1El cosa ta habla yo verdadero gayot cay unido yo con Cristo, poreso hende yo ta habla embusterias. El di mio conciencia ta asegura conmigo que el di mio maga palabra todo verdad, cay el Espiritu Santo ta controla el di mio conciencia.
2El verdad amo que tiene yo bien grande tristeza, y cada vez ta llega yo pensa hende gayot ta acaba el dolor na di mio corazon
3por causa del di mio maga compoblano quien igual como familia lang di mio. Si posible era ay otorga yo queda condenao de Dios y queda separao con Cristo, si por medio de ese el di mio maga hermano Judio ay queda salvao.
4Ya sale sila na linea di Jacob, y Dios ya escoje canila para queda maga anak di suyo. Ya permiti tamen le canila mira un poco del di suyo poder, y ya hace canila maga contrato, y ya dale tamen canila el ley di Moises. Dios ya dale canila mira el manera para adora con ele, y ya dale le canila mucho promesa.
5Ya sale sila na linea di canda Abraham, y na ultimo cuando si Jesucristo ya llega na mundo como un gente, ele tamen ya sale na linea di Abraham. Alaba ya kita con ele hasta para cuando, cay ele el Dios quien ta reina todo las cosas. Amen.
6Hende yo ta habla que Dios nuay cumpli el maga promesa, cay ya cumpli le todo el que ya promete le. Pero masquin el maga Judio tiene mucho privilegio, tiene pa di ila nuay queda escojido de Dios.
7Hende todo el maga decendiente di Abraham maga verdadero anak de Dios, cay ya habla le con Abraham, “Considera tu con todo lang esos quien ta sale na linea di Isaac como el di tuyo maga decendiente.”
8Quiere decir hende todo el maga anak di Abraham amo el maga anak de Dios, sino aquellos maga anak lang que Dios ya dale con Abraham como el resulta de aquel promesa acerca di Sara. Esos lang maga bata amo el verdadero maga anak de Dios.
9Este el promesa de Dios con Abraham, “Al llegar el tiempo na otro año, ay bira yo otra vez y si Sara ay pari un bata hombre.”
10Hende lang ese todo. Ya llega el tiempo cuando aquel bata hombre si Isaac ya casa con Rebeca, y ya pari le dos bata hombre cambal (si Jacob y si Esau).
11Pero antes de parir si Rebeca con estos cambal, Dios ya habla con ele, “El hijo mayor di tuyo amo el quien ay sirvi con el di tuyo hijo menor.” Dios ya habla ese con ele antes pa de nacer el dos bata, y antes pa tamen de hacer sila bueno o malo. Ya hace le ansina para enseña canaton que ta escoje le con quien ele quiere, y hende ta escoje canila por causa del di ila maga trabajo.
13Como este maga palabra escribido na Sagrada Escritura: “Ya escoje yo con Jacob pero nuay yo accepta con Esau.”
14Entonces ta habla ba kita que Dios hende justo? Hende gayot kita ta habla ansina,
15cay ya habla man ele con Moises, “Yo lang cuidao decidi si con quien quiere yo tene compasion y lastima.”
16Poreso hende ese ta depende na gusto del maga gente si cosa le quiere o si cosa sila ta hace dayun, sino Dios lang cuidao si quiere le dale mira el di suyo compasion o hende.
17Puede kita lee na Sagrada Escritura de Dios que ya habla le con Faron (el rey de Egipto de antes): “Por este rason ya hace yo con uste rey, para puede yo dale mira con otros el di mio poder por medio di uste. Y ay causa yo canila predica acerca del di mio nombre na entero mundo.”
18Entonces entende kita que Dios ta dale mira el di suyo lastima con quien quiere le, y si quiere le hace duro el corazon masquin con quien, ay hace tamen ele conforme el di suyo deseo.
19Basi uno di ustedes ay habla conmigo, “Si ansina gale Dios ta hace, porque pa man ta disculpa le canaton? Ta pregunta yo este cay nuay ningunos ay puede man contra con el di suyo querer.”
20Pero ay contesta yo, “Quien ba uste un gente ordinario que ta critica uste con Dios?” Ay usa kita el ejemplo del olla de lodo pandayan. El olla hende ta hace pregunta con el quien ta hace con ese, “Porque man uste ta hace conmigo ansina?”
21Sabe kita que el quien ta forma el olla ta puede usa con el lodo conforme le quiere, y ay hace pa le dos olla del mismo masa de lodo si quiere le - un olla bonito para usa na maga especial ocasion y otro olla ordinario lang.
22Aquel ejemplo ta semeja con el cosa Dios ta hace. Quiere gayot ele dale mira el di suyo rabia para manda sabe con todo el maga gente el di suyo poder, pero nuay le hace ese, sino ya tene pa gayot ele largo paciencia con el maga pecador quien conviene era recibi el castigo de muerte.
23Quiere tamen ele dale mira canaton si paquemodo gayot de grande el di suyo poder y gloria, y ademas Dios ta permiti canaton tene un poco del di suyo poder y gloria, y kita amo con quien ta tene le lastima y con quien tamen ya prepara le antes pa gayot para recibi su gloria.
24Came amo ya con quien ya escoje le desde antes pa, y nuay lang ele escoje canamon maga Judio sino hasta con el maga hende-Judio tamen.
25Este amo el maga palabra que antes pa Dios ya manda con Hosea escribi na Sagrada Escritura: “Ay habla yo con esos maga gente quien antes hende di mio, ‘Ahora di mio ya gayot ustedes.’ Y ay habla tamen yo con esos mismo maga gente con quien nuay yo nunca ama, que ahora ta ama gayot yo canila.
26Y alla na lugar donde ya habla canila, ‘hende ustedes el di mio maga gente,’ alla tamen na mismo lugar, yo el Dios quien vivo gayot hasta para cuando, ay llama canila el di mio maga anak.”
27Si Isaias ya habla acerca del nacion Israel: “Masquin el maga gente na nacion de Israel bien mucho como el maga arena na aplaya del mar, uno poco lang di ila ay puede queda salvao
28cay sin duluk el Señor ay jusga gayot de pronto con todo el maga gente na mundo.”
29Antes pa si Isaias ya escribi este maga palabra: “Si el Dios todo poderoso nuay deja canaton un poco de maga decendiente, ay queda era kita destrosao como el dos pueblo de Sodoma y de Gomorra.”
30Ahora este amo el cosa kita puede habla: el maga hende-Judio hende ta precura queda justo na vista de Dios, pero ahora por medio del di ila fe con Jesucristo, Dios ta considera canila como si fuera nuay sila pecado.
31Alrabes el maga gente de Israel ta busca pa na ley si paquemodo sila queda justo na presencia de Dios, pero nuay sila puede encontra.
32Seguro algunos ay pregunta porque man nuay sila encontra ese cosa que ta busca sila na ley? Nuay sila encontra ese cay nuay sila fe con Dios, sino ta pensa sila que Dios ay considera canila como si fuera nuay sila pecado si ay hace sila buen trabajo conforme na su ley. Nuay sila cree con Jesucristo, entonces ya queda le por ejemplo como un piedra na di ila pasada que ta causa canila man tisut.
33El maga palabra de Dios escribido na Sagrada Escritura ta habla ya acerca de ese piedra: “Atende enbuenamente! Ay pone yo un piedra na Zion, un pueblo del maga Judio, y el maga gente ay man tisut con ese. Pero si quien ta confia con ese, hende ay queda desconsolao.”
