Aten gagalowa 1

1

2

3

4

5

7

8

11

12

¹Ema ipa Waeuwa Apanawa Dawid otopa Ierusalem bedewe warereleidie wandia aiawa.

²Waeuwa Apanawa wadiase, “Nitu uduudu diapanau, diapanauida, ipusiawaia! Ulaipa di diapanauida!”

³Apana tawo ema osowe waimoie nola pokawaa dewasai, ita dima euwa dosaie wadei?

⁴Apana muntoie waimoi ita do apana bontoie antoi, tane tawo deawa winede.

⁵Omo wiseidie ita pamede, ita leuleidie aupawe wiseide.

⁶Lanunu wita sen deneuwe wiseidie, ita on deneuwe aleide. Ita kawiroroleidie winede.

⁷Esa nomoie owa bedewe antoi, tane owa mai nopeleipona; esa leuleidie aupawe wiseide, ita aleide.

⁸Nitu uduudu segaleidia etea dabuasampa rua, gagalowa wawa apana mai menamoipona; emamba nitu ewamode tane mai pokasaipona, ita asimba dima etamodia mai pokasaipona.

⁹Nitu uduudu bauta segantona tane osowe segantopu, nitu bauta apana dewamoiena osowe dewamopu, tawo osowe mai nitu da sanaa segaleipona, dia.

¹⁰Walama isiwa apana wapuase, “Ewane, nitu ema sanaa segalen.” Dia, nitu uduudu mapo segantona deawaa winei muriwa no munten.

¹¹Dewa dainea mapo segantona mai mida insamoipona, dia, ita dima no tauma dewamoitana, apana ando muntompa mai insamopu.

¹²Ne ipa Waeuwa Apanawa Israelwa warereu Ierusalem bedewe wainedine.

¹³Ne aten insaisawa mampe nitu uduudu tawo osowe segaleidia insadewasamodine ita insena, “God apana osouwo sai ita nuabola itun.”

¹⁴Nitu uduudu tawo osowe segaleidia ipawa ne ewanasuden diapana, ewaewa lanunu tanone wadasusana rua.

¹⁵Nitu kiokiolena e mai dodomanasaa rua, ita nitu dainea mai winamoipona e mai di wisiaitaa rua.

¹⁶Ne neba wane wanase, “Ewee, ne ateina debamaidalen mai mapo warere Ierusalem bedewe waimoia atembu rua, dia. Ne ipa aten debama apanawa.”

¹⁷Ne insadewasa ita insakadisa atendewasamopa baiwa insaisawantedine tane donsana ipa dewa ema do lanunu tanone wadasusana rua.

¹⁸Naita ateina insaisawa euwa debamaidalepia nuabola osonawo itupi, ita naita ateina debamalepia nuapare osonawo itupi.