Ekistos 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Iwe, ewe Samol mi Lapalap a üreni Moses,

²“Lon aeuin ränin ewe aeuin maram kopwe aüetä ewe imwenfel seni mangaku ia aramas ra churi Kot ie.

³Kopwe anomu lon ewe imwenfel seni mangaku ewe pworun allük, nge kopwe ti ngeni echö cheech.

⁴Iwe, kopwe uwalong ewe chepel o atettelöchü pisekin won. Mürin kopwe uwalong ewe lenien atittin o isetä laman won.

⁵Kopwe pwal uwalong ewe rongen asoren ötüöt seni kolt o anomu mwen ewe pworofel. Mürin kopwe eitiuätä chechen asamalapen ewe imwenfel.

⁶Kopwe anomu ewe rongen asoren kek mwen asamalapen ewe imwenfel seni mangaku.

⁷Kopwe pwal anomu ewe sepien töttöl lefilen ewe imwenfel seni mangaku me ewe rongen asoren kek o alölöü koluk lon.

⁸Iwe, kopwe aüetä ewe tit mangaku pwelin ewe leni lükün o eitiuätä chechen asamalapan.

⁹Mürin kopwe angei ewe löön epit o epiti ewe imwenfel seni mangaku me mettochun lon meinisin, kopwe pwal apini me pisekin lon meinisin. Iwe, epwe pin.

¹⁰Kopwe pwal epiti ewe rongen asoren kek me pisekin meinisin o apini pwe epwe unusen pin.

¹¹Iwe, kopwe pwal epiti ewe sepien töttöl me motongan o apini.

¹²Mürin kopwe emwenato Aaron me nöün kewe mwän ren asamalapen ewe imwenfel seni mangaku o atütüür.

¹³Iwe, kopwe aüföüfa ngeni Aaron ekewe üf mi pin, kopwe pwal epiti o apini, pwe epwe angang ngeniei lon wisen souasor.

¹⁴Kopwe pwal emwenato nöün Aaron kewe mwän o aüföüfa ngeniir ekewe sööch mi pwech,

¹⁵kopwe epitiir usun om epiti semer we, pwe repwe angang ngeniei lon wisen souasor. Pun ar kepit epwe atolongeer me mwirimwirir lon wisen souasor seni eu täppin aramas tori eu täppin.”

¹⁶Iwe, Moses a föri meinisin usun mine ewe Samol mi Lapalap a allük ngeni.

¹⁷Lon aeuin ränin ewe aeuin maram, lon aruuen ierin ar towu seni Isip ewe imwenfel seni mangaku a kaütä o apinipinila.

¹⁸Iwe, Moses a aüetä ewe imwenfel seni mangaku. A fotuki alongun o aüetä papan, a pwal sökalong ömwöchür o aüetä üran.

¹⁹Mürin, Moses a emeresala ewe mangaku won ewe imwenfel o isetä pwölüpwölün won, usun mine ewe Samol mi Lapalap a fen allük ngeni.

²⁰A pwal angei ekewe allük o isenirelong lon ewe pworofel, a sökalong ämwärin o isetä öppüngün won.

²¹Mürin, Moses a uwalong ewe pworofel lon ewe imwenfel seni mangaku o eitiuätä ewe chechen lefil pwe a tiela ewe pworofel, usun ewe Samol mi Lapalap a fen allük ngeni.

²²Iwe, a iseis ewe chepel peliefengin me lon ewe imwenfel seni mangaku pekiton ewe cheech.

²³A pwal isetä ekewe pilawa o atettelöchü me won ewe chepel fän mesen ewe Samol mi Lapalap, usun ewe Samol mi Lapalap a fen allük ngeni.

²⁴Iwe, a iseis ewe lenien atittin awenewenen ewe chepel peliörün me lon ewe imwenfel seni mangaku.

²⁵A pwal isetä ekewe lamp won o atineer me fän mesen ewe Samol mi Lapalap, usun ewe Samol mi Lapalap a fen allük ngeni.

²⁶Mürin a iseis ewe rongen asor seni kolt lon ewe imwenfel seni mangaku kükü ngeni ewe cheech

²⁷o keni apach mi pwokus won, usun ewe Samol mi Lapalap a fen allük ngeni.

²⁸Iwe, a pwal eitiuätä chechen asamalapen ewe imwenfel.

²⁹Mürin a iseis ewe rongen asoren kek leasamalapen ewe imwenfel seni mangaku, o eäni asoren kek me asoren mongö won, usun ewe Samol mi Lapalap a fen allük ngeni.

³⁰A pwal iseis ewe sepien töttöl lefilen ewe imwenfel seni mangaku me ewe rongen asor o alölöü koluk lon.

³¹Iwe, Moses me Aaron me nöün kewe mwän ra talü pöür me pecher lon.

³²Lupwen ra tolong lon ewe imwenfel seni mangaku, pwal lupwen ra kan ngeni ewe rongen asor, ra limetiir lon ewe koluk, usun ewe Samol mi Lapalap a fen allük ngeni Moses.

³³Iwe, a pwal aüetä ewe tit mangaku pwelin ewe leni lükün ewe imwenfel seni mangaku me ewe rongen asor o eitiuätä chechen asamalapen ewe leni lükün. Iei usun Moses a awesi ewe angang.

³⁴Mürin, ewe kuchu a pwölüela ewe imwenfel seni mangaku, nge lingen ewe Samol mi Lapalap a aürala lon.

³⁵Iwe, Moses esap tufichin tolong lon ewe imwenfel seni mangaku, pun ewe kuchu a chök nonom won, nge lingen ewe Samol mi Lapalap a aürala lon.

³⁶Lon unusen ar sai, iteiten fansoun, lupwen ewe kuchu a witä seni won ewe imwenfel seni mangaku, ekewe aramasen Israel ra sopwela ar sai.

³⁷Nge lupwen ewe kuchu a üla won, resap sai tori ewe rän ewe kuchu a witä.

³⁸Pun lon unusen ar sai kuchun ewe Samol mi Lapalap a nom won ewe imwenfel seni mangaku lerän, nge lepwin ekkei a nom lon ewe kuchu. Ei a fis me fän mesen ekewe chon Israel meinisin.