1Lik qatzij wa kambꞌiꞌij che alaq, ma in re ri Cristo y na kanꞌan ta raqꞌubꞌal. Lik kunaꞌ kꞌu nukꞌuꞌx qatzij ri kambꞌiꞌij, ma e ri Santowilaj Ruxlabꞌixel ri Dios kakꞌamaw uwach ri nunaꞌoj.
2Qatzij kꞌut riꞌin lik kimbꞌisonik y ri kꞌax kꞌo chinukꞌuꞌx na kikꞌow taj
3ruma ri kiꞌanom ri e aj Israel, ri qatz-qachaqꞌ qibꞌ kukꞌ. Kanya ne wibꞌ e kinkꞌojiꞌ riꞌin chuxeꞌ ri qꞌatbꞌal tzij re ri Dios y na e ta rike, tobꞌ na jinta chi re ri Cristo chwe, we ta ne rukꞌ waꞌ kekolobꞌetaj rike.
4Ma raj Israel e utinamit ri Dios, yey e rike ri xebꞌuchaꞌ ri Dios re kebꞌuꞌan ralkꞌoꞌal chike; xukꞌut kꞌu runimal uchomalil chikiwach y xuꞌan tzij kukꞌ. Chike rike xyaꞌtaj wi Rutzij Upixabꞌ y xkꞌut chike suꞌanik kaloqꞌnimax uqꞌij ri Dios pa saqil wi. Yey taq rubꞌiꞌtisinik ri Dios uꞌanom, ke rike.
5Rike e kalkꞌoꞌal kan ri qamam lik kꞌo kiwach ojertan. Yey chike kꞌu rike upetebꞌem wi ri Cristo, Ruchaꞌoꞌn lo ri Dios, ri xkꞌun che ruwachulew y xuꞌan tikawex. Yey Rire e Dios puwi ronoje taq ri kꞌolik. ¡Na jinta utaqexik lik nim uqꞌij! ¡Amén!
6¿Na uꞌanom ta nebꞌa ri Dios ri ubꞌiꞌtisim che rutinamit Israel? Pero na konoje ta ri e ralkꞌoꞌal kan ri Israel e saqil utinamit ri Dios.
7Na xa ta ruma kipetebꞌem che ri Abraham, e ralkꞌoꞌal ri Dios. Ma jewaꞌ xubꞌiꞌij ri Dios che ri Abraham: «Xew che rakꞌajol Isaac kakipetebꞌej wi lo rawalkꞌoꞌal» xchaꞌ.
8Na konoje ta kꞌu ri kipetebꞌem che ri Abraham, e ralkꞌoꞌal ri Dios; ma xew e ralkꞌoꞌal ri Dios ri kebꞌalax chirij rubꞌiꞌtisinik Rire.
9Ma ri bꞌiꞌtisinik xuꞌan ri Dios che ri Abraham e waꞌ: «Jewaꞌ pa jun junabꞌ kinkꞌun tanchik, yey ekꞌu riꞌ rawixoqil Sara kꞌo chi jun ralabꞌ» xchaꞌ.
10Y na xew ta waꞌ, ma echiriꞌ ruma ri qamam Isaac ri Rebeca xkanaj yewaꞌ ixoq, xebꞌumatzej eyoꞌxabꞌ.
11Yey kꞌamajaꞌ ne kebꞌalax rike y kꞌamajaꞌ ne kakiꞌan ri utz o ri na utz taj echiriꞌ ri Dios xuchaꞌ jun chike. Jekꞌulaꞌ kaqꞌalajinik e kuꞌana na janipa ri uchꞌobꞌom lo ri Dios; y waꞌ na e ta ruma ri kakiꞌan ri winaq, ma puqꞌabꞌ Rire kꞌo wi kuchaꞌo china ri karaj kusikꞌij.
12Ma ri Dios xubꞌiꞌij che ri Rebeca: «Ri chaqꞌixel e kakꞌojiꞌ más uwach chwa ri atzixel» xchaꞌ.
13Jekꞌulaꞌ kuꞌana pachaꞌ ri tzꞌibꞌital kan puwi ri ubꞌiꞌim lo ri Dios: E ri chaqꞌixel Jacob ri kꞌax xinnaꞌo; noꞌj ri atzixel Esaú, tzel xinwilo xchaꞌ.
14¿Saꞌ kꞌu riꞌ ri kaqabꞌiꞌij riꞌoj puwi waꞌ? ¿E nawi na jusukꞌ ta ri kuꞌan ri Dios? ¡Na e ta riꞌ!
15Ma jewaꞌ xubꞌiꞌij ri Dios che ri Moisés ojertan: We kꞌo junoq kuaj Riꞌin kantoꞌo ruma ri rutzil nukꞌuꞌx, e riꞌ ri kantoꞌo. Y we kꞌo junoq kuaj Riꞌin kankꞌut ri kꞌaxnaꞌbꞌal nukꞌuꞌx che, che riꞌ rire kankꞌut wi ri kꞌaxnaꞌbꞌal nukꞌuꞌx xchaꞌ.
16E uwariꞌche echiriꞌ kꞌo karaj kuya ri Dios che juna tikawex, na e ta ruma lik kacha ukꞌuꞌx wa tikawex che o ruma lik kutij uqꞌij chaꞌ kꞌo kukꞌulu; ma e ruma ri kꞌaxnaꞌbꞌal ukꞌuꞌx ri Dios.
17E pachaꞌ ri tzꞌibꞌital kan chupa Ruchꞌaꞌtem ri Dios echiriꞌ ri Dios xubꞌiꞌij che ri faraón: «Riꞌin xinꞌan taqanel chawe chaꞌ kankꞌut ri nuchuqꞌabꞌ pawiꞌ riꞌat y chaꞌ katzijox kꞌu ri nubꞌiꞌ che ronoje ruwachulew» xchaꞌ.
18Qꞌalaj kꞌu riꞌ ri Dios ruma ri kꞌaxnaꞌbꞌal ukꞌuꞌx kutoꞌ china ri karaj kutoꞌo. Yey we Rire karaj kuꞌan pachaꞌ abꞌaj che ri ranimaꞌ junoq, jelaꞌ kuꞌan che.
19Laj kꞌo kꞌu junoq jewaꞌ kubꞌiꞌij chwe: «We na jinta junoq kachꞌijow uqꞌatexik janipa ri karaj ri Dios, ¿suꞌbꞌe kꞌu riꞌ ri Dios kukoj kimak ri tikawex we rike xew e kakiꞌan ri xebꞌutaq Rire che?»
20Ekꞌu riꞌin kankꞌul uwach: «Achi, ¿saꞌ ko rawach riꞌat chaꞌ katyajan chirij ri Dios? Ma na utz taj we ri xaro ulew kubꞌiꞌij che ri kaꞌanaw re: ¿Suꞌchak jewaꞌ xꞌan la chwe?»
21E ri kachakun rukꞌ xoqꞌoꞌl, ¿na jinta nebꞌa puqꞌabꞌ kuꞌan rukꞌ ri xoqꞌoꞌl saꞌ ri karaj kuꞌano? Ma we Rire karaj che ri xoqꞌoꞌl kuꞌan kebꞌ xun, jun lik xa qꞌalaj pa kachapabꞌex wi y ri jun chik xa tobꞌ pa kachapabꞌex wi, e kuꞌan riꞌ.
22Jekꞌulaꞌ riꞌ ri Dios kꞌo puqꞌabꞌ saꞌ ri karaj kuꞌan kukꞌ ri winaq. ¿Saꞌ kꞌu kaqabꞌiꞌij we ri Dios xraj kukꞌut ri royowal y ri unimal uchuqꞌabꞌ pakiwi raj makibꞌ yey na rukꞌ ta kꞌu riꞌ, e xukꞌut ri unimal ukꞌuꞌx chike ri taqal chike katzaq ri royowal pakiwiꞌ y kasach kiwach?
23Y jelaꞌ xuꞌano kꞌutubꞌal re ri unimal uchomalil. Ma xukꞌut ri kꞌaxnaꞌbꞌal ukꞌuꞌx chike ri ebꞌuchaꞌom chi uloq re kekꞌojiꞌ rukꞌ pa ri chomilaj luwar chilaꞌ chikaj.
24Chike kꞌu ri xuꞌan wi waꞌ, xebꞌusikꞌij; y riꞌoj oj jujun chike. Y waꞌ na xew ta xuꞌan kukꞌ ri e aj judiꞌabꞌ, ma xuꞌan kukꞌ ri na e ta aj judiꞌabꞌ.
25Ma jewaꞌ ri xutzꞌibꞌaj kan ri qꞌalajisanel Oseas puwi ri xubꞌiꞌij ri Dios: Chike ri na e ta nutinamit ojertan, woꞌora kambꞌiꞌij: «Riꞌix, ix nutinamit.» Y chike ri na kꞌax ta kenaꞌik, woꞌora kambꞌiꞌij: «Riꞌin kꞌax kixinnaꞌo.»
26Y chupa kꞌu ri luwar pa xbꞌiꞌx wi chike: «Riꞌix na ix ta nutinamit,» chilaꞌ kꞌu riꞌ kabꞌiꞌx na chike e ralkꞌoꞌal ri Dios kꞌaslik.
27Yey jelaꞌ ri xutzꞌibꞌaj kan ri qꞌalajisanel Isaías pakiwi raj Israel: Tobꞌ ri kikꞌiyal ri tinamit Israel kebꞌuꞌana pachaꞌ rukꞌiyal sanyebꞌ kꞌo chuchiꞌ ri mar, xa e chi jumutz ri kekolobꞌetaj chike.
28Ma ri Dios Qajawxel kuqꞌat tzij pakiwi ri tikawex che ruwachulew e chirij janipa ri ubꞌiꞌim kanoq, y kuꞌana waꞌ rukꞌ usukꞌlikil y na kamayin ta che uꞌanik xchaꞌ.
29Yey jewaꞌ xutzꞌibꞌaj kan ri qꞌalajisanel Isaías ojertan: Ri Dios Qajawxel, ri lik kꞌo uchuqꞌabꞌ puwi ronoje, we tamaji xebꞌukolobꞌej kan jumutz chike ri qatinamit che ri kamik, riꞌ kaqakꞌulumaj pachaꞌ ri kaꞌibꞌ tinamit Sodoma y Gomorra, ri xsachisax kiwach xchaꞌ.
30¿Saꞌ kꞌu riꞌ ri kaqabꞌiꞌij che ronoje waꞌ? Ma ojertan loq ri na e ta aj judiꞌabꞌ na xkitzukuj taj kebꞌuꞌana jusukꞌ chwach ri Dios; yey woꞌora ri Dios xuꞌan jusukꞌ chike ruma ri kubꞌulibꞌal kikꞌuꞌx rukꞌ.
31Noꞌj ri e aj Israel lik xkitij uqꞌij kebꞌuꞌan jusukꞌ chwach ri Dios ruma kakitaqej taq ri taqanik re ri Tzij Pixabꞌ; na rukꞌ ta kꞌu riꞌ, na xebꞌuꞌana ta jusukꞌ chwach ri Dios.
32¿Suꞌchak jewaꞌ xkikꞌulumaj? E ruma na xkubꞌiꞌ ta kikꞌuꞌx rukꞌ ri xuꞌan ri Dios chaꞌ kuꞌan jusukꞌ chike. Ma xkichꞌobꞌo e kebꞌuꞌan jusukꞌ chwach ri Dios ruma taq ri kakiꞌano. Y jekꞌulaꞌ e pachaꞌ xkichiq kibꞌ puwi ri jun Abꞌaj ri lik e kꞌo ketzaq puwiꞌ.
33Ma jewaꞌ tzꞌibꞌital kan chupa Ruchꞌaꞌtem ri Dios puwi wa Abꞌaj: Kankoj kꞌu chilaꞌ Sion jun Abꞌaj. Waꞌ lik e kꞌo taq ri kakichiq kibꞌ che; y lik e kꞌo taq ri ketzaq puwi wa nimalaj Abꞌaj. Noꞌj janipa kꞌu ri kakubꞌiꞌ kikꞌuꞌx rukꞌ, na kekꞌixbꞌesax taj ma kakikꞌul na ri koyeꞌem che Rire kachaꞌ.
