Lefii 7:24-36

²⁴Kpǝntɛ kʋsǝpǝlɛ, yɑɑ nte pǝ kpɑwɑ nɑ pǝ cǝlɩ tɔ, tǝ nim fɛɩ tɔɣɔʋ. Amɑ ɩ́ pǝsǝɣɩ nɑ ɩ́ lɑnɑ-wǝɣɩ pɑɑ mpi.

²⁵Ye nɔɣɔlʋ tɔɣɔ tɔlɑ nnɑ pɑ lɑkɩ Tɑcɑɑ kɛ kɔtɑɣɑ ŋkɑ kɔkɔ lusɑɑ tɔ kɑ nɑntʋ cǝkɑ nim nyǝŋkɑ, pǝ wɛɛ sɩ pɑ́ lǝsɩ-ɩ Ɩsɛɣɛlɩ kpekǝle tɑɑ kɛ́.

²⁶Mpʋ tɔtɔɣɔ pɑɑ timpiɣi ɩ́ kɑ́ cɑɣɑ, pǝ fɛɩ sɩ ɩ́ tɔɣɔ sumɑɣɑ yɑɑ wontuɣu nɑkʋlɩ kʋ cɑlǝm.

²⁷Ye wei ɩ tɔɣɔ cɑlǝm pǝ wɛɛ sɩ pɑ́ lǝsɩ-ɩ Ɩsɛɣɛlɩ kpekǝle tɑɑ kɛ́.

²⁸Ḿpʋ́ɣʋ́ Tɑcɑɑ tɔmɑ Moisi sɩ:

²⁹Tɛlǝsɩ Ɩsɛɣɛlɩ nyǝ́mɑ kɛ kʋsǝsɩɩtʋnɑɑ pɑnɛ sɩ: Ye yʋlʋ lɑpɑ nɔɣɔ kʋlʋmɑɣɑ kpɛntʋɣʋ kɔtɑɣɑ, pǝ wɛɛ sɩ, ɩ́ lǝsɩ Tɑcɑɑ pɑɑ tete kɛ́, nɑ ɩ́ cɛlɛ-ɩ.

³⁰Ɩ mɑɣɑmɑɣɑ ɩ niŋ kɑ́ tɔkǝnɑ nɑ ɩ́ ponɑ Tɑcɑɑ kɛ nɑntʋ nim cɔlɔ nim cɔlɔ, nɑ lɑŋlɛ sɩ pɑ́ nyɑɣɑsɩ kɔkɔ. Ɩlɛnɑ ɩ́ hɑ lɑŋlɛ ntɛɣɛ Tɑcɑɑ kɛ Ɩsɔ kɔtɑɣɑ tǝlɑtɛ kiŋ.

³¹Alɔŋ nɑ ɩ pǝyɑlɑɑ pɑ tǝtɔɣɔlɛ ntɛ́. Ɩlɛnɑ kɔtʋlʋ nyɑɣɑsɩ nɑntʋ nim nyǝntʋ kɛ kɔtɑɣɑ tǝlɑtɛ tɔɔ.

³²Pǝ wɛɛ sɩ pɑ́ lǝsɩ nɔɣɔ kʋlʋmɑɣɑ kpɛntʋɣʋ kɔtɑɣɑ yule ntɔɣɔŋ nyǝntɛ nɑ pɑ́ cɛlɑ kɔtʋlʋ.

³³Kɔtǝlɑɑ tɑɑ wei ɩ pukinɑ kpǝntɛ cɑlǝm nɑ tǝ nim kɛ kɔtɑɣɑ tǝlɑtɛ tɔɔ tɔ ɩ pɑɑ tete ntɛ́.

³⁴Tɑcɑɑ mɑɣɑmɑɣɑ heelinɑ Ɩsɛɣɛlɩ nyǝ́mɑ mɛ sɩ, ɩ́ lǝsɩ nɔɣɔ kʋlʋmɑɣɑ kpɛntʋɣʋ kɔtɑɣɑ kpǝntɛ yule, nɑ pǝ lɑŋlɛ nɑ ɩ́ cɛlɑ kɔtʋlʋ Alɔŋ nɑ ɩ lʋlʋɣʋ nyǝ́mɑ. Mpi tɔ, nɑntʋ ntɩ tǝ kɛ́ pɑ pɑɑ nyǝm kɛ tɑm tɔɔ kɛ́.

³⁵Mpi mpi pɑ kɔɔlɑ Tɑcɑɑ kɔtɑsɩ tɔɔ tɔ, pǝ pǝsǝɣɩ Alɔŋ nɑ ɩ pǝyɑlɑɑ pɑ nyǝm kɛ kʋyɑŋku pɑ kpɑ-wɛɣɛ Tɑcɑɑ kɔtʋɣʋ tǝmlɛ tɑɑ tɔɣɔ.

³⁶Tɑcɑɑ tʋnɑ Ɩsɛɣɛlɩ nyǝ́mɑ sɩ, pɑ́ cɛlɑ-wɛɣɛ kʋyɑŋku pɑ kpɑɑ-wɛɣɛ kɔtǝlɑɑ nɑ pɑ́ pǝlɩ pɑ nyɔɔŋ tɑɑ kɛ́ nim tɔ. Pǝ wɛɛ sɩ ɩ́ tɔkɩ kʋsǝsɩɩtʋ tǝnɛɣɛ tɑm tɔɔ kɛ́.