Ulom 9

1

2

3

4

5

6

7

8

9

10

11

12

13

14

15

16

¹Nakunum kumel kunum waneng yutaka! Ne Kulais em kiin dim kel yulo fein weng kale bokoyemoki kasike, yu kilele kililoliwka! Nakalem ibolow tem beem fukunin so, Sunbin-Finik eso, aso nu bongguko, atemuwete: Nem yangoki weng kale atin kuw fein weng, yu kililina!

²Ne Isalael kawtiw im dulum elote atin kuw ibolow fukunin tiaktiak keko, sakik ilum fian aluwkabi te.

³Nimtew angom? Ne nakalem nakunum kumel Isalael kawtiw alik alik im ibolow kuw fukuneko, “Ibo! Banban i Kulais elo ‘Fein!’, danginba keko, kakabiliw kawtiw kebiliw kai!”, ange ange kebi kasike. Angeko, ibolow fukuneko, bokolomeli: “Isalael kawtiw ilo dokoyemomin beem mongom ete nakalem ete Kulais em angin kelinba keko, ais dong tem elo uno yo! Uni tew tewe, Isalael kawtiw bi nem abin kulusomeliwi, Sunbin-Got e im kakabiliw kuankemin deiw be bul gewsi okileweko, ilo akalem sunsun finik so kulomin deiw ka kel koyemoka!”, ange ange keko, ibolow fukunkabi kate, beem kelomin deiw be banim te.

⁴Feinka! Sua kel akate, Sunbin-Got e Isalael kawtiw ilo akalem wiin so galmoko, ilo “Ne kanebi Sunbin-Got ayem nete te!”, angeko, kukuyemsomi, ilo kitakamin weng duyemeko, akalem kukuyemin sawa weng be bokoyemeko, akalem am yol ka kel akalem wiin fian daolew kemin kukuw kaleyemeko, bamki so keyemsomi, “Yom dulum elote fein kaneloki te!”, yangeko, alik alik eisneng be ilo fein duyemeko, ilo akalem angin keyemse te.

⁵Keyemsomelei, Isalael kawtiw biim awalik abiok kumel im mining dow im muluw Kulais akalem ete kaim dim kel fitewse te. Kulais be alik alik eisneng angom em Sunbin-Got kamokim fian kebe kasike, diwkuw diwkuw nu em wiin fian daolew kemoluwka! Feinka!

⁶Kame yu kilele ibolow fukunemoliwka! Isalael kawtiw demdem i Kulais elo “Fein!”, danginba kebiliw kate, beem mongom ete mali kawtiw i kanelom bokolomeliw: “Sunbin-Got e akalem ilo duyemse kitakamin weng be alwol keleweko, kolewse kai!”, angokoliw te! Babo! Nimtew angom? Isalael kawtiw im kunum mongom Sekow em muluwel dow bikati alik alik i Sunbin-Got em angin binba kebiliw kate, mali Isalael kawtiw ite kuw fein Sunbin-Got em angin ke alakabiliw kasike.

⁷Beemdiw, Abalakam em muluwel dow ikati alik alik i em fein angin kelinba kebiliw kate, Sunbin-Got e Abalakam elo fawtuk ayem weng mak bokolewomele: “Kom min Aisak em mining dow ite kuw kom fein angin kelokoliw te!”, dangse kale.

⁸Weng beem mongom ete kanekote: Abalakam em aul banso banso biim mining dow so dow so bite alik alik i Sunbin-Got em angin kelinba kebiliw kate, Aisak em muluwel dow keko, Sunbin-Got akalem fawtuk ayem weng keyemeko, “Iteka!”, yangse kunum waneng bite kuw fein Abalakam em angin kebiliw te.

⁹Yu ibolow fukunina! Auk um Aisak elo dukulinba kesu ding dim bakate, Sunbin-Got e em dulum elote Abalakam elo fawtuk ayem weng mak bokolewomele: “Nem angeko, dukuli ding dim bakate, ne iti teleko, atemite: Kom kalel Sala u aul kumun keko, kunum aul mak dukuko, aul beliw mak folokui, watemoki te.”, dangse kale. Dangei, Sala u fein Aisak elo dukusu kale.

¹⁰Um dukusu aul Aisak be nukalem kunum mongom kelei, em kalel Elebeka u aul kumun so keko, awang men mak dukusu kale.

¹¹Kate, aul biim auk kumuniw ka kel bisiliw ding dim bakate, aso i kukuw ken so wa so be akokow keleweko, kal kelinba kesiliw kate, beem ding dim bakate, Sunbin-Got e “Ne kaneloki!”, angeko, akalem ibolow kuw geleweko, aso ilo yetemeko, makmak elo “Aul be nem angin keloke kai!”, dangeko, ete kuw akalem wiin so galmose kale.

¹²Fein! Sunbin-Got e awang aul biim kukuw ateminba kese kate, akalem ibolow kuw geleweko, makmak ete akalem wiin so galmoko, auk ulo bokoumomele: “Emteben em kitil e fian kelei, fik be akalem ning em afak keboke te.”, wangse kale.

¹³Sunbin-Got em fut ayem be kaneko beem dulum elote bokolomele: “Aisak elo ibolow mutuk fian dulewkabi kate, em fik Iso elo ne ibolow kaim alelkabi te.”, angakabe kale.

¹⁴Kasike kame, nu nomin weng mak bokoluw e? Sunbin-Got e kiol kuw kukuw gelewinba kebe sako? Itel bate!

¹⁵Kate yu kilele ibolow fukunemoliwka! Sunbin-Got e Moses elo bokolewomele: “Nakalem ibolow kuw te. Ne nimin elo ‘Kinkin ibolow kukulewo yo!’, angi tewe, ne fein beelo kinkin ibolow kukulewoki te. Beemdiw, ne nimin elo ‘Ibolow folok kalelewo yo!’, angi tewe, ne fein beelo ibolow folok kukuw kukulewoki te. Mak so banim, nakalem ete kuw.”, dangse kale.

¹⁶Kaneko kasike nu kilele atemuwete: Kawtiw num ibolow danong danong keko, bukeko, kun kuluko, aluwbamin kokonin kekabuluw beem mongom ete Sunbin-Got e nulo “Yu nem angin te!”, nam yangoke te. Kate, e akalem kinkin ibolow kuw fukuneko, nulo akalem wiin so galmokabe kasike.

¹⁷Yu Sunbin-Got em weng Isiw aneng fian em emisik kamok fian elo bokolewse weng be ibolow fukunemoliwka! Akalem fut ayem tem be bokolomele: “Kulo maka kekemsomi, de mit da kokemomin beem mongom ete ne kulo Isiw aneng fian em emisik kamok kitil nam kekemeko, mo kokemsi te. Kokemii, aneng aneng angom biliw kasel alik alik i nem auk so kitil so be kal keko, nem wiin fian daolewokoliw kasike.”, angse kale.

¹⁸Keko beli, Sunbin-Got e mali kawtiw ilo “Kinkin ibolow kukuyemo yo!”, yange tewe, e fein ilo kinkin ibolow kukuyemoke kate, e mali kawtiw ilo “Ibolow kau keyemo yo!”, yange tewe, bakati fein kaneyemoke te.

¹⁹Beli, mali kunum waneng mak nelo bokonemomeliw: “Sunbin-Got e akalem ibolow fukunin kuw geleweko, mali kawtiw ite kuw akalem wiin so galmo koyeme tewe, kawtiw alik alik nu sen so banim kebuluw te! Nimtew angom? Nu ki keko, Sunbin-Got em fukunin be nam alwol kelewkabuluw kasike!”, nangbiliw te.

²⁰Kate, yu kilele ibolow fukunemoliwka! Kawin dim kaleem kunum waneng nu auk so keko, wiin fian so kebuluw kasike, nu ki keko, Sunbin-Got em fukunin elo diwemeko, geemokoluw sako? Itel bate! Yu fakam weng kale kilele kililina! Sunbin-Got e kunum bial on mak bakuluko, kaimin kunum mak emdiw te. Keko beli, kawtiw nu bial on beemdiw te. Kasike kame, kunum beem bial on bakuluko, kaibe ding dim bakat e, bial on be kunum beelo geelewbin weng mak bokolewomele: “Ebe! Ku geim o, belil o, galia o, on bikatetew keneminba kelew yake?”, dangeko, kaisuw kelewoke sako? Babo, on be ki keko, elo nam “Kanemoka!”, dangoke te.

²¹Feinka! On kailoke kunum be akalem ibolow kuw geleweko, on o, geim o, kanat o, galia o, ete kuw kailoke te.

²²Beemdiw, Sunbin-Got akati ki keko, akalem ibolow kuw gelewkabe te. E bokolomele: “Ne mali kawtiw biilo nem auk so kitil so be kukuyemo yo!”, ange tewe, akalem kaisuw e fongate akate kawtiw biim dulum elo fein kaim dim kuw fitewoke te. Kate, e ding feneko, tiak ding kuw kaneyeminba kesomi, “Nem kaisuw e sow ete kuw kukuyemoki te!”, ange tewe, akalem ibolow kuw gelewkabe te.

²³Gelewsomi, sua kel akate memen keyemeko, ibolow folok kukuyemeko, akalem wiin so amkoko, galmose kunum waneng ilo yetemeko, bokolomele: “Kame ne ilo bamki so keyemo yo!”, ange tewe, akati akalem ibolow fukunin kuw gelewoke te.

²⁴Kate, ibolow folok kukuyemeko, akalem wiin so galmose kunum waneng bi kante ye? Feinka! E mali Suda kawtiw ikal, mali Suda kawtiw num ibik biliw kawtiw ikal, alik alik nulo bongguko, akalem wiin so amkoko, koyemse te.

²⁵Sunbin-Got em bontem dim bakamin kunum Osea beem dulum elote bokolomele: “Isalael kawtiw im ibik biliw kawtiw i nem fein angin kelinba kebiliw kate, ne ilo gaayemeko, nem fein angin keyemoki te. Sua e, ne Isalael kawtiw im ibik biliw kawtiw ilo nem ibolow mutuk kilele kukuyeminba kekabi kate kame, kunum waneng biilo nem ibolow mutuk fian be duyemoki te.

²⁶Sua e, ne kawtiw aneng aneng angom kasel ilo bokoyemomeli: ‘Yu nem angin bate!’, yangsi kate kame, mali kawtiw mak yulo ‘Yu finik so Sunbin-Got em fein muluwel yute te!’, yangoki te.”, angse kale.

²⁷Angei, Sunbin-Got em bontem dim bakamin kunum Aisaya akal Isalael kawtiw im dulum elote gaaneko, bokolomele: “Isalael kawtiw i mongom so al keko, ok dilin fokin tew kelokoliw kate, Sunbin-Got e fong kawtiw gel kuw mali bakolu kuluko, akalem finik so bin deiw ka kel mo koyemoke te.

²⁸Nimtew angom? Sunbin-Got Kamok Fian em geeyemse weng e fongate akate kawin dim kale kel fiteweko, dem gilaloke kasike.”, angse kale.

²⁹Angeko, nanew dim ka kel fut tem kel bolomele: “Sunbin-Got e fong gel kawtiw mali mak bakolu alul koyeminba kele tewe, nu Sodom so, Gomola so abiw mutuk fian alew beemdiw banimeko, atin kuw fikiw angokoluw te.”, angse kale.

³⁰Beli, nu kame nimtew weng angokoluw e? Isalael kawtiw num ibik biliw kawtiw i kilele kun kuluko, “Nu Sunbin-Got em kiin dim e kiol kuw sen so banim kawtiw keluma!”, anginba kekabliw kate, i Kulais elo “Fein!”, dangsiliw kasike, i Sunbin-Got em kiin dim e kiol kuw sen so banim kunum waneng kebiliw te.

³¹Keko beli, Isalael kawtiw i kun kuluko, bukeko, Moses em kukuyemse sawa weng beem afak kuw kakabiliw kate, i ki keko, kukuyemin sawa weng beem deiw kilele gelewinba kekabiliw kasike, i Sunbin-Got em kiin dim e kiol kuw sen so banim kawtiw kelinba kekabiliw te.

³²Nimtew angom? I Sunbin-Got elo kilele “Fein!”, danginba kebomi, ikalem kitil ete kuw kukuyemse sawa weng be “Nu fein gelewuma!”, angeko, beem deiw kuw gelekabiliw kate, i ki keko, sawa weng be kilele gelewinba kekabiliw kasike. Feinka! I ibolow fukunomeliw: “Nu kun kuluko, Sunbin-Got em kiin dim e kiol kuw sen so banim kawtiw kebuluw kai!”, angakabiliw kate, im sawa geleweko, kakakabiliw deiw ka kel tum mak deiwkim dim kulfili belei, i elo kilele ateminba keleweko, unbomi, beem dim kel yan go keleweko, mit kuminkabiliw te. Yu kililina! Tum ateminba biliw tum be Kulais ete te.

³³Sunbin-Got em bontem dim bakamin kunum Aisaya e beem dulum elote fakam weng mak bokoko, fut tem ayem ka kel bolomele: “Yu kilele kililina! Saion abiw mutuk fian ka kel ne tum mak duku koli te, Kawtiw i tum beem dim tung angeko, mit kuminokoliw te. Kate, mali tum fian beelo “Fein!”, dangbiliw kunum waneng i im kanesiliw kukuw beem dulum elote nam inkal kuliw te.”, angse kale.