Yauna 40

1

2

3

11

12

13

14

15

16

17

18

19

20

21

22

23

24

25

28

31

32

34

40

¹Keta Yave Mosese i nusifufuwiya i bwaduwa,

²“Manamana kiouna kuyadayada kana kafa viuḡu nenei, yaku Vada Tafutafuna kuna vimisiniiya.

³Dedeni kana koni namai visime 10 sinenei kuna tenekanasuniya eyo kafa dawanafafana kana nuya naunei kuna teniya.

⁴Sonama kuna kanasuniya keta kana nogonogo etanei kuna dawana. Yota kimayeta yana kafa misini kuna nemiiya keta kimayeta kuna tenisiya etanei.

⁵Eyo kafa guvimamadi kana didiḡa vigonudina, kuna teniya dedeni kana koni naunei eketa nuya kuna nuvitanuniya Vada kana kawai.

⁶Kafa vikanakooḡa bwanaosena kana didiḡa kuna teniya Vada kana kawa naunei.

⁷Kaboma nakasina kafa katumimi kuna teniya Vada keta kafa vikanakooḡa bwanaosena kana didiḡa kasi sinefouwai, eketa ukowa kuna vininiwatotoiya.

⁸Vada keta kafa vikanakooḡa bwanaosena kana didiḡa kuna sifafifiniya keta nuya kuna nukanekaneneiya wasiketa kana kawai.

⁹Eyo muniyai givikanatafu kana bubu kuna viya keta Vada etana be iba matatafuna sinenei kuna vitowisiya. Kuna tenesiniya fasikuwai ebe ina vitafuwa.

¹⁰Yota bubu nenei kafa vikanakooḡa bwanaosena kana didiḡa keta kana nogonogo nukusi kuna vitowisiya. Kuna tenesiniya fasikuwai ebe ina vitafuwa venemokena.

¹¹Kaboma nakasina kafa katumimi na kana kafa misini nukusi, bubu nenei kuna vitowisiya keta kuna tenesinisiya.

¹²Anoni na natunatuna kuna kanasunisiya Vada Tafutafuna kawanei keta ukowa nenei kuna vitowisiya.

¹³Nuya tafutafusi nenesiyai Anoni kuna okanikanibubuniya keta bubu nenei kuna vitowiya keta kuna tenesiniya ebe ina vitovibwanaoseya be ina vikaetoikuwa.

¹⁴Yota natunatuna kuna nemiisiya keta kasi nuya kuna vikotonisiya.

¹⁵Bubu nenei amasi ku vitowiya maise, tasike kuna vitowisiya ebe sina vitovibwanaoseya be sina vikaetoikuwa. Vitowanama nenei tasike be susukwasi si nenemiya, tova matatafuna sina vivitovibwanaoseya.”

¹⁶Iba matatafuna Mosese i fufuniya, naki maisemoka Yave i visimeiya.

¹⁷Eketa yamayamana kana kafa viuḡu manamana kana vinuwa nenei keta yamayamananama kana kuyadayada kafa viuḡu nenei, Vada Tafutafuna si vimisiniiya.

¹⁸Mosese koḡona yasi kafa misini i didiisiya muniyai yo koḡona i vimisiniina. Eyo dawanabanebaneina keta ketoviyewa i dawana.

¹⁹Muniyai kafa dawanafafana nenei, Vada seḡaseḡanaḡa nenei i teweiya. Eyo kafa dawanafafana yomuyomu kwafinisiyai si fufunisiya nenei, etanei i teweisiya naki maisemoka Yave i visimeiya.

²⁰Eketa Mosese gabanasima nuwesi beyabeyasi i visiya keta dedeni kana koni sinenei i totoisiya. Eyo dedeni kana koni kafakainei kana nowanowa nenesiyai, kewa i duisiya. Eketa koni kana gudu nenei i vitanaguduya.

²¹Muninei dedeni kana koni i kanasuniya Vada Tafutafuna sinenei keta kafa dawanafafana kana nuya i nuvitanuniya eketa dedeni kana koni i tenefotiya, naki maisemoka Yave i visimeiya.

²²Yota sonama i una-kanasuniya Vada Tafutafuna sinenei keta bomatu kuweyaina i teniya, Totomu Tafutafumokena kana kafa dawanafafana kana nuya kwaunei.

²³Eketa manekasima i gidewidewisiya kana bobotai Yave naunei sonama etanei i tenisiya, naki maisemoka Yave i visimeiya.

²⁴Kimayeta yana kafa misini i kanasuniya keta Totomu Tafutafuna nanakoya kuweyaina i vimisiniiya keta sonama i visaiya.

²⁵Eyo Yave matanei kimayeta i guwanisiya, naki maisemoka Yave i visimeiya.

²⁶Eketa kafa guvimamadi kana didiḡa vigonudina, dawanafafana naunei i teniya Totomu Tafutafuna sinenei,

²⁷eyo iba mamadisi i guwanisiya, naki maisemoka Yave i visimeiya.

²⁸Eketa dawanafafana i nuvikaneneiya Vada kana kawa nenei.

²⁹Kafa vikanakooḡa bwanaosena kana didiḡa i teniya Vada kawanei ebe etanei yawane yomuyomu be kausibi ina vibwanaoseiisiya, naki maisemoka Yave i visimeiya.

³⁰Vada keta didiḡa kasi kawasasai, kaboma nakasina i vimisiniiya eketa ukowa i vininiwiya kafa katumimi.

³¹Eketa nokomai Mosese keta Anoni na natunatuna namoḡa nimasi be kaesi kana kafa kikigona.

³²Tovasima yasi kanasuna Vada sinenei o yasi nai kafa vikanakooḡa bwanaosena kana didiḡa nenei, tututausi sina gonisiya, naki maisemoka Yave i visimeiya.

³³Vada keta kafa vikanakooḡa bwanaosena kana didiḡa i sifafifiniya keta nuya ina nukanekaneneiya wasiketa kana kawai. Eketa Mosese bunanige matatafuna i nusafuya.

³⁴Eyo muniyai busibusi Vada Tafutafuna i sowiya keta Yave yana mayesina matakikikwanena i vimaiya.

³⁵Busibusi i nuvitoiya Vada etanei keta Yave yana mayesina matakikikwanena i vimaiya eketa Mosese muka kana fata be ina kanasuna Vada sinenei.

³⁶Tova matatafuna tovanama busibusi Vada ina teweiya atu ina kanakasiya, nao fiyao Isineni si misimisiniya keta si niniya tamo menana nenei.

³⁷Eatu taki busibusi muka ita kakanakasiya, nao yota muka sita ninai kana nivaniva ina kanakasiya.

³⁸Tova matatafuna Isineni yasi toḡavenudadananama kana kawasasa nenei, kuyadayadai Vada etanei Yave yana busibusi si kitakitiya. Eatu nuwabuna nenei, nao kai atai i nununuḡa busibusi sinenei Isineni namoisi matatafusi si kitakitiya.