1Ne Keriso danave natawa di diruieni, uga mina onan. Ne nonenmagawa oraiwa gaibu mamaib Guwawa Iyakaisiyapama gumbe taibe veni.
2Ne nonenmagave anogugut kokavitwa ag danadawai evedni aueni.
3Ne den apopo ipawa ne Keriso gumbe ube anekpopo, tatanaiwa munan sira kwapunwa desiroma igiyawa munan. Ne den apopo ipawa ne diguragut abnawa munan.
4Mu Isuraeru igiyawa. Usitainaven atanwa, eyawa, God agiyawa iyayapan munan, Gwangwan autanwa, taparoro, ge agi mu mumawa.
5Isimuranaiwa mu mina mumawa. Keriso me mina kwapiwa gumbe mu gumbo uwane. Keriso mame me opa painau, sira God wattenewa undag mu ankwatave. Keriso me God me nu waiyaigimtan. Amen.
6Megara God gaiyawa me yusiwa onan den ane. Kuiyawa nu oma den ane wata Isuraeru apa onamiya igiyawa undag mu Isuraeru.
7Sira nu oma den ane wata Ebraam gumbe yaig onamiya igiyawa undag mu usitainawa. Kuiyawa me, “Aisak gumbe yaig onamiya igiyawa mu veme ge ututainagwa apa yaieg onamiyawa.”
8Natawa me ud kwapuwa gumbe yaiyawa mu God usitainawa onan. Ud agi gumbe yaieg onamiyawa mu usitainawa yaieg onamiyawa.
9Agi gaiyawa me mamaib. “Ne bairawan umaewa ne mapa sira taig onetna gare mame mina. Sira Seira kikiyan apan baraupe.”
10Mame mekut onan. Nu isimuranaiwa Aisak gumbe Rebeka bugane.
11Usitainawa mu den yaiya sira oraiwa ge kukaeba den aya kumiwa apa, Rebeka me umum anone, “Tatawa me gwaneba nau meuma atan abnawa ape.” Kuiyawa God anoiviwa me yusipamit yoivi, divi da atanwa gumbe onan, megara Ayapan me iyayapan munan auwaiviwa gumbe.
13“Ne Jekob gumbe baigan ana, sira Eso anokukam ana,” meib tene.
14Meve nu anin waton? Ano kukaeba da God gumbe go onan? Onan di.
15God me Mosisi gumbe wane, “Ne iyayapan ano muneniwa anomuneni, sira ne iyayapan mu nenan danadawai auemewa munan danadawai aueni.”
16Meoya iyayapan anoano mumawa emewa me natawa koka onan, megara God anoano meuma nuniviwa me natawa koka.
17Baiboru me Parao gumbe wane, “Ne ge agemna wan yoiya, kuiyawa ne imunap yutunwa toyau muntna ge gungap, sira at undag ne ivunwa yaug anope.”
18Mame mina, God me iyayapan ano meuma muntan anoiviwa ano meuma munivi, sira me iyayapan ano meuma muntan topayaiviwa munan topayaivi.
19Ye ne gunap mamaib waya, “Meib aigimpe ipewa, divi oya God iyayapan gumbo pui yuwamivi? Bira me God yumateba topayane?”
20Megara apan. Ye God topayene. Ye bira? Wattenewa oma ane wape wattene abnawa gumbe, “Dimbae oya ge ne mameib anegana?”
21Ui warivi abnawa me yusiwa gaibu go onan? Piyu gumbe me oma ane ui warampe dividivi oraiminawa oya, sira ui warampe dividivi kukaeba oya.
22God mamaib anoivi ipewa, me aninin? God imive danapiriwape, sira yusiwa toyau mumpe. Megara anoano oraiwa koka gumbe uiwa nikiag amaraivi, sira me ui me God watkukamtan anoiviwa den watkukampe.
23Me gaibu eyawa koka toyau nuntan oya. Ui me ano muniviwa wakeya. God ui me wait tamibarip aneve wakeya.
24Nu ui me ano nuniviwa. God nunan auwane Ju igiyawa gumbo mu mukut onan megara Ju onan igiyawa mu gaibu.
25Osea Bukaeba danave me waivi, “Mu ne iyayapan neuma onan, megara ne auwatnawa mu ne iyayapan neuma. Sira mu iyayapan mu ne den baigan munnawa, megara ne auwatnawa mu ne baigan muneniwa. Ne wana, ‘Ye ne iyayapan neuma onan.’ At desiroma apa, mu wape God wakeiviwa usitainawa.”
27Sira Isuraeru munan, Aisaya mamaib kwaruwane. “Isuraeru usitainawa mu obiren, poeman visive nuge mina. Megara iyayapan wakeyawa mukut mu waita mumpe.
28Ayapan gae meuma undag aug oraimina sira tatevit ape piyu egave.”
29Sira Aisaya namu wane mina. “Ayapan yusipamitwa me utuntainunwa den numpa ipawa, nu Sodom mina apono, sira Gomora mina apono.”
30Nu me anin waton? Ju onan igiyawa mu oraiwa oya didimama den aya, megara oraiwa auya. Natawa mamaib, oraiwa me anotumat gumbe.
31Megara Isuraeru me oraiwa gwangwaneba diunewa mu oma den ane auya.
32Divi oya? Kuiyawa mu anotumat gumbe den diuya, megara mu dividivi atanwa minawa gumbe diuya. Mu amawa totariyatanwa an me gumbe amowa toya.
33Me mamaib tenewa mina. “Yauya. Ne Saion apa amawa totariyatanwa anawa ge an koka me ape uyug aigatanwa tetna. Bira da me gumbe anotumat ape ipewa, me ubmam den ape.”
