Miti Mumu Ŋic 1

1

2

3

4

5

6

7

8

9

10

11

12

¹Dawidire ŋokâ Miti Mumu Ŋiczi Jerusalem haeo ŋicwofuŋ juwec ere dâŋ ʒine hâcne.

²Miti Mumu Ŋic e dâŋ kecʒiŋuc muwec: Wiacte wiac forakac i fâri tâmiric, â juju i wâc fâri tâmiric jaha.

³Ŋoŋe mâreŋko juhuc gie ʒocnehec baeŋgopieŋ irec fârine wemo wiac mo bâfuaeŋgopieŋ?

⁴Ŋic gaŋne gaŋne jaŋe fua omaec eeŋgopieŋ, â mâreŋ sâko mâreŋ e ine foweczi fohuc juekac jaha.

⁵Ehame ʒoaŋzi huc wefuc eekac, ehuc mocwâc wefuocte wefuekacko risieekac.

⁶Mâŋâŋ e juwic mâreŋkonec wefuekac erâ wâc faic mâreŋkonec wahaekac, iŋuc ehuc mâreŋ râreckehuc mocwâc risieekac.

⁷Opâ sâko sasawa jaŋe hâwecko hueŋgopieŋ, ehame sifu hâweczi mi qâmbâriŋkeekac; erâ opâ jaŋe qizec‐jeŋicko risierâ mocwâc fuŋkerâ raeŋgopieŋ.

⁸Ŋic nâŋâc wiac sasawa ebac ehuc docke betaŋ eeŋgopeneŋ, ehuc irec fuŋne munaŋte dâŋ basaeŋgopeneŋ. Ʒâŋe‐nâŋeczi wiac tatakic tâmiric honeekac â hazec‐nâŋeczi tatakic tâmiric dâŋ manaekac.

⁹Wiac fuarâ fowec izia mocwâc fuarâ foocmu â wiac ebac ekicne ijaha mocwâc ebac eniŋmu; mâreŋko wiac furune moc mi fuaekac.

¹⁰Irec wiac moc fuame honerâ ʒiŋuc sâcne muniŋmu: “Honec, wiac keci furune?” Aricne, i mârâc jaha jâmbâŋ, nâŋâc mi fuarâ juhapene biac fuarâ fowec hâcne.

¹¹Mimiŋnefâc‐nâŋec jaŋe juhapie wiac fuawec i moc mi manasueŋgopeneŋ iŋuc jaha ŋic jufenʒoŋgopieŋ me ʒiŋuczia jueŋgopeneŋ dameŋ ŋondeŋ irec maŋnao wiac fua raocmu i wâc mi manasunʒoŋgopieŋ.

¹²Miti Mumu Ŋic no Jerusalem haeo Israe ŋic jaŋere ŋicwofuŋ jupo.

¹³Ehuc ŋic nâŋâc mâreŋko wiac sasawa ebac eeŋgopeneŋ irec fuŋne hone mana tarac epemurâ mamana gie sâko bahuc jupo. Manaŋgopieŋ, Anutu e ŋic nâŋâc gie munârewec i wiac ŋemâcne â ʒâic busâqoc‐ticnehec.

¹⁴Ŋic nâŋâc mâreŋko wiac sasawa ebac eeŋgopeneŋ i hone‐fârepo, ehuc ʒiŋuc mana tarapo: I fâri tâmiric sasawa, mâŋâŋ mezi rorâ basanaŋkezo eipieŋgopeneŋ irec sâc.

¹⁵Wiac hehesicne i bâbâpiaŋkenere sâc mi eekac, â wiac mi foha basahuc sâcne mi woseeŋgopeneŋ.

¹⁶No maŋnanezi ʒiŋuc manapo: “No ŋic maŋɋârâŋ sâkohec jukopac, juwicnao Jerusalem haeo guriŋ bapa gie bahuc jumbiŋ ŋic i jaŋere sâc sirickehuc maŋɋârâŋhec jukopac hâcne. Irec no maŋɋârâŋ â mamana tara jahere fuŋne manakopac.”

¹⁷No iŋuc manahuc maŋɋârâŋ â mamana tara erâ mutuc matacne irec fuŋne mana tarapemurâ gie sâko bahuc jupo. Ehuc ʒiŋuc mana tarapo: Gie i mâŋâŋ mezi rorâ basanaŋkezo eipieeŋgopeneŋ irec sâc jaha.

¹⁸Maŋɋârâŋ fekicne fonâreocmuo ine mana mezac bocjaha enaŋmu, â mamana sâkohec junaŋmuo ine ʒâic busâqoc wâc boc mananaŋmu.