BONAA 40

1

2

3

4

5

6

7

8

9

10

11

12

13

14

15

16

17

18

19

20

23

24

31

32

33

34

40

¹Dikiri pì Musanɛ:

²Ǹ kuta dↄ kũ à de dakarɛki kuta ũ mↄ káakun gↄrↄ káaku zĩ

³ǹ àkpati kũ doka gbɛ̀ anlonↄn kú a gũn ditɛn ǹ lábure kpái.

⁴Ǹ gɛ̃ kũ teburuo ǹ a tanↄ kátɛa zɛ́azɛa. Ǹ gɛ̃ kũ fitiladibↄↄo ǹ a fitilanↄ kɛkɛ.

⁵Ǹ wura turaretitikpataki ditɛ doka àkpati arɛ ǹ kuta kpɛ́lɛlɛ lábure kpá ǹ tataalɛ.

⁶Ǹ sa'opↄ kũ òdi ká tɛ́n à tɛ́ kũ oki ditɛ dakarɛki kuta kpɛ́lɛlɛa,

⁷ǹ dàga ditɛ dakarɛki kuta dagura kũ sa'okio ǹ í kán.

⁸Ǹ kara kpá ǹ likai, ǹ lábure kpá karaa pì lɛ́a.

⁹Ǹ pↄ́ sakɛnísi sɛ́ ǹ kú kpɛ́ pìia kũ pↄ́ kũ ò kú a gũnnↄ pínki ǹ ditɛ ma pↄ́ ũ kũ a zĩkɛbↄnↄ, oni gↄ̃ ma pↄ́ ũ.

¹⁰Ǹ nísi pì kú sa'oki pìia kũ a zĩkɛbↄnↄ pínki. Ǹ sa'oki pì ditɛ ma pↄ́ ũ, anigↄ̃ de ma pↄ́ ũ deńla.

¹¹Ǹ nísi pì kú dàga pìia kũ a dibↄↄo, oni gↄ̃ ma pↄ́ ũ.

¹²Ǹ su kũ Harunao kũ a nɛ́nↄ dakarɛki kuta kpɛ́lɛlɛa ǹ ń zú o gwe.

¹³Ǹ sa'ori pↄ́kasanↄ da Harunanɛ, ǹ nísi kúa ǹ a ditɛ ma pↄ́ ũ, ani gↄ̃ ma gbàgbari ũ.

¹⁴Ǹ su kũ a nɛ́nↄ dↄ ǹ utagyabanↄ dadańnɛ,

¹⁵ǹ nísi kúkuḿma lákũ n kù ń dea nà, oni ma gbagba. Nísikummanaa pì mɛ́ ani tó ògↄ̃ de ma gbàgbarinↄ ũ ari ń buria.

¹⁶Musa kɛ̀ lákũ Dikiri ònɛ nà pínki.

¹⁷Ń bona Misila wɛ̃̀ plade mↄ káaku gↄrↄ káakua ò kuta pìi dↄ̀.

¹⁸Kũ Musa tɛn kuta pì dↄ, à a zɛbↄnↄ pɛ̀tɛpɛtɛ gĩa, akũ à a lípɛtɛnↄ pɛ̀pɛn à a líkpakpanↄ kpàkpan, akũ à lípɛtɛnↄ pɛ̀tɛpɛtɛ.

¹⁹À biza kùa, akũ à bára kùtɛa lákũ Dikiri ònɛ nà.

²⁰À sèeda gbɛ̀ anlonↄ sɛ̀ à kà àkpatii pìi gũn, à àkpatii pì sɛ́linↄ dà a zãnↄ gũn, akũ à a nɛ́ kùtɛa.

²¹À gɛ̃̀o kpɛ́n, akũ à lábure kpà sèeda àkpatii pìii lákũ Dikiri ònɛ nà.

²²À teburuu dìtɛ dakarɛki kutan lábure pì kpɛ́lɛlɛ kpa gugbãnduru kpa.

²³À burodii kàtɛa Dikirinɛ zɛ́azɛa lákũ à ònɛ nà.

²⁴À fitiladibↄↄ dìtɛ dakarɛki kutan arɛdↄkↄ̃ana teburuua gɛ̀nↄmidↄki kpa,

²⁵à fitilanↄ nàna Dikiri arɛ lákũ à ònɛ nà.

²⁶Akũ à wura turaretitikpataki pìi dìtɛ dakarɛki kutan lábure sarɛ,

²⁷akũ à turaretiti gbĩ nnanna kpàtaa lákũ Dikiri ònɛ nà.

²⁸Akũ à lábure kpà kuta pì lɛ́a.

²⁹À sa'opↄ kũ òdi ká tɛ́n à tɛ́ kũ oki dìtɛ dakarɛki kuta kpɛ́lɛlɛa, akũ à sa'opↄ kũ òdi ká tɛ́n à tɛ́ kũ òa kũ flawaao lákũ Dikiri ònɛ nà.

³⁰À dàgaa pìi dìtɛ dakarɛki kuta dagura kũ sa'okio, akũ à í kàn.

³¹Gwen Musa kũ Harunao kũ a nɛ́gↄ̃gbɛ̃nↄ dì ń ↄnↄ kũ ń gbánↄ pípin.

³²Tó òtɛn gɛ̃ dakarɛki kutan, ke tó òtɛn na sa'okii, òdi ń ↄnↄ kũ ń gbánↄ pípin lákũ Dikiri ò Musanɛ nà.

³³Akũ à karaa kpà à lìka kuta pìii kũ sa'okio, akũ à lábure kpà karaa pì lɛ́a. Lɛn Musa zĩ pìi kɛ̀ à làka lɛ.

³⁴Akũ tɛ́luku pìi dà dakarɛki kuta pìla, Dikiri gakuri kuta pìi pà.

³⁵Musa dí fↄ̃ à gɛ̃̀ dakarɛki kuta pìi gũnlo, kũ tɛ́luku dàala akũsↄ̃ kũ Dikiri gakuri kuta pìi pà yãi.

³⁶Isarailanↄ táa'onaa gũn, tó tɛ́luku pìi gò kuta pìia, akũ òdi futɛ kũ táo.

³⁷Tó tɛ́luku pì dí goaro, òdi futɛ kũ táoro, sé zĩ kũ à gòa.

³⁸Fãnantɛ̃ Dikiri tɛ́luku dì da kuta pìla, gwãani sↄ̃ tɛ́ dìgↄ̃ kú tɛ́luku pìi gũn. Lɛn Isarailanↄ dì e lɛ ń pínki ń táa'onaa gũn pínki.