LAASUUDEE 1

1

2

3

4

5

6

7

8

9

10

11

12

¹Laasuude Dauda nɛ́, Yerusalɛmu kína yãn yɛ̀.

²Ma laasuude ma bè: Yã pã búgubugu, yã pã búgubugu, à píngi pãmɛ.

³Bↄ́ àren gbɛ̃ntee è e anduna guu nawɛ̃a kɛ̀ èe kɛɛ a zĩ píngi guua?

⁴Kpàɛnↄ è gɛ̃tɛ, wurenↄ è su, mↄde anduna ègↄ̃ kuu gurↄ píngimɛ.

⁵Ɔfãntɛ̃ è bↄ, è gɛ̃, è wã à ɛara à gá guu kɛ̀ è bↄn.

⁶Ĩa è káka sↄↄmɛtɛ kpa, è liara à su gu'igbãroo kpa, ègↄ̃ ligaligaa àgↄ̃ gaa àgↄ̃ suu.

⁷Swa píngi í ègↄ̃ kaa ísiaa guumɛ, mↄde ísiaa è paro, í pìnↄ è ɛara wà su swaa pìnↄ mìamɛ.

⁸Pↄ́ píngi è ń kpasa, kpasa pì yã gɛ̃̀ onala. Gugwana è mↄ wɛ́ɛaro, yãmana è swã paro.

⁹Yã kɛ̀ kuu yãa bé eé ɛara àgↄ̃ kuu dↄ, yã kɛ̀ wà kɛ̀ yãan weé ɛara wà kɛ dↄ. À dufu kee kú anduna guuro.

¹⁰Pↄ́kee kuu kɛ weé be: Ǹ pↄ́ dufu ke gwaↄ́? Auo! À gĩakɛ à kuu wa ã zaa zi kↄ̀.

¹¹Gbɛ̃ káakunↄ yã ègↄ̃ dↄ gbɛ̃ken dↄro. Baa gbɛ̃ kɛ̀ aↄ̃égↄ̃ kuu ziaanↄ, aↄ̃ yã é dↄ gbɛ̃ken ziakpɛɛ zĩro.

¹²Ma laasuude ma kí blè Isarailinↄa Yerusalɛmu.

¹³Ma mɛ̀ kpà yã kɛ̀ wèe kɛɛ anduna guu píngi tàasikɛnaa, má gwàgwa ↄ̃ndↄ̃'ↄ̃ndↄ̃ má è Luda zĩ pãsĩ dà gbɛ̃nteenↄnɛ aↄ̃ kɛ.

¹⁴Ma yã kɛ̀ wèe kɛɛ anduna guu è píngi, à píngi nɛ́ pãmɛ, pɛna gukoriamɛ.

¹⁵Pↄ́ kotina porona vĩro, wè e wà pↄ́ kɛ̀ kuuroo naroro.

¹⁶Ben má ò ma nↄ̀sɛ guu ma bè: Ǹ gwa! Ma ↄ̃ndↄ̃ↄ bíta dɛ gbɛ̃ kɛ̀ aↄ̃ kpata blè Yerusalɛmu ma ãanↄla ń píngi, ma ↄ̃ndↄ̃ kↄ̃n ma dↄ̃nao wɛ́ɛ bↄ̀ maamaa.

¹⁷Ben ma mɛ̀ kpà ↄ̃ndↄ̃ asii dↄ̃naa lɛ mà yↄ̃nkↄkɛ kↄ̃n mìsaiyão asii dↄ̃, ben má è beee nɛ́ pɛna gukoriamɛ dↄ.

¹⁸Ɔ̃ndↄ̃ bíta è mↄ́ kↄ̃n nↄ̀sɛyakana bítaomɛ, wè yã'ↄ̃amma e ń dↄ̃na lɛ́mmɛ.