naa nimuna naa ltingi.
32Ambe telka imbo toya tolima naa moloringiya? Eno Gotenga unguma paimbo ningo ipuki naa tiringi akumunga eno imbo toya tolima naa moloringi. Eno enongano mindili nombo ulu pengama temolo wali lino imbo toya tolima nimbe kanombalo konopu leringimunga Goteni eno imbo toya tolima nimbe naa kanorumu. Imbo kika tenderemo koumuni aku imboma kika tendepa tepa ai tondoromo.
33Aku koumundo Gotenga bukuna Aisaiani torumu ungu te moromo, akumu i tepa: Pileio! Imboma tepa kika tendepa imboma tepa ai tondoromo kou te, nani Mulu Saion ola liepili noindu. Kou akumu kimbo mundupe ipuki tirimo imbomu, aku koumuni yu tepa naa tombalo. Imboma manda tapombalo akumunga Yu ipuki tirimele imbomani mai naa koromele.
