1Dii bè Musanɛ:
2Ǹ kutaa dↄ kɛ̀ dɛ dakↄ̃rɛki kutaa ũ mↄ káakun gurↄ káaku zĩ
3ǹ àkpati kɛ̀ doka gbɛ̀ walaanↄↄ kú à guu diɛn ǹ lábure mↄ̀ kpázi.
4Ǹ gɛ̃ kↄ̃n teebu mↄ̀o ǹ à taanↄ káɛa zɛ́azɛa. Ǹ gɛ̃ kↄ̃n dabu mↄ̀o ǹ à fitianↄ kɛkɛ.
5Ǹ vura tuaetitikpatakii mↄ̀ diɛ doka àkpati aɛ ǹ kuta kpɛɛlɛ lábure logo ǹ tataàlɛ.
6Ǹ sa'opↄ kɛ̀ wè ká tɛ́n à tɛ́ kũ okii diɛ dakↄ̃rɛki kpɛɛlɛa,
7ǹ dàga mↄ̀ diɛ dakↄ̃rɛki kutaa dagura kↄ̃n sa'okiio ǹ í kán.
8Ǹ kara mↄ̀ kpá ǹ ligazi, ǹ lábure kpá kara pì lɛ́a.
9Ǹ pↄ́ kyakɛnↄsi mↄ̀ sɛ́ ǹ kú kpɛ́ pìa kↄ̃n pↄ́ kɛ̀ kú à guunↄ píngi ǹ diɛ ma pↄ́ ũ kↄ̃n à zĩkɛbↄnↄ, aↄ̃é gↄ̃ ma pↄ́ ũ.
10Ǹ nↄ́si pì kú sa'okii pìa kↄ̃n a zĩkɛbↄnↄ píngi. Ǹ sa'okii pì diɛ ma pↄ́ ũ, eégↄ̃ dɛ ma pↄ́ ũ dɛńla.
11Ǹ nↄ́si pì kú dàga pìa kↄ̃n a dibↄo, aↄ̃é gↄ̃ ma pↄ́ ũ.
12Ǹ mↄ́ kↄ̃n Arunao kↄ̃n a nɛ́nↄ dakↄ̃rɛki kpɛɛlɛa ǹ ń zú o gwe.
13Ǹ sa'ori pↄ́kãsãa mↄ̀nↄ da Arunanɛ, ǹ nↄ́si kúa ǹ à diɛ ma pↄ́ ũ, eé gↄ̃ ma gbã̀gbãri ũ.
14Ǹ mↄ́ kↄ̃n à nɛ́nↄ dↄ ǹ utagyaba mↄ̀nↄ dadańnɛ,
15ǹ nↄ́si kúkuḿma lán ń kù ń dea nà, aↄ̃é ma gbãgbã. Nↄ́sikuḿmana pì bé eé tó aↄ̃gↄ̃ dɛ ma gbã̀gbãrinↄ ũ ai ń boriia.
16Musa kɛ̀ lán Dii ònɛ nà píngi.
17Aↄ̃ bↄna Igipiti wɛ̃̀ plaade mↄ káaku gurↄ káaku zĩn wà kutaa pì dↄ̀.
18Kɛ̀ Musa e kutaa pì dↄↄ, à à zɛbↄ mↄ̀nↄ pɛ̀ɛpɛɛ gĩa, ben à à lípɛɛ mↄ̀nↄ pɛ̀pɛn à à líkpannↄ kpàkpan, ben à lípɛɛnↄ pɛ̀ɛpɛɛ.
19À bisa dààla, ben à báa kpààla lán Dii ònɛ nà.
20À sèeda gbɛ̀ walaanↄ sɛ̀ à kà àkpati pì guu, à àkpati pì sɛ́linↄ dà à zãanↄ guu, ben à à nɛ́ kùɛa.
21À gɛ̃̀o kpɛ́n, ben à lábure kpà sèeda àkpati pìzi lán Dii ònɛ nà.
22À teebu dìɛ dakↄ̃rɛki kutaan lábure pì kpɛɛlɛ kpa gu'igbãroo kpa.
23À burɛdi kàɛa Diinɛ zɛ́azɛa lán à ònɛ nà.
24À dabu dìɛ dakↄ̃rɛki kutaan aɛdↄkↄ̃ana teebua sↄↄmɛtɛ kpa,
25à fitianↄ nàna Dii aɛ lán à ònɛ nà.
26Ben à vura tuaetitikpatakii pì dìɛ dakↄ̃rɛki kutaan lábure saɛ,
27ben à tuaetiti gũ nnaa kpàtaa lán Dii ònɛ nà.
28Ben à lábure kpà kutaa pì lɛ́a.
29À sa'opↄ kɛ̀ wè ká tɛ́n à tɛ́ kũ okii dìɛ dakↄ̃rɛki kpɛɛlɛa, ben à sa'opↄ kɛ̀ wè ká tɛ́n à tɛ́ kũ òa kↄ̃n flawao lán Dii ònɛ nà.
30À dàga mↄ̀ dìɛ dakↄ̃rɛki kutaa dagura kↄ̃n sa'okiio, ben à í kàn.
31Gwen Musa kↄ̃n Arunao kↄ̃n a nɛ́gↄ̃gbɛ̃nↄ è ń ↄↄnↄ kↄ̃n ń gbánↄ pípin.
32Tó aↄ̃ↄe gɛ̃ɛ dakↄ̃rɛki kutaan, ke tó aↄ̃ↄe sↄ̃ↄ sa'okiizi, aↄ̃è ń ↄↄnↄ kↄ̃n ń gbánↄ pípin lán Dii ò Musanɛ nà.
33Ben à kara kpà à lìga kutaa pìzi kↄ̃n sa'okiio, ben à lábure kpà kara pì lɛ́a. Lɛn Musa zĩi pì kɛ̀ à yã̀a lɛ.
34Ben tɛ́luguu pì dà dakↄ̃rɛki kutaa pìla, Dii gakui kutaa pì pà.
35Musa e fↄ̃ à gɛ̃̀ dakↄ̃rɛki kutaa pìnlo, kɛ̀ tɛ́luguu dààla bensↄ̃ kɛ̀ Dii gakui kutaa pì pà yãnzi.
36Isarailinↄ táa'ona guu, tó tɛ́luguu pì gò kutaa pìa, ben aↄ̃è fɛɛ kↄ̃n táo.
37Tó tɛ́luguu pì e goaro, aↄ̃è fɛɛ kↄ̃n táoro, sé zĩ kɛ̀ à gòa.
38Fãantɛ̃ Dii tɛ́luguu è da kutaa pìla, gwãavĩ sↄ̃ tɛ́ ègↄ̃ kú tɛ́luguu pì guu. Lɛn Isarailinↄ è e lɛ ń píngi ń táa'ona guu píngi.
