Rom 9

1

2

3

4

5

6

7

8

9

10

11

12

13

14

15

16

¹Ija Kraisna dana eunu je mele madigina. Ija qee uhuligina. Odocob Kis Gun uqa ijana cisdoc silec cofdona eunu ija qee uhuligina ec ha madena.

²Eu mele, ijana dana cajacanu ija waloc teten saen cunug ija wawi dain tena.

³Eu age ijaca golanige osol bahic. Eunu ija cotiel agenu eu mele ija odoc jiccami Krais inondocomin ititacteceb agena cudun umig fadaloum.

⁴Age Isrel sihul, Anut uqa uqana mel maden, uqa uqana fulacdoc ben aden. Anut uqa ageca bal je cehaden, uqa uqana loo je aden. Odocob age Anutnu cuha fec kobolca Anutna je hahun madecca oin.

⁵Isrel dana weledec ijanagaca matu eu age jajanagail himec. Odocob agena sihulnadec himec Krais uqa dana ibuldon. Krais uqa cunug agena ilo, uqa Anut. Ege binan sulocomun cataneiale! Mele!

⁶Ija Isrel dana cajacanu saen cunugna waloc tena qa dana cajaca Isrel sihulnadec calein eu age cunug eu age Isrel bahic qee. Eunu ija Anutna je hahun madec qee aig qolnu qee cisadegina.

⁷Eu odiha Ebrahamna sihulnadec calein eu age cunug eu age Ebraham melahul ategul asagul bahic qee. Wele Anut uqa Ebraham madon: “Hina sihulel toohi caloqagan age Aisak sihulna himec caloqagan,” don.

⁸Eu uqana gug eu odi. Mel mel aid age golanaga madec kobolna himec calegina eu age Anutna mel mel aidca bahic qee. Euqa mel mel aidca age Anutna je hahun madecna kobolna calegina eu age himec Ebraham melahul, ategul, asagul caloqagan.

⁹Ge, Anut uqa je hahun madecna eu odi madena: “Ija saen euna ceseli hugen ec wele madem, odocob saen euna Sera uqa mel manahal basigian,” ena.

¹⁰Eu odi himec qee. Rebekaha uqana mel lecis ale memela osol, eu Aisak ege jajanige.

¹¹Euqa Anut uqa uqana cisdoc himec toodona. Eunu uqa uqana dana cajaca biluqagannu uqana cisdocna himec uqadodoc dana cajaca gesiladi ehaden. Uqa danana cabinu qee cisdona. Uqadodoc dana utaadena. Eunu wele mel lecis eu ale qee cali hocna kobol meca me qeeca eu qee odolosin,

¹²saen euna uqa Rebeka madumei madon: “Matu eu milum bisalu biligian,” don.

¹³Eu odiwe Anutna jaqec je odi madena: “Ija Jekobnu nalug mem qa ija Iso sagagdom,” ena.

¹⁴Eunu ege eeta ec madecnu? Anut uqa Jekob nesili ehuden qa Iso qee nesili ehudelnu, “Anut uqa kobol ititom qee odi odon ecnu,” odi madecnufo? Qee bahic!

¹⁵Ge, uqa Moses madon: “Ija dana osonu wawi nijecebfi eu uqanu wawi qugian. Ija dana osonu wawi qocobfi eu uqanu waloc tigian,” don.

¹⁶Eunu Anut uqa dana osoosofo gesildon eu danana cisdocnaca danana cabi ocnaca eu odi qee odona. Euqa Anut uqa uqana waug qocna himec dana gesildon.

¹⁷Eu mele, Anutna jaqec jena Anut uqa Fero madon: “Ija hina dewenna eu ijana gagadic odoc dana cunug foqagannuca, odocob dana cajaca mahamaha cunugna bilegina eu age ija ijani doqagannuca odihecemin king calem,” don.

¹⁸Eunu Anut uqa osonu waug nijina eu uqanu waug qona. Odocob uqa oso waug menecnu cisdona eu waug menena.

¹⁹Euqa age eundec oso odi matigian, “Eu odifi eetanu Anut uqa danana odoc me qeenu wadacadigen ec madena? In oso uqa Anutna cisdoc toodocnu ihoc qee?” tigian.

²⁰Euqa hina cel dana hina Anutna je wadacdu madogona? Hal eu dana muden uqa madona: “Hina eetanu ija edi muditem?” dona eu odi qee nijel.

²¹Hal mudec dana uqa maha cudun osolnadec umei hal lecis mudina, oso eu hal me bahic odocob cabi me ocnu deel benna, oso eu hal gauc cabi ocnu deel cunugna. Eu odi eu cois qee aganafo?

²²Anut uqa uqana kobolkobol gagadicca egenu uqa waug qoc camasac mudecnu gale don. Ege uqana kobolkobol ceteh me bahic amca ocnu uqa wele hanoigen. Egeha uqa utagen, ege Juda sihulnadec himec qee utagel qa ege Juda dana qee eundec sihulnadec euha utagen. Eunu Anutna odoc eu odiodi odon. Uqa uqana gemag bec camasac mudecnuca, uqana gagadic odoc dana cunug fecnuca eu gale don. Eunu agenu gemag bena uqa fadaladecnu mudaden eu camuhulaadi saen cecelac fadaladecnu sumaden.

²⁵Uqaha Hoseana je hahun jaqecna odi maden: “Dana cajaca ijana qee eu age ijana dana cajaca adigen. Odocob sihul eu agenu ija nalunuga qee melem eu ija agenu nalunuga mec adigen.

²⁶Odocob cudun ono euna age maaden, ‘Age ijana dana cajaca qee,’ aden cudun euna bahic age Cebac Bilec Anut melahul adoqagan!” en.

²⁷Odocob Aisaia Isrelnu utai maden: “Isrel sihul eu lanna esic nijina odi fulusdocobfi cois Anut am nag odi himec cahahaadigian.

²⁸Eu mele, Tibud uqa uqana je gesilec eu qee mudimei mahuc bahic dana cajaca mahanadec agena ameg wadacadigian,” en.

²⁹Odocob Aisaia uqa eunu wele je hahun maden eu odi: “Tibud Gagadicca uqa egena mel mel aidca am nag odi qee culadeceb biloubmi ege fadalgoub eu odiwe uqa Sodom Gomoraca fadaladoub,” en.

³⁰Eunu ege eeta ec madecnu? Ege odi madecnu. Juda dana qee eundec age Anutna ititom kobol ocnu cabi qee melein eu age Anutna ititom kobol wele oin. Anutna ititom kobol eu wawaga meleecna oin.

³¹Euqa Isrel age Anutna ititom kobol ocnu loo je euna toodoin eu age Anutna ititom kobol qee gulucdoloin.

³²Eu eetanu? Age wawaga qee meleecebnu Anutna ititom kobol qee oloin. Eu age cabi ocna odocnudih wawaga nijen. Eunu age jaimaga meenna qeti aqeceb toni mahulein.

³³Anutna jaqec je oso eu odi madena: “Feiga! Ija Saion ono meen oso migina. Meen eu dana qeti aqeceb toni mahuluqagan. Dana age uqanu wawaga meleigian eu ija agenu majani qee teiaun,” ena.