1Namba Polo Kataisa Jisasanya kendemane dokome pepa dake pyekelyo. Goteme namba aposele joo kalyale lao ipu latala baanya Wai Pii Epe doko lamaiyoo kata lea.
2Goteme baanya Wai Pii Epe doko ipatana lao wambao potopesa dupa-kisa lao paneamopa, dupame Gotenya pii etete epe dupa pepa piami-pyaa.
3Wai Pii Epe dokome Gote Ikiningi naimanya Kamongo Jisasa Kataisa doko kandao lapae silyamo. Baa endakali. Baa Dapiti tatanya mandipae. Dee baa Gote etete epe. Baa malunya sakateamo dokome baa Gote Ikiningi pupu lapaena lao laitaka petea.
5Nambame Kataisa lalyoo endakali tata paliuu pelyamo dupa pitakame baa lao masoo minao baa watao katena lao sakatasoo kalyale lao, Goteme Kataisa-kisa aposele kalai epe doko namba dia.
6Nyakama Loma yuu dokonya kalyamino endakali dupa apata tata dupa-pipa Goteme ipupa lateamo dokony nyakama Jisasa Kataisanya katakamailyamino.
7Dopana, nambame pepa dake nyakama Goteme mona setenge baanya ipupa latae endakali dupa pitakanya pyao peekelyo. Naimanya Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena.
8Nambame wambao nyakama dapa langilyo: nyakamame masoo minao paelyamino lapae doko yuu dupa pitakanya endakali dupame silyamino. Nyakamame dopa pilyamino dokonya nambame nyakama pitaka kandao Jisasa Kaitaisa lao masetala nambanya Gote doko lao yaka pilino lelyo.
9Nambame nambanya mona doko pitaka Gotenya kalai dokonya yukuoo setao baanya Ikiningi dokonya lao Wai Pii Epe doko lamaingi. Goteme kandamopa kiningi lelyona, nambame koteaka lao loma silyo dii lao nyakama kame sala nayao loma singi. Goteme kapana lao masetamo kandao doko, indupa namba nyakama kalyamino dokonya ipatoo lao baame kaitini mende setekena lao loma silyo.
11Oli Sipitisame namba epe dingi dokonya mokosoo nyakama pupu lasina ditoo latala, nambame nyakama kalyamino dokonya ipawanimi kumilyo.
12Nambame dopa lelyo doko, namba nyakama-pipa tole katatamano dokopa nyakamanya masoo miningi dokome namba nisetaminopa nambanya masoo miningi dokome nyakama nisotopa nisoloo pyoo katatamanopa lao lelyo.
13Kaimia paluma, nambanya kalai dokome endakali tata waka dupanya kainanya dii mandengeli pyoo nyakamanya kainanya apata dii mandena lao paa longosa nyakama kalyamino ongonya ipatoo lao masingi doko nyakamame masipimi laka lao masilyo. Dopa lao masingiaka doko, ipupenge kaitini doko lyokenge.
14Gitiki endakalipi meepi, mana nyepaepi nyala naengepi, dupa pitaka nambame Wai Pii Epe doko lamaipenge.
15Tenge ongonya minao nambame nyakama Loma yuu dokonya kalyamino dupa apata Wai Pii Epe doko langitoo lao eteke pilyo.
16Nambame Wai Pii Epe doko lamaiyanya elya nakaelyo. Wai Pii Epe doko Gotenya pupu lapae. Pii dokome masoo minilyamino endakali dupa pitaka pyoo nyingi. Juta dupa wambao pyoo nyepala tata waka dupa apata pyoo nyingiaka.
17Goteme endakali dupa tolataena lenge doko Wai Pii Epe dokome laitaka pingi. Masoo miningi dokonya-kaita baame masoo miningi endakali dupa tolataena lenge. Pii pepa pyapae singi dokonya, “Masoo miningi dokonya-kaita Goteme tolataena lelyamo endakali doko lete etete katatana,” lapae silyamo.
18Gote maita maiyoo koo pyoo paenge endakali dupa kandao Gote kaiti-kisa katenge dokome baanya imbutongo mandenge doko laitaka pingi. Endakali dupame nyakamanya koo pingi mana dokome Gote lao masingi angi doko angombengema.
19Endakali koo pingi dupame Gote lao masepenge doko baa tangeme dupa-kisa panasiamo dokonya dupame masingima.
20Baame yuupi kaitipi wapuiyamo gii dokonya pituu indupa tuu lao endakalimi Gotenya nakandenge dupa dupame masingima. Kini, dupame oapi Goteme wapuiyamo dupa kandatala baa-kisa pupu lapae sia singi dokopa baa katea katenge dokopa dolapo auu pyoo masingima. Dokonya dupanya mendeme, “Nambame ambe lao piona,” nalapenge.
21Dupame Gote lao masingimaka doko, baa Gotena lao lalyala nayao baa lao yaka pilino naleami-pyaa. Dopa napinya, nyakamanya masingi doko angi daa dupanya pena lao kateaminopa, nyakamanya masala naenge mona doko iminjia-pyaa.
22Dupame nyakama tange masingi akalina lao masiaminoaka doko kyekeami-pyaa.
23Dopa pyoo katao dupame kumala naenge tii pipae Gote doko alo pyoo endakali kumingi dupapi, yakapi, mena tatapi, kanopatopi, dupa wangi tao wasoo tama pyoo kateami-pyaa.
24Dupame dopa piamino dokonya Goteme dupa tangenya moname pyuani kayatamili pina lao yakinateamopa, kini dupame elya pingi napipenge dupa pyoo nyakama tangelapo mende elya pisa pisa pyoo kateami-pyaa.
25Endakali dupame Gote lao masingi angi doko yakinatala alo pyoo sambo gote dupa minao kateami-pyaa. Kini, dupa pitaka wapuingi Gote doko lao tanga tangapi tama pipengeaka doko, dupame baa tama pyoo baanya kalai pyakamaiya naenya, baame wapopae dupa tama pyoo dupanya kalai pyakamaiyoo kateami-pyaa.
26Tenge ongonya minao dupame elya pingi pyuanimi putiti kayao elya kayapenge mana dupa minao katena lao Goteme yakinateamopa, nyakamanya enda dupame apata akalipa tole pingi mana doko kayapala alo pyoo mana naminapenge dupa miniami-pyaa.
27Dopaka pyoo akali dupame endapa tole pingi mana doko kayapala akali yango-pipa elya pingi pyuanimi etete putiti kayao kateami-pyaa. Dupame akali yango dupa-pipa elya andake kayapenge mana koo doko minao kateami-pyaa. Dopa piamino dokonya nyakamanya mana koo miniamino dokopa kapa pao yanu nyepenge doko nyakama tange-kisa nyoo kateami-pyaa.
28Dee endakali dupame Gote itakinya mende daana lao masiaminosa, Goteme dupanya masingi doko koena lao yakinateamopa, dupame mana naminapenge koo dupa miniami-pyaa.
29Dupame eteteaka luiyao katao, nyipu lakaka lao masoo, tombaka nao, mana koo dupa longo lao minao kateami-pyaa. Dee dupame tilya nyoo, endakali yango pyao kumasoo, imbu kayaloo pyoo, sambo lao minakasoo, mona koo palyoo koo pyoo kateami-pyaa. Mana koo dopale dupaka longo lao miniami doko minawaka kalyamino. Endakali mendeme opale mende pilya doko dupame lale lale payakamaingima;
30endakali mende lao nepengema; Gote imbu kayamaingima; dupame luiyao nyakama alyasale joo kalyamanona lao masoo pii luiyapae lengema; mana koo enenge mendapua kutao miningima; endangi takangepanya pii nepakamaingima;
31dupame kyakaenge joo payao pipenge dupa napingima; dee dupame endakali yango dupa auu nakayao kondo nakaengemaka.
32Mana dopale minilyamino dokonya yanu doko Goteme koyatamina lao mana seteamo doko dupame masingima. Dopaka doko, mana koo dupa mee minawaka katengema. Dopa iki pyaa naenya, endakali waka mana koo dopale minilyami dupa kandao yaka pilyaminona lao masingimaka.
