1A ta ayanin itta ya ibar ku tekamuy gafu ta sakā Hudyok kiden, a awek hapa magtulad te tagabu nak ni Hesus, a kustu ya uhohugan ku ta kuman na neparikna na Kahalwa na Namaratu teyak. Te ya kuman na mariknak ta nonot ku a pake madamdamak, ikid na kanayun matakit ya nonot ku ta kagittak kiden, te melogot kid sangaw gafu ta aweyan da ya nesaad na Namaratu ta dafu da.
3A gafu ta kahulun ku kid, ikid na kagittak kid nga Istralita, a ikayat ku ta iyak mina ya pa-gangan na Namaratu ikid na iwasik ni Afu Hesus am mabalin mina ta ikid ya ikerutan na.
4Te ya Istralita kiden ya napolu kiden nekwenta na Namaratu ta anak na, a ikid hapa ya nagyanan na dakar na en, a ikid ha ya nakitaratun na ikid na inatadan na ta lintig na en ikid na pangdayaw da tentu. A ikid hala ya nangikarin na ta mangikerutan tekid.
5A gafu ta simsima kid nig mina Abrahamen a gagangay ta ikid mina ya mesipat ta nekari na Namaratu teg mina Abrahamen. A ikid hapa ya nagafun ni Hesusen nga magturay ta ngamin ikid na mangikerutan ta ngamin tolay. Ampade Namaratu ya madaydayawan addet ta addet.
6Ammi maski am awedan nesipat ta nekari na Namaratu teg mina Abraham a awetam mina pahig ta awena idulot na Namaratu ya nekari na en, te maski am sa nagafu kid te mina Abraham a awena haman pinaggagitta na Namaratu ta sa Istralita kid.
7A maski am sa nagafu kid te mina Abrahamen a awena pinaggagitta na Namaratu ta sa simsima na kid. Te duwa haman ya anak ni mina Abraham, a ya uhohug na Namaratu tentu a “Ya anak mina Isak ya nekariken teko nga mesipat ta bendisyon ku teko, te bakkan te Ismael,” kunna.
8A ya ikayat na uhohugan ta isin a bakkan ta simsima na bari na en ya ikwenta na Namaratu ta simsima na, te intu la ikwenta na ya ihuga na kiden ta kuman na nepangihuga na te Isaken ta idi.
9Te ya nekari na Namaratu teg Abraham ta kawan para la ni Isaken a “Magtoli yak hala sangaw tekamuy ta kumanin na hulan ta takday darun, a yen sangaw ya paganak na atawamina Sara ta lalaki,” kunna.
10A itta hapa ya takday para na mangipasikkal ta uray na Namaratu, te ta nepagatawa nig Isak ikid ni Rebeka a natarun i Rebeka ta siping na lalaki, i Hakob ikid ni Esaw.
11a ya uhohug hapa na Namaratu te Rebeka a “Itta ya duwa na asitay ta sirat mina, a ya kapozyanan sangaw ya maturturay ammi ta imunnanen. A pake umaddu sangaw ya simsima da kiden, te magbalin kid sangaw ta duwa na tolay,” kunna. A ta aweda en para la nekeanak, ikid na kawan para la na iningwa da ta mappya ikid na dulay a dana pinili na Namaratu ya takdayen, te bakkan ta kuman na uray na tolay ya nepangpili na, te uray na hapa la.
13A nepasikkal na para ya gagangay na pangpili na, te ya uhohug na ta takday surat a “Pake iddukan ku ya simsima kiden ni Hakob ammi ta simsima kiden ni Esaw,” kunna.
14A anu mantu ya uray tam? Killu de ya gagangay na pangpili na Namaratu? Bakkan,
15te ya uhohug na en te mina Moses ta idi a “Am itta ya ikayat ku pilin a pilin ku la, a am itta ya ikayat ku isipat ta kallak ku a isipat ku la,” kunna.
16Am itta mantu ya pilin na Namaratu a bakkan haman ta uray na ikid na tarabaku na ya gafu na pangpili na Namaratu tentu, te pulus ta awan mina ta pilin na am awa ikallak na en la.
17A nonotam para ya uhohug na Namaratu te Faraon nga Ari na Egiptano kiden, te ya uhohug na en tentu nga nesurat ta Bibliya a “Iyak ya makāuray ta magari ka, petta iko sangaw ya pakaitan na pakapangwak gafu ta pangabak ku sangaw teko, a petta mepadangag hapa sangaw ya kalalaki na pakapangwak ta ngamin paglelehutin,” kunna.
18A am itta mantu ya ikayat na en ikallak, a ikallak na la, a am itta ya ikayat na en patuyagan ta nonot na a patuyagan na la hapa. A gafu ta kunna ten a mabalin ta kummuy nga maguhohug teyak ta
19“Anu kawagan na mantu ta paliwatan na Namaratu ya awan mangurug tentu? Te maski am anu ya kwan tam a intu la kwan tam ya uray na tekitam?” kummuy de.
20Ammi ya tabbag ku hapa a “Tolay kam la haman, a itta hud ya amu muy petta ituldu muy ya Namaratu.” Te ikitam nga pinadday na en a mappya hud ta tagasoysoyan tam ya nangpaddayen tekitam. “A te bakkan mina ta kunna sin ya nepamadday mu teyak,” awetam mina kumin.
21Te am angarigan ta itta ya paddayan na maginlala-ba a awena hud mabalin ta pagdaduman na ya paddayan na, petta itta ya pake ispot ikid na gagangayen la na la-ba? A kumanen hapa ta Namaratu ewan, te mabalin haman ta paddayan na ya ikayat na en paddayan?
22A mappya para ta maawatan muy ya itta ta nonot na Namaratu, te maski am ikayat na ipaita ya pagporay na ikid na pakapangwa na ta gagangay kiden mapa-gang a awena la bit, te italantan na ya arawen nga pangpa-gang na tekid,
23petta dana ipaita na ya kalalaki na allak na ta mayat kiden mekallak, te yen kid ya dana neparan na ikid na inagagay na, kontodu ikitam mangurug nga Hudyo pase Hentil.
25A yen hapa ya dana nebar na ta surat ni mina Osyas: “A ya Hentil kiden nga awek pinili ta idi a yen kid hapa ya ikwentak ta tolay ku. Awek kid inidduk ta idi, ammi ta ayanin a iddukan ku kid na,” kunna.
26“A ya awek kiden nekwenta ta tolay ku ta idi, a ya simsima da kiden sangaw ya magngagan ta ‘Anak na sigatolay na Dyos,’” kunna ha.
27Ammi ya uhohug hapa ni Isayas gafu ta Istralita kiden a “Maski am pake addu ya Istralita kiden ta kuman na kaddu na ginat kiden ta bebay a assang la sangaw ya mekerutan tekid,
28te am idatang na Namaratu ya pangpa-gang na ta lutakin a pake alistu ikid na masikan,” kunna.
29A uhohug hapa ni Isayas gafu ta sakā Hudyo na kiden a “Am awan mina ta nehuna na Namaratu tekitam ta anak tam a sa negitta kitam mina ta pinapasi na kiden ta ili na Sodom ikid na Gomora,” kunna.
30A ya maawatan tam mantu gafu ta Hentil kiden ta idi, a aweda nakanonot nga makipakoma ta Namaratu, ammi ta ayanin a ya simsima da kiden ya ikwenta na ta matunung gafu ta pangikatalak da te Hesus.
31Ammi ya Istralita kiden nga nagafura magpatunung ta bari da gafu ta lintig na en a awan ta mabalinan da.
32“Te anu hud ta kunna ten?” kum. A onay, te bakkan haman ta Namaratu ya nekatalak da ta katunung da, am awa pagbannag da hud la. A yen ta awan ta mabalinan da, te nekatupag da garay ya nesaad na Namaratu nga mangikerutan tekid.
33A dumatang mantu tekid ya kuman na inuhohug na Namaratu nga nesurat ni Isayasen; “Itta sangaw ya isaad ku nga batu ta ili na Ziyon, petta magserbi mina ta kuman na pagpatayukān na tolay kiden ta bali. Ammi takwan sangaw ya uray da ta batu en gafu ta aweda sangaw ikatalak, a yen hapa sangaw ya kuman na ketumpapan da. Ammi ya mangikatalak sangaw ta isaad ken a awena sangaw melogot,” kunna.
