Lefii 9:10-24

¹⁰Kɛlɛnɑ ɩ́ nyɑɣɑsɩ tǝ tɔɔ kɛ́ kpǝntɛ nim cɔlɔ nim cɔlɔ. Nɑ timpee nɑ hɔɔlɛ, ɩsɩɩ Tɑcɑɑ tʋɣʋ Moisi tɔ.

¹¹Pǝ yelɑ nɑntʋ nɑ tɔnʋɣʋ, ɩlɛnɑ pɑ́ lɩɩnɑ tǝsikile wɑɑlɩ nɑ pɑ́ nyɑɣɑsɩ kɔkɔ.

¹²Ḿpʋ́ɣʋ́ Alɔŋ lɛntɑ heu ɑpɑlʋ nyǝŋ wei kɔkɔ lusiɣi ɩ tǝnɑ tɔ. Ɩlɛnɑ ɩ pǝyɑlɑɑ cɛlɛ-ɩ kpǝntɛ cɑlǝm nɑ ɩ́ ŋmɩɩsɩ-wǝɣɩ kɔtɑɣɑ tǝlɑtɛ kɔŋkɔmǝŋ tɑɑ.

¹³Nɑ pɑ́ cɛlɛ-ɩ tɔtɔɣɔ tǝ nyʋɣʋ nɑ tǝ nɑntʋ nɑ pɑ́ sɛtɑ-tǝɣɩ tilimɑ, nɑ ɩ́ nyɑɣɑsɩ-tǝɣɩ Ɩsɔ kɔtɑɣɑ tǝlɑtɛ tɔɔ.

¹⁴Ɩlɛnɑ ɩ́ nyɑɑlɩ pǝ tɑɑ lotu nɑ nɔŋkpɑɑsɩ nɑ ɩ́ nyɑɣɑsɩ-tǝɣɩ nɑntʋ lɛntɩ tɔɔ.

¹⁵Pǝ wɑɑlɩ kɛ́ Alɔŋ lɑpɑ Tɑcɑɑ kɛ yǝlɑɑ kɔtɑsɩ. Ɩ kpɑɣɑ pǝŋtʋlʋɣʋ ŋku yǝlɑɑ kɑ kɔnɑ pɑ ɩsɑɣɑtʋ hɩɩsʋɣʋ tɔɔ tɔ. Ɩlɛnɑ ɩ́ lɛntɩ-kʋ, nɑ ɩ́ lɑ́-kʋɣʋ kɔtɑɣɑ ɩsɩɩ ɩ kɑ lɑpʋ nɑʋle tɔ.

¹⁶Ḿpʋ́ɣʋ́ ɩ lɑpɑ kpǝnɑ nɑɑlɛ ɩnǝɣɩ kɔtɑɣɑ ŋkɑ kɔkɔ lusɑ kɑ tǝnɑ tɔ, ɩsɩɩ pɑ sɩɩʋ tɔ.

¹⁷Ɩlɛnɑ ɩ́ ponɑ tɔɣɔnɑɣɑ kʋhɑʋ, nɑ ɩ́ cosi ŋkute nɑ ɩ́ nyɑɣɑsɩ-tɛɣɛ kɔtɑɣɑ tǝlɑtɛ tɔɔ, nɑ ɩ́ kpɛnnɑ pɑɑ kʋyɑkʋ ŋku kʋ kɔtɑɣɑ ŋkɑ kɔkɔ nyɑɣɑ kɑ tǝnɑ tɔ.

¹⁸Ḿpʋ́ɣʋ́ ɩ lɛntɑ nɑʋ nɑ heu ɑpɑlʋ wei yǝlɑɑ kɑ kɔnɑɑ sɩ pɑ lɑkɩ nɔɣɔ kʋlʋmɑɣɑ kpɛntʋɣʋ kɔtɑɣɑ tɔ. Ɩlɛnɑ ɩ pǝyɑlɑɑ cɛlɛ-ɩ kpǝnɑ ɑnɩ ɑ cɑlǝm nɑ ɩ́ ŋmɩɩsɩ Ɩsɔ kɔtɑɣɑ tǝlɑtɛ kɔŋkɔmǝŋ tɔɔ.

¹⁹Nɑ pɑ́ cɛlɛ-ɩ tɔtɔɣɔ nɑʋ ɑpɑlʋ nyǝŋ nɑntʋ nim nyǝntʋ, nɑ heu ɑpɑlʋ nyǝŋ sukɑ, nɑ pǝ tɑɑ lotu tɔɔ nim nɑ timpee nɑ hɔɔlɛ.

²⁰Ɩlɛnɑ ɩ́ tǝnɩ nim cɔlɔ nim cɔlɔ nɑntʋnɑɑ mpɛɣɛ kpǝnɑ ɑnɩ ɑ nɑɑlɛ ɑ lɑŋɑ tɔɔ. Ɩlɛnɑ Alɔŋ nyɑɣɑsɩ nɑntʋ nim nyǝntʋ ntǝɣɩ kɔkɔ kɛ kɔtɑɣɑ tǝlɑtɛ tɔɔ.

²¹Nɑ ɩ́ hɑ Tɑcɑɑ kɛ lɑŋɑ ɑnɩ nɑ ntɔɣɔŋ yule kɛ Ɩsɔ kɔtɑɣɑ tǝlɑtɛ kiŋ kɛ teitei ɩsɩɩ Moisi kɑ kɛɛsʋɣʋ-ɩ tɔ.

²²Wɑɑtʋ wei Alɔŋ tɛmɑ ɩsɑɣɑtʋ hɩɩsʋɣʋ kɔtɑsɩ nɑ nsi kɔkɔ lusɑ sɩ tǝnɑ tɔ nɑ nɔɣɔ kʋlʋmɑɣɑ kpɛntʋɣʋ nyǝŋsɩ kɛ lɑpʋ, ɩlɛnɑ ɩ́ kpɑɑsɩ ɩ niŋ nɑ yǝlɑɑ tɔɔ nɑ ɩ́ tǝŋsɩ-wɛɣɛ nɔɣɔ kʋpɑŋkɑ. Ɩlɛnɑ ɩ́ lɩɩ Ɩsɔ kɔtɑɣɑ tǝlɑtɛ tɔɔ nɑ ɩ́ tii.

²³Ḿpʋ́ɣʋ́ Moisi nɑ Alɔŋ pɑ sʋʋʋ tǝsulle cokǝle tɑɑ. Wɑɑtʋ wei pɑ lɩɩwɑ, ɩlɛnɑ pɑ́ tǝŋsɩ yǝlɑɑ kɛ nɔɔsɩ kʋpɑŋsɩ. Ɩlɛnɑ Tɑcɑɑ teeli nɑ yǝlɑɑ tǝnɑ hɛkʋ.

²⁴Tǝnɑɣɑ kɔkɔ kʋlɑɑ nɑ kɑ́ nyɑɣɑ kɔtɑɣɑ ŋkɑ kɔkɔ lusɑ kɑ tǝnɑ tɔ, nɑ nɑntʋ nim nyǝntʋ. Yǝlɑɑ tǝnɑ nɑ́ mpʋ, ɩlɛnɑ pɑ́ yɑɣɑ lɑŋhʋlʋmlɛ kɑkiisɑsɩ nɑ pɑ́ hoti pɑ ɩsɛntɔɔ kɛ́ ɑtɛ.