Romanos 9

1

2

3

4

5

6

7

8

9

10

11

12

13

14

15

16

¹Tiira tootzaj u Cristo aas inujul qꞌu kam savaleꞌ tzaꞌ. Yitꞌ txubꞌaꞌl koj tan, u Tioxhla Espiiritu nioksan tunnachbꞌal aas inujul.

²Tiira nuntxumun tiꞌ qꞌu vitzꞌin vatzik qꞌuꞌl maꞌl unkajal tuchꞌ. Bꞌenamen atil maꞌl txumuꞌm tu vaanima tiꞌ qꞌu vetz aa tenamil. Tan yeꞌ ninima u Jesuus. Aal tek bꞌaꞌn tzꞌejel koj tzii viꞌ, xaansamalkojelin kꞌatz u Cristo, taꞌxhtzii samotxok kꞌatz u Jesuus. Tan tiiꞌin tiꞌ.

⁴Aꞌ nival qꞌul ituꞌxh ixalam u Israeel. Mamaj bꞌaꞌnil kꞌulel taqꞌo. Tan aal u Tioxh aqꞌon bꞌens ikꞌaol imeꞌal. Utz atin u Tioxh tixoꞌl tuchꞌ vitechalil. Iꞌan unjolol nukꞌuꞌm tuchꞌ. Ech aqꞌax qꞌu mantaar te tikuenta u Moisees. Aꞌ nitaleꞌ aas kaniꞌch inimal toksal u Tioxh siꞌaneꞌ. Utz tal u Tioxh te aas sikꞌul tereꞌn mamaj bꞌaꞌnil oj sitzojpi vaꞌl nital u nukꞌuꞌm.

⁵Aatz qꞌu aanima tziꞌ, jolol ituꞌxh ixalam qꞌu techalla chaj kukꞌuy kumam. Aꞌ ul itzꞌpojku viTxaaom u Tioxh tixoꞌl tuchꞌ ichiꞌl. Ayaꞌ u Tioxh vaꞌl aꞌ viꞌ qꞌu kam kajayil. Utz tetz u tokebꞌal qꞌii bꞌenamen. Aꞌi.

⁶Loqꞌ tiꞌ koj aas aꞌ niyolpu u yolbꞌal Tioxh, kꞌuxh yeꞌ ninima u Jesuus qꞌu Israeel. Pek tiꞌ tan, kajay koj qꞌul ituꞌxh ixalam u Israeel jolol itenam Tioxh.

⁷Utz kajay koj qꞌuꞌl ituꞌxh ixalam u Abrahaam tu vichiꞌl iqꞌomal vitxumbꞌal taqꞌo kꞌatz Tioxh. Tan tal u Tioxh te ech tzaꞌ: —Taꞌxh avii mam txaael qꞌuꞌl seꞌel kꞌatz u Isaac.— Texh te.

⁸Aꞌ tok u yol tziꞌ aas yitꞌ kajay koj qꞌul ituꞌxh ixalam u Abrahaam jolol ikꞌaol imeꞌal Tioxh. Pek taꞌxhtuꞌ qꞌuꞌl ituꞌxh ixalam u Isaac, qꞌuꞌl iꞌan u nukꞌuꞌm u Tioxh tiꞌ sabꞌens ikꞌaol imeꞌal.

⁹Ech vaꞌl tal u Tioxh tzaꞌ: —Sunbꞌan untxumbꞌal tiꞌ u Sara tu u tiempo tzaꞌ utz, saꞌatin maꞌl tal titzꞌin, xiak.— Texhtuꞌ.

¹⁰Utz echat pajeꞌ u Rebeca. Atin titzꞌin, xuꞌm; maꞌl koꞌn itat sikaꞌbꞌil. Ayaꞌ u Isaac u kukꞌuy kumam.

¹¹Utz kꞌuxh yeꞌsajich titzꞌpu qꞌu talaj nitxaꞌ tziꞌ, yeꞌsajich tootzajit ibꞌanax u bꞌaꞌn u yeꞌ bꞌaꞌn, tal u Tioxh tu u Rebeca ech tzaꞌ: —Aatz u atzika, aal soꞌok jaqꞌ imantaar u tzaꞌqꞌa.— Texh te. Tiira titxumbꞌal u Tioxh elka aas abꞌil sabꞌanon u qꞌesalail te. Ech vatzsaj niꞌelka aas yitꞌ tiꞌ koj vibꞌanon u aanima niꞌenku u Tioxh tu vitxaaoneꞌ, pek tiira te niꞌelka abꞌiste nitxaaeꞌ.

¹³Ech pajeꞌ u yol vaꞌl tzꞌibꞌamalka nital ech tzaꞌ: —Tiiꞌin tiꞌ u Jacoob, pek yuꞌnsaꞌ u Esauu.— Chia.

¹⁴Ech ¿kam bꞌoj saqal tiꞌ u kam tziꞌ? ¿Tiꞌ tzik aas yitꞌ ijikomal koj niꞌan qꞌu kam u Tioxh? Yitꞌ aꞌ koj.

¹⁵Tan tal u Tioxh tu u Moisees ech tzaꞌ: —In koꞌxh liꞌilon abꞌil unsaꞌ suntxum iatz. Utz in koꞌxh liꞌilon abꞌil unsaꞌ sunlocheꞌ.— Texhtuꞌ.

¹⁶Ech tokeꞌ yitꞌ aꞌ koj nitxaa u Tioxh qꞌuꞌl niꞌxhtachva satxaali; nikoꞌxh qꞌuꞌl vaꞌl telaꞌ tok tiꞌ ibꞌanax u bꞌaꞌnil. Pek tu u Tioxh niꞌelka abꞌil sitxum iatz.

¹⁷Tan echaꞌ vaꞌl tal u Tioxh tu viYolbꞌal tiꞌ u faraoon ech tzaꞌ: —Vetvoksaꞌaxh ijlenalil tan, aꞌ unsaꞌ aas sunkꞌuch saiꞌ qꞌu mamaj kam nunbꞌaneꞌ. Ech soꞌootzajil vunbꞌii tu kajay u vatz amlika txꞌavaꞌ.— Texh te.

¹⁸Ech aatz u Tioxh, nitxum iatz abꞌil isaꞌ sitxum iatz. Utz nitiibꞌixsa taanima abꞌil isaꞌ sitiibꞌixsa taanima.

¹⁹Utz kamal setal cheel: —¿Kantuꞌ nibꞌensa aa paav qꞌu aanima u Tioxh uncheeꞌ? ¿Oj taꞌxh nipaal tetz vitxumbꞌal?— Kamal chajex.

²⁰Loqꞌ abꞌitaj etileꞌ. Yeꞌxhkam etijleꞌm aas sakoꞌxhetal kam tiꞌ u Tioxh. Tan echaꞌ maꞌj tzꞌaj, ¿tzꞌoj tzik sakoꞌxhichok ixeꞌt kꞌatz u tzꞌajol tetz? Satal te ech tzaꞌ: —¿Kantuꞌ ech muntzꞌajax vetaꞌan tzaꞌ?— Chaj koj.

²¹Tan atil tiqꞌabꞌ u tzꞌajol kam isaꞌ siꞌan tu u chaxkabꞌ. Atil tiqꞌabꞌ aas siꞌan maꞌj tzꞌaj, bꞌaꞌnla kam sakuꞌ tuul. Utz siꞌan vaꞌtioj aas tzuꞌkin kam sakuꞌ tuul.

²²Echat u Tioxh tan, ikꞌuch vikꞌaꞌnal tuchꞌ u mam iyakꞌil tiꞌ u onkonil. Loqꞌ bꞌaxa atin ipaciensia tiꞌ qꞌu aa paavla chaj aanima qꞌuꞌl nojchit nichikꞌuloꞌk tiꞌ aas sikꞌul choobꞌal paav. Yitꞌ yakich koꞌnkoxh ikꞌul u choobꞌal paav taqꞌo.

²³Tan aatz u Tioxh, ichok txumbꞌal tiꞌ ikꞌuchax u mam techalil atil kꞌatza. Aꞌ ikꞌuchvu tiꞌ qꞌu aanima itxum iatz qꞌuꞌl itzꞌamal nal taqꞌo, qꞌuꞌl jolol echaꞌ tzꞌaj bꞌaꞌnla chaj kam nikuꞌ tuul.

²⁴Ech qꞌu aanima vetisikꞌle. Ayaꞌ oꞌ, oꞌ Israeel. Utz yitꞌ taꞌn koj, pek antu qꞌu puera aanima.

²⁵Echaꞌ nital tu u Oseas aas: —Saꞌnalvaqꞌ bꞌens untenam qꞌuꞌl kꞌuxh yitꞌ untenamich koj. Utz saꞌnalunbꞌan tiiꞌin tiꞌ vuntenam, vaꞌl echaꞌ unkꞌulel vaꞌl kꞌuxh yitꞌ tiichkojin tiꞌ bꞌanel.— Chia.

²⁶Utz tal paj tu u Oseas aas: —Yitꞌ ex koj untenam.— Texh tiꞌ. Anchit saꞌalaxku te aas: —Ex ikꞌaol imeꞌal u itzꞌlich Tioxh.— Chaj.

²⁷Utz nital u Isaias tiꞌ qꞌu Israeel ech tzaꞌ majte: —Kꞌuxh yeꞌ achebꞌe ixaan qꞌu Israeel siꞌaneꞌ, echaꞌ tatin sanaabꞌ tziꞌ mar, taꞌxh sachitpi unjolol qꞌuꞌl txaael.

²⁸Tan tijikomal chit sataqꞌuꞌl vikꞌaꞌnal u Tioxh xoꞌl qꞌu aanima tu u vatz amlika txꞌavaꞌ. Utz saꞌtexhuchi.— Chia.

²⁹Echaꞌ vaꞌl ibꞌaxabꞌsa talax u Isaias: —Yeꞌt koj itxaaka tereꞌn kutuꞌxh kuxalam u Tioxh, u Tioxh viBꞌaal qꞌu txijtxubꞌal tu amlika tziꞌ, bꞌoono kusotz koj; echaꞌ bꞌanax tu u tenam Sodoma. Utz, bꞌoono kuveet koj echaꞌ u Gomorra.— Chia.

³⁰Ech ¿kam saqal tiꞌ u kam tziꞌ? Tan aal tuchꞌ koꞌxhtuꞌ vetkꞌujeꞌ ikꞌuꞌl qꞌu puera aanima tiꞌ u Tioxh, bꞌenyu bꞌaꞌn vatz Tioxh, kꞌuxh aal yeꞌ nichtitzꞌa ibꞌanax vijikomal.

³¹Pek aal yitꞌeꞌch koj qꞌu Israeel. Tan kꞌuxh vaꞌl chit taqꞌtu yakꞌil tiꞌ itzojpil u oꞌtla mantaar tiꞌ ibꞌen jikom vatz Tioxh, aal yeꞌn aqꞌax bꞌens jikom vatz Tioxh.

³²¿Kantuꞌ yeꞌt aqꞌax bꞌen jikom? Tiꞌ tan, yeꞌt kꞌujeꞌ ikꞌuꞌl tiꞌ u Tioxh aas sakuyax qꞌul ipaav. Pek aꞌ nimotxtitzꞌa aas sabꞌens jikom vatz Tioxh tiꞌ ibꞌanax qꞌuꞌl nital u oꞌtla mantaar. Ech aatz tu vaꞌl nimotxiꞌaneꞌ tziꞌ, echaꞌ tel tiꞌ sivan oksamal tibꞌey.

³³Echaꞌ vaꞌl nital u Yolbꞌal Tioxh ech tzaꞌ: —At noj bꞌenku sete tan, savoksa maꞌl u Sivan tu Sioon tetz olqꞌichil. Maꞌl Sivan aas saolqꞌeꞌl aanima tiꞌ utz, sakuꞌi. Pek abꞌil sakꞌujeꞌ ikꞌuꞌl tiꞌ, saꞌkojchꞌixvixsali.— Chia.