Roma 9

1

2

3

4

5

6

7

8

9

10

11

12

13

14

15

16

¹No Kristore ŋiczi burec mi ehuc dâŋ jâmbomac mupe mananiŋ. Tiri Mârozi maŋnane batamaehame mana‐jâmbâŋkehuc ŋazape:

²No busâqoc fârine manahuc maŋnane wemo afecne fârorockeekac.

³Judaŋic âgofâc‐nane, soctofafâc‐nane hâcne, jaŋere erâ no nahac Kristore sacmaŋkonec wawahare sâcne afeckezapo.

⁴Jaŋe hâcne Israe ŋic, eme Anutuzi fuŋfuŋfâc‐ticne bacjopawec, ehuc tâpiri tatamac‐ticne jowatuwec. Erâ jaŋehec ʒâʒâfic erâ sâcmutâc dâŋ mufua‐jarewec â mai ecnehuc juniŋte hatane jowatuwec. Erâ wâc biŋedâŋ jazawec.

⁵Â mimiŋnefâc‐jeŋic jaŋe mitire fuŋqizecne jumbiŋ. Eme Kristozi ŋicsahac rohuc fuawec i jaŋere guruo fuawec. Wiac sasawa irec Wofuŋ jukac, Anutu hâcne, e mumuteŋheczi mumuteŋhec juraʒihuc juzejec sanaŋ. Jâmbomac.

⁶Wiac iŋuc fuawec irec Anuture dâŋ dodocne ewec mi muzo. Israeraonec fuambiŋ jaŋe Israe ŋic fârine ninic mi efârembiŋ.

⁷Â Abrahamte tofafâc jaŋe ɋâricfâc‐ticne fârine wâc mi efârembiŋ. Eme irec hâcne dâŋ ʒiŋuc âzâcnekicne: “Isakare ɋâricfâc jaŋe sawa gore biŋe eniŋmu.”

⁸Dâŋ irec fuŋne ʒiŋuc fokac: Sahaczi Abrahamtao fuambiŋ sâc Anuture ŋicfâc mi efârembiŋ, biŋedâŋko fuakicne jaŋe sawa Abrahamte ɋâricfâc fârine embiŋ.

⁹Biŋedâŋ kecʒiŋuc mukicne: “Jara moc tarame Sarazi motec rorâ bajuhame mocwâc warepemu.”

¹⁰Erâ i sawa mâcne, Rebekarao sâc ijaha fuawec. E mimiŋne‐nâŋec Isaka ehec juhuc motec jajahec kiwec‐jofawec.

¹¹Eme motec jahe mi fuahuc wiac biaŋne me sâqocne mi ehapire Anutuzi jahere ʒiŋuc âzâcnewec: “Hahaczi ɋare kiŋaŋ qazejec.”

¹²Ine Anutu mumupaŋ‐ticne sanaŋkeocte manasuhuc motec juju‐jekicte mâcne, e jahacne maŋte ro bârâwiŋ ejactehuc dâŋ i muwec.

¹³Irec dâŋ moc ʒiŋuc hâcne fokac: “No Jakobore enarewec â Esaure takicnuwec.”

¹⁴Eme irec weniŋuc muzo? Anutu erao guriŋ bapa hehesicne moc fokac me? I aric kereŋne.

¹⁵E Mose dâŋ ʒiŋuc âzâcnewec: “No ŋic moc akickezo murâ akickepemu â ŋic moc buuruc ecnezo murâ ecnepemu.”

¹⁶Irec ŋicmaŋte me ŋic eebapare mi muzo, Anutu buuruc‐ticnere sawa muzo.

¹⁷Anutuzi Farao dâŋ âzâcnewec, irec miti papiao ʒiŋuc qâreŋkekicne: “No gorao tâpiri‐nane bataniŋkepe ʒâŋe biŋe‐nane mâreŋ sâc raocte muhuc âkendâŋgupo hâcne.”

¹⁸Eme irec Anuture ʒiŋuc manazo: E ŋic moc akickezo murâ akickeocmu â moc e maŋne bâzickezo murâ bâzickeocmu.

¹⁹Eme ŋifecne ʒiŋuc mecne nazacmu: “Anutu e ŋic nâŋâcne wemocte maname sâqoreekac? E wiac moc ezo mume ŋiczi aka hehecne i mi fokac.”

²⁰Ŋic go wemogere Anuture dâŋ mucmu? Kuʒizi wemocko kuzi bapa ʒiŋuc âzâcneocmu: “Go wemocte sâc iŋucne bacnumeŋ?”

²¹Me kuʒi bapa e afe izia kuʒi gâcne ŋic jaŋere biŋe â gâcne bec qâto jaŋere biŋe bame sâqoreocmu me?

²²Eme Anutu e kuʒi kimbeŋ‐ticnere biŋe, ʒâhecko qanʒaŋ‐joparâ behec‐jopaocte maname fokac, kuʒi i jaŋerao ʒika bâfuahuc tâpiri‐ticne bataniŋkeocte sifu bumâteŋ‐ticnere erâ jâbu ejare warehuc juekac.

²³Erâ ŋifecne kuʒi buuruc‐ticnere biŋe, juku eri tatamac‐ticnao biric‐jopaocte maname fokac, kuʒi i jaŋerao eri aŋac mâriri hejareocte bacjopa juekac.

²⁴Eme Judaŋic sawa mâcne, qâpuc mâmâc kuʒi buuruc‐ticnere biŋe enaŋte hefârec‐nâpoekac.

²⁵Eme irec porofete Hoseare papiao dâŋticne ʒiŋuc fokac: “Ŋicguru mi rucjopapo jaŋe ‘nore ŋicfâc’ mucjopapemu, â biŋemâc juwec e ʒâŋene ‘joroc‐nane’ mucnepemu.”

²⁶“Eme ‘ŋoŋe nore ŋicfâc aricne’ ŋazakicne, mâreŋ ira wâc ʒâŋe‐jeŋic ‘Anutu jujunere naru motecfâc’ fuaocmu.”

²⁷Erâ Jesajazi hahaŋne bahuc Israe ŋic jaŋere ʒiŋuc muwec wâc: “Israe qâricfâcne jaŋe hâwecmecko moŋgeŋ fokac irec sâc bâfuazo murâ bâfuaniŋmu, eme sifu uuc ʒanʒaŋne sawazi biaŋkeniŋmu.”

²⁸Wofuŋ e mâreŋko dâŋticnere fârine ɋeŋnea bâfuame fideteŋ efâreocmu.

²⁹Jesajazi findaŋdâŋ moc ʒiŋuc hâcne muwec: “Sambâŋ momori jaŋere Wofuŋ e ŋicukic moc mi getâc‐jopa‐nâreme muzac, ine Sodom jaŋere sâc bâfuanʒapeŋ, â Gomora jaŋe iŋucne enʒapeŋ.”

³⁰Eme ʒi weniŋuc muzo? Kecʒiŋuc: Ŋic qâpuc tiŋke biaŋ eniŋte mi fotariembiŋzi tiŋke biaŋ embiŋ, mamanasiŋte tiŋke biaŋ embiŋ hâcne.

³¹Â Israe ŋic sâcmutâc dâŋ reŋkehuc tiŋke biaŋ eniŋte fotariembiŋzi sâcmutâc dâŋ bâmâmâckembiŋ.

³²Wemocte? Ʒiŋucte: Jaŋe mamanasiŋte mâcne, mâc juju bapa‐jeŋicte tiŋke biaŋ eniŋte mumbiŋ. Ehuc hatao qânâ fowec ira kike‐jeŋic hezumbiŋ.

³³Kecʒiŋuc hâcne qâreŋkekicne fokac: “Manakic, no Zioŋ haeo qânâ moc râekopac ira kike‐jeŋic hepirickeniŋmu, â buse ŋeŋene moc hekopac ira heariweniŋmu. Eme moczi e manasiŋkeocmu ine mi qurutuaocmu.”