Rom 9

1

2

3

4

5

6

7

8

9

10

11

12

13

14

15

16

¹Ki kirpei punkom, ki kempetei kolo olo, wusoli ki lite Krais. Riri Teingi lunkiki le le leilaiki onom piti kirpei il pepei, le ki kretai ki kempetei kolo olo.

²Ki kirpei punkom kolpepei, ki olo onom onetei le wem oli oli ki onom moinginetei kasiepe mete peiki piti mepi teluwi alpe niliye.

³Pe potei pepe so ki onpositei piti ma kaniepe. Le ki onposi kirpolo ma Ma Ili waiki ki kutei moingi lelpe, le le ma kare leiteiki tanio Krais, le pe olo.

⁴Pe mete wuso Ma Ili pele keiniepe pepe le le laptei fale pire eple pele, le le kosape lire singe lipi pele. Le topwepe il lapiri piti ma kaniepe, le le watepe il lipi piti pesiepe re pingiepe. Le kosape tisi tuwopou piti rautuwo Ma Ili, le Ma Ili topwepe il teingipe lapiri liripe.

⁵Ma Ili linu topwepe il lapiri lire manre pelpe piti pingowo tisi liti pulpowo, le Krais re, wem le fale metine wape, le fale lile alpe lelpe. Ku yeflipiye ma wem oli oli meilala nange lite Ma Ili wuso luntoluwepe men nange pepe. Punkomtei.

⁶Ki kirpei kolo il wuso Ma Ili linu topwepe lapiri pepe, pe olo kere yaupe kolo olo, wusoli mete pite Israel pepe, Ma Ili keiniepe pe yeflipiye kolo olo.

⁷Lo eple palye pite Abraham pepe, pe yeflipiye ma ku minape mirpolo pe eple pele, olo. Wusoli Ma Ili lirpowo Abraham lolpepei, “Eple palye pite Aisak loteteiye ma pinaye pirpolo ye yaitei lelpe.”

⁸Il pal pato polpepei eple wuru pite Abraham pepe, Ma Ili keiniepe laptei lotei kolo olo. Wolo eple wuso Ma Ili topwepe il lapiri lire Abraham piti ma watowo pepe, eple fei pepe so Ma Ili laptei piti ma pilowo Abraham tulum le nemple yaupe kolo.

⁹Wusoli Ma Ili topwepe il lapiri lirpei lolpepei, “Wem wuso ki keinio lepe wala lato, wem fei lepe, ki ma nou kau le Sara ma nila ninge tulei.”

¹⁰Le fei pepei poteteiye kolo olo. Rebeka eple winge tene tepe, te yaitei lelnge niliye, mani louku Aisak.

¹¹Wolo Ma Ili onom pele linu onposiepe fei piti ma keinio ninge niliye. Ma Ili lirpene Rebeka lolpepei, “Line ma lesio towa lite winke.” Ma Ili linu lirpei il pepei le Rebeka nilange eple winge tepe ningi, wem te rounge wala tironom tire menmen teingipe le menmen olpe. So Ma Ili linu keinio niliye lelnge le le linawo. Te rounge tesio towa men kolo olo, wolo Ma Ili onom pele lotei, le linawo niliye lelnge.

¹³Min watafei il piti paitei yousi, pe pirpei pepe, pe pirpei polo, “Ki kani onom kantowo Jekop, wolo ki onom pesi Iso.”

¹⁴Le ku ma mirpei molomen? Ku ma mirpei molo Ma Ili olo lingiepe loporo kolo lom? Olotei.

¹⁵Wusoli Ma Ili lirpowo Moses lolpepei, “Wuso ki ma onom manowo metine nele, ki ma onom manowo. Le wuso ki ma onom one kasio metine nele, ki ma onom one kasio.”

¹⁶So Ma Ili onom manowo metine wusoli metine lepe le lotei onposi lo le lesio towa menele, olo, Ma Ili lotei onom pele, le onom manowo metine.

¹⁷Il wuso Ma Ili lirpowo Fero le pe paptei paitei yousi pepe, pe pirpei polo, “Il pal pepei so ki keiteiye fale ire metine ili piti untoluwepe mete le ki kolpepe kireye piti ma kosape mete kire singe peiki, le singe peiye olo kumputei, le ye ma weisipe il peiki, wolo olo ki singe, le ki waiye moingi lipi pepe, le mete piti tef ili yefliye, pe ma pretawo nange leiki.”

¹⁸Min polpepei so metine minele wuso Ma Ili onom manowo lepe, le ma onom manowo. Le metine minele wuso Ma Ili kani onom nanio lepe, le ma lolpepe liri metine fei lepe.

¹⁹Le nele leise ma leiteiki lolpepei, “Wuso Ma Ili lingiepe fei lolpepe, piti men ma le lamtuwo metine lire il olpe pele? le minele miso weisine onom pite Ma Ili lo olo?”

²⁰Wolo ye metine yawi lepe le ye onposi irpolo ye metine ili piti ma nou irpowo Ma Ili lom? Mili, le miso leletei metine piti lesio lepe, leletei lirpolo, “Piti men ye esiki fei olpepei?” le miso leletei lolpepe lo olo?

²¹Metine piti lesiepe minki pepe, le kotuwo tef alpe niliye wolo le miso lesienge minki twinges. Le onom pele, le ma lesio mili nele teingi piti ma lire laite mole lo men nange pepe, le mili nele lepe, le ma lesio lele piti liri lapli oweli.

²²Ku mete re Ma Ili lolpepe lirouku ku watafei metine piti lesiepe minki pepe. Ma Ili onom pele, le leitouku ku mete ilepe piti le ma onom manouku watafei mili teingi wuso metine lele lesio piti ma lire laite mole lo men nange pepe. Le Ma Ili onom pele le leitouku ku mete ilepe piti le ma wauku moingi wem le onom kotu lirouku, watafei mili yawi wuso metine lele lesio piti liri lapli oweli pepe. Mete wuso Ma Ili loporipe piti ma watepe moingi wem le onom kotu liripe pepe, Ma Ili wala lolpepe liripe kolo olo. Le lanri onom pele le le frou watepe moingi kolo olo wusoli le onposi piti ma kosape lire wai lele piti wem le onom kotu, le ma lolomen liripe, le le onposi piti pe ma pretape singe pele. Le ku wuso Ma Ili loporouku piti le ma onom manouku pepe, le onposi piti ma kosauku lire menmen teingipetei pele wusoli le linu onposi piti ma wauku menmen fei pepe.

²⁴Wusoli ku pepe so le linauku pepe, le linape piti alpe lite Israel poteteiye kolo olo, ku piti alpe nemple re, Ma Ili linauku.

²⁵Ma Ili lirpei il pepei le pe paptei paitei yousi piti Hosea, Ma Ili lirpei lolo, “Mete wuso peiki kolo pepe ki ma kinape kirpolo, ‘Ise mete peiki.’ Mete pite uf tef nele wuso ki kani onom kantepe kolo pepe, ki ma kinape kirpolo, ‘Pe mete peiki piti ki kani onom kantepetei.’

²⁶Le tulum wuso ki kirpepe kirpolo, ‘Ise olo mete peiki kolo olo,’ tulum fei lepe ki ma kinape kirpolo pe eple pite Ma Ili piti ratei lingi wem wem.”

²⁷Le metine nimou Aisaia lirpei liripe mete pite Israel lolpepei, “Wuso mete pite Israel ma fale wurutei watafei telmane lite peryai mingo, wolo yaipiyeye pelpe miso Ma Ili kaniepe pratei. Wusoli Ma Ili ma frou kapi il laptei liripe mete pite tef.”

²⁹Min watafei il wuso Aisaia linu lirpei pepe, lirpei lolo, “Wuso Ma Ili Singetei le lusauku lope eple palye ilepe kolo olo, ku ma ma melengi watafei uf Sodom, le ku ma ma melengi watafei uf Gomora.”

³⁰Le ku ma mirpei il men? Ku mirpei molo, mete pite alpe nemple pepe, pe pinta tisi liti ma peite potei fale teingipe tuwopou pire Ma Ili kolo olo, wolo Ma Ili laptei fale teingipe tuwopou piri le lotei wusoli pe pulpowo.

³¹Wolo mete pite Israel wuso Ma Ili pele keiniepe pepe, pe pintape il lipi piti ma kaniepe fale teingipe tuwopou pire Ma Ili wolo olo, pe perengape kolo olo.

³²Le pe polomen pe fale teingipe tuwopou kolo pepe? Pe fale teingipe tuwopou kolo wusoli pe pingiepe il lipi piti pesiepe towa, le pe pingiepe piti pulpowo Ma Ili kolo olo. Pe nautesi erau le pe pualo olpetei.

³³Min watafei il piti paitei yousi pepe pe pirpei polo, “Yingitei yoporo, ki Ma Ili, ki kaltei erau nele ratei le mete ma nautesi le pe ma pualo. Wolo mete wuso pulpowo pepe, pe ma enke olpe kolo olo wusoli ki miso kaniepe.”