Lefii 14:21-50

²¹Ḿpʋ́ɣʋ́ Tɑcɑɑ tɑsɑ yɔɣɔtʋɣʋ sɩ: Ye polom kɛ́ kʋnyɔntʋ nɑ ɩ́ fɛɩnɑ sɔsɔm, ɩlɛ ɩ cɑɑ ɑsilimɑ kɛɛlʋɣʋ ɩwǝyɑɣɑ kʋlʋmɑɣɑ ŋkɑ pɑɑ hɑ Tɑcɑɑ mɑ́ nɑ pǝ́ kɛɛlɩ kʋtɔntʋ ɑsilimɑ tɔ. Nɑ ɩ́ cɑɑ mʋlʋm kʋpɑm mpi pɑ nuɣutinɑ nim tɔɣɔ kiloonɑɑ tooso nɑ nim liitili titite,

²²nɑ ɩhokɑsɩ nɑɑlɛ yɑɑ ɑlukukunɑɑ nɑɑlɛ. Pǝ tɑɑ mpi ɩ kɑ hiki tɔ. Nɑ pɑ́ lɑnɑ lɛlʋ kɛ ɑsilimɑ kɛɛlʋɣʋ kɔtɑɣɑ, nɑ lɛlʋ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ.

²³Pǝ tɑkɩ kʋyɑkʋ pǝlefɛɩ nɑɑnʋwɑ nyǝŋkʋ ɩlɛnɑ ɩ́ ponɑ kʋhɑɑŋ ɩnǝɣɩ kɔtʋlʋ kɛ tǝsulle cokǝle nɔnɔɣɔ kɛ Tɑcɑɑ kiŋ.

²⁴Ɩlɛnɑ kɔtʋlʋ kpɑɣɑ ɩwǝyɑɣɑ nɑ nim nɑ ɩ́ hɑ Tɑcɑɑ.

²⁵Kɔtʋlʋ tɛŋ ɑsilimɑ kɛɛlʋɣʋ ɩwǝyɑɣɑ kɛ lɛntʋɣʋ ɩlɛnɑ ɩ́ lii cɑlǝm tɑɑ nɑ ɩ́ tɑɑ ɑsilimɑ tʋ ŋkpɑŋʋɣʋ ntɔɣɔŋ nyǝŋkʋ nɔɣɔ tɑɑ, nɑ ɩ́ tɑɑ tɔtɔɣɔ ɩ niŋ ntɔɣɔŋ ɑpɑlʋmpǝle nɑ ɩ ɑpɑlʋnɔmpǝle ntɔɣɔŋ nyǝntɛ tɔɔ.

²⁶Ɩlɛnɑ kɔtʋlʋ pǝlɩ nim kɛ ɩ ntɑntɑkʋ mpǝtǝŋ nyǝŋkʋ tɑɑ,

²⁷nɑ ɩ́ lii pǝ tɑɑ kɛ́ ɩ ntɔɣɔŋ mpǝle nɑ ɩ́ ŋmɩɩsɩ kɔtɑɣɑ tǝlɑtɛ tɔɔ kɛ́ tɔm nɑɑtosompɔɣɔlɑɣɑ.

²⁸Ɩlɛnɑ ɩ́ tɑɑ ɩ niŋ tɑɑ nim mpǝɣɩ ɑsilimɑ kɛɛlʋɣʋ kɔtɑɣɑ lɑtʋ ntɔɣɔŋ ŋkpɑŋʋɣʋ nɔɣɔ tɑɑ, nɑ ɩ́ tɑɑ-wɩ tɔtɔɣɔ ɩ ɑpɑlʋmpǝle ntɔɣɔŋ nyǝntɛ nɑ ɩ ɑpɑlʋnɔmpǝle ntɔɣɔŋ nyǝntɛ pǝ tɔɔ kɛ lonɑ nnɑ ɑ tɑɑ pɑɑ tɑɑwɑ ɩsɑɣɑtʋ hɩɩsʋɣʋ kɔtɑɣɑ kpǝntɛ cɑlǝm tɔ.

²⁹Ɩlɛnɑ kɔtʋlʋ pǝlɩ ɩ niŋ tɑɑ nim kʋkɑɑsǝm kɛ yʋlʋ ɩnɩ ɩ nyʋɣʋ tɑɑ, nɑ ɩ́ lɑpɩ-ɩ ɑsilimɑ kɛɛlʋɣʋ kɔtɑɣɑ kɛ Tɑcɑɑ kiŋ.

³⁰Pǝ wɑɑlɩ ɩlɛnɑ kɔtʋlʋ kpɑɣɑ ɩhokɑsɩ yɑɑ ɑlukukunɑɑ mpɑ kʋtɔntʋ pǝsɑɑ nɑ ɩ́ kɔnɑ tɔ pɑ tɑɑ kɛ́ kʋlʋm

³¹nɑ ɩ́ lɑpɩ-ɩ ɑsilimɑ kɛɛlʋɣʋ kɔtɑɣɑ nɑ lɛŋkɑ kɛ kɔtɑɣɑ ŋkɑ kɔkɔ lusɑ kɑ tǝnɑ tɔ nɑ pǝ tɔɣɔnɑɣɑ kʋhɑʋ. Ɩlɛnɑ kɔtʋlʋ lɑ yʋlʋ ɩnǝɣɩ ɑsilimɑ kɛɛlʋɣʋ kɔtɑɣɑ kɛ Tɑcɑɑ kiŋ.

³²Kʋsǝsɩɩtʋ nti pǝ wɛɛ sɩ polom kʋnyɔntʋ ɩ́ tɔkɩ ɩ ɑsilimɑ kɛɛlʋɣʋ kɔtɑɣɑ lɑpʋ tɑɑ tɔɣɔlɛ.

³³Ḿpʋ́ɣʋ́ Tɑcɑɑ tɔmɑ Moisi nɑ Alɔŋ sɩ:

³⁴Ye ɩ́ kɔmɑ nɑ ɩ́ sʋʋ Kɑnɑɑŋ tɛtʋ nti mɑ hɑ-mɛ tɔ tǝ tɑɑ, ɩlɛnɑ kʋyɑkʋ nɑkʋlɩ ɩ́ nɑ́ mɑ yelɑɑ nɑ hʋŋkpʋsʋlɑɣɑ tʋlʋŋɑ yɑɣɑ mǝ kutuluɣu nɑkʋlɩ kʋ koluŋɑ tɔɔ kɛ́ tɛtʋ nti ɩnɩ tɩɩ pǝsɩ mǝ nyǝntʋ kɛ mpʋ tɔ tǝ tɑɑ tǝnɑ.

³⁵Ɩlɛ tǝyɑɣɑ tʋ polo nɑ ɩ́ heeli kɔtʋlʋ sɩ ɩ nɑwɑ pʋlʋɣʋ ɩ tǝyɑɣɑ tɑɑ nɑ pǝ́ nǝɣǝsǝnɑ ɩsɩɩ ɑsilimɑ kʋtɔŋ tʋlʋŋɑ.

³⁶Ɩlɛnɑ kɔtʋlʋ yɔɣɔtɩ nɑ pɑ́ lɑɑsɩ kutuluɣu ŋkʋ kʋ tɑɑ wontu tǝnɑ nɑ pǝ́cɔ́ ɩ polo tʋlʋŋɑ ŋkɛɣɛ mɑɣɑsʋɣʋ. Ɩlɛ kutuluɣu ŋkʋ kʋ tɑɑ wontu tǝnɑ kɑɑ pǝsɩ ɑsilimɑ pʋlʋpʋ. Pǝ wɑɑlɩ kɛ́ kɔtʋlʋ mǝlǝɣɩ nɑ ɩ́ tɑsɑ kutuluɣu ŋkʋ kʋ tʋlʋŋɑ kɛ mɑɣɑsʋɣʋ.

³⁷Ye kɑ wɛ ɑtɔntɔɔtɛ yɑɑ ɩsɛɛʋ nɑ kɑ́ tɑwɑ kutuluɣu kɛ lonte,

³⁸ɩlɛ kɔtʋlʋ lɩɩnɑ kutuluɣu ŋkʋ kʋ nɔnɔɣɔ nɑ ɩ́ tǝkɩ-kɛɣɛ kʋyɛɛŋ nɑɑtosompɔɣɔlɑɣɑ.

³⁹Kʋyɑkʋ nɑɑtosompɔɣɔlɑɣɑ nyǝŋkʋ sikiɣi ɩlɛnɑ kɔtʋlʋ mǝlɩ nɑ ɩ́ tɑsɑ mɑɣɑsʋɣʋ, ye ɩ nɑwɑ sɩ tʋlʋŋɑ ŋkɛ kɑ sɔɔsɑ wɑŋ kɛ kutuluɣu koluŋɑ tɔɔ

⁴⁰ɩlɛ kɔtʋlʋ yele nɑ pɑ́ lǝsɩ pɛɛ wenɑ tʋlʋŋɑ ŋkɛ kɑ hikɑɑ tɔ nɑ pɑ́ lɔ-yɛɣɛ ɩcɑtɛ wɑɑlɩ kɛ hute tɑɑ.

⁴¹Ɩlɛnɑ kɔtʋlʋ yele nɑ pɑ́ kɑɑlɩ pǝ tɑɑ tɔɔ kɛ timpi pɑɑ tɑɑwɑ tɔ nɑ pɑ lɔ pǝ tɛtʋ kɛ hute tɑɑ kɛ́ ɩcɑtɛ wɑɑlɩ.

⁴²Pǝ wɑɑlɩ ɩlɛnɑ pɑ́ cɑɑ pɛɛ kʋfɑnɑ nɑ pɑ́ lɛɛtɩ kɑncɑɑlɑɣɑ nyǝnɑ lonɑ, nɑ pɑ́ lɑ́ tɛtʋ nɑ pɑ́ tɑɣɑnɩ kutuluɣu kɛ tɑɑʋ.

⁴³Ye kutuluɣu tɑɣɑnʋɣʋ wɑɑlɩ kɛ tʋlʋŋɑ tɑsɑ lɩɩʋ,

⁴⁴ɩlɛ kɔtʋlʋ kɑ́ mǝlɩ nɑ ɩ́ tɑsɑ mɑɣɑsʋɣʋ, ye ɩ nɑwɑ sɩ tʋlʋŋɑ ŋkɛ kɑ sɔɔsɑɑ ɩlɛ ɑsilimɑ kʋtɔŋ kʋtɛtɛɛʋ ntɛ́. Pɑ́ nyǝnɩ kutuluɣu ŋkʋɣʋ ɑsilimɑ.

⁴⁵Pǝ wɛɛ sɩ pɑ́ yɔkɩ kutuluɣu ŋkʋ, nɑ kʋ pɛɛ nɑ kʋ lɔpʋtʋ, nɑ tɛtʋ nti pɑɑ tɑɑwɑ-kʋ tɔ nɑ pɑ́ kuu nɑ pɑ́ ponɑ ɩcɑtɛ wɑɑlɩ kɛ hute tɑɑ nɑ pɑ́ lɔ.

⁴⁶Ye wei ɩ́ sʋʋ kutuluɣu ŋkʋ kʋ tɑɑ kɛ́ kʋyɛɛŋ nɑɑtosompɔɣɔlɑɣɑ wei ɩ tɑɑ pɑ tǝkɑ-kʋɣʋ mpʋ tɔ, pʋntʋ kɛ́ ɑsilimɑ tʋ kɛ́ hɑlǝnɑ tɑɑnɑɣɑ.

⁴⁷Wei ɩ́ hǝntɑ kʋ tɑɑ, yɑɑ ɩ cɑɣɑɑ nɑ ɩ́ tɔɣɔ pʋlʋ, pǝ wɛɛ sɩ ɩ́ cɔtɔ ɩ wontu kɛ́.

⁴⁸Ye kɔtʋlʋ mǝlɑ kutuluɣu ŋkʋ kʋ tɑɑ kɛ́ kʋtɔŋ mɑɣɑsʋɣʋ nɑ ɩ́ nɑ́ sɩ pǝ kpɑɣɑʋ sɑɑ wei pɑ tɑɑ-kʋ tɔ tʋlʋŋɑ tɑ tɑsɑ lɩɩʋ, ɩlɛ kɔtʋlʋ hʋlɩ sɩ kutuluɣu fɛɩ ɑsilimɑ. Mpi tɔ, kʋtɔŋ tɛmɑ.

⁴⁹Tǝyɑɣɑ tɑɣɑnʋɣʋ tɔm tɑɑ ɩlɛ, kɔtʋlʋ kɑ́ cɑɑ sumɑsɩ nɑɑlɛ, nɑ tʋɣʋ sɔsɔɔʋ nɑkʋlɩ kʋ tɑɑsɩ, nɑ heeŋ hʋntʋ nti pɑ lii ɑkpɑɑyɑlɑ kʋsɛɛm tɔ, nɑ tʋɣʋ ŋku pɑ yɑɑ hisɔpʋ tɔ kʋ piliŋɑ.

⁵⁰Pǝ wɑɑlɩ ɩlɛnɑ ɩ́ yele nɑ pɑ́ lɛntɩ sumɑsɩ nsɩ sɩ tɑɑ lɛŋkɑ kɛ sɛɛlʋ lʋm hɛɛʋ tɔɔ.