Kɔlɛntɩ II 3

1

2

3

4

5

6

7

8

9

10

11

12

13

¹Tɔmnɑɑ pɑnɛ pɑ hʋ́lǝ́ɣɩ́ sɩ tǝ cɑɑ tǝ sʋʋ tɑ́ tɩ sɑm tɑɑ? Yɑɑ tɩɩ hʋ́lɩ́-mɛɣɛ tɑkǝlɑsɩ nsi sɩ hʋ́lǝ́ɣɩ́ sɩ tɑ́ kʋlɑpʋtʋ tewɑ tɔ? Yɑɑ tɩɩ sǝlǝmɩ-mɛ sɩ ɩ́ hɑ-tʋɣʋ-sǝɣɩ mǝ mɑɣɑmɑɣɑ ɩsɩɩ lɛlɑɑ lɑkʋɣʋ tɔ?

²Mǝ mɑɣɑmɑɣɑ mǝ pilimɑ kɛnɑ tɑ́ tɑkǝlɑɣɑ, nɑ tɑ́ lotu tɑɑ kɛ́ pɑ ŋmɑɑ-kɛ, nɑ yǝlɑɑ tǝnɑ pǝsǝɣɩ nɑ pɑ́ nɑ́ nɑ pɑ́ kɑlɑ.

³Nn, pǝ wɛ ḿpʋ́ɣʋ́ tǝkpɑtɑɑ sɩ ɩ́ kɛ́ Kilisiti tɑkǝlɑɣɑ ŋkɑ ɩ́ ŋmɑɑwɑ tɔɣɔ, nɑ tɑɣɑ ɩ́ ŋmɑɑnɑ tɑkǝlɑɣɑ kɑnɛ. Pɑ tɑ ŋmɑɑ tɑkǝlɑɣɑ kɑnɛ nɑ ŋmɑɑlɑɣɑ. Amɑ weesuɣu tʋ Ɩsɔ Feesuɣu kɛ pɑ ŋmɑɑnɑ-kɛ, nɑ pǝ tɑɣɑ pɛɛ kpɑɑtɑnɑɑ tɔɔ kɛ́ pɑ ŋmɑɑwɑ, ɑmɑ yǝlɑɑ lotu tɑɑ mɑɣɑmɑɣɑ kɛ pɑ ŋmɑɑwɑ.

⁴Nɑɑni wei tǝ wɛnɑ Ɩsɔ kiŋ kɛ Kilisiti tɔɔ tɔ ɩ tɔɔ kɛ́ tǝ yɔɣɔtǝɣɩ mpʋ.

⁵Pɔpɔtʋ fɛɩ, tǝ kɑɑ pǝsɩ nɑ tǝ tɔ pɑɑ pǝcɔ sɩ tɑ́ mɑɣɑmɑɣɑ tɑ́ tomɑ kɛ tǝ lɑpǝnɑ tǝmlɛ tǝnɛ. Ɩsɔ yelinɑ nɑ tǝ́ pǝsǝɣɩ nɑ tǝ́ lɑkɩ mpi tǝ lɑkɩ tɔ.

⁶Pǝ tɑɣɑ pʋlʋ tɔɔ, Ɩsɔ ɩnɩ ɩ yelinɑ nɑ tǝ́ pǝsɩ nɔɣɔ pɛɛlʋɣʋ kʋfɑm tǝmlɛ lɑtɑɑ. Nɑ kɑ tɑ kɛ kʋsǝsɩɩtʋ nti pɑ ŋmɑɑwɑ tɔ tǝ nyǝŋkɑ, ɑmɑ Ɩsɔ Feesuɣu nyǝŋkɑ kɛ́. Kʋsǝsɩɩtʋ nti tǝ wɛ tɑkǝlɑɣɑ tɑɑ tɔ tǝ kʋɣɩ kɛ́. Amɑ Ɩsɔ Feesuɣu nɑ́ hɑɑ weesuɣu kɛ́.

⁷Nmɑɑtʋ pee kɛ pɑ ŋmɑɑnɑ kʋsǝsɩɩtʋ kɛ pɛɛ kpɑɑtɑnɑɑ tɔɔ. Pɑɑ nɑ mpʋ pǝ hʋlɑ Ɩsɔ teeli kɛ tǝ tǝcɛllɛ, nɑ Moisi ɩsɛntɑɑ teekɑɣɑ kɔkɔ nɑkǝlɩ te, nn. Hɑlǝnɑ Ɩsɛɣɛlɩ nyǝ́mɑ tɑ pǝsɩ nɑ pɑ́ nyǝnɩ ɩ ɩsɛntɑɑ kɛ́ tɔm nɑɑlɛ, pǝyele ɩ ɩsɛntɑɑ teu mpɩ pɩɩ kɛ́ mpi pɩɩ tɛ nɑ pǝ́ sɑɑlɩ yem tɔɣɔ. Ye kʋsǝsɩɩtʋ nti tǝlɛ tǝ kʋɣɩ tɔ tǝ tɑ kisi teeli kɛ hikuɣu,

⁸kɑcɑŋfɑnɑ tǝmlɛ nte Ɩsɔ Feesuɣu nɑ́ lɑkɩ tɔ?

⁹Ye tǝmlɛ nte tǝ lɑpɑ nɑ yǝlɑɑ pǝsɩ tɑsǝkǝlɛ nyǝ́mɑ tɔ tǝlɛ tǝ tɑ kisi teeli kɛ hikuɣu, ɩlɛ kɑcɑŋfɑnɑ nte tǝlɛ tǝ lɑkɩ nɑ yǝlɑɑ pǝsǝɣɩ yʋlʋpɑmɑ kɛ Ɩsɔ ɩsɛntɑɑ tɔ?

¹⁰Tǝ tɩɩ pǝsǝɣɩ nɑ tǝ́ yɔɣɔtɩ sɩ tuu lɔŋ teeli nɑ́ mǝlɑ yem kɛ́ kɑɣɑnɑ nyǝŋ tɔɔʋ tɔɔ. Kɑɣɑnɑ nyǝŋ tɛɛ-ɩ kɛ́ tǝpʋlʋpʋlʋ.

¹¹Mpi pǝ tɑɑŋɑ pǝcɔ tɔ pǝlɛ pǝ tɑ kisi teeli kɛ hikuɣu, kɑcɑŋfɑnɑ mpi pǝ cɑkɩ tɑm tɔɔ tɔ?

¹²Tǝ tɛɛlǝɣɩ mpʋ tɔɣɔ tɑ́ nɑɑni tɔɔ sɔsɔm.

¹³Tɑ́ fɛɩ ɩsɩɩ Moisi wei ɩ kɑ tɑkɑ ɩ ɩsɛntɔɔ kɛ́ sɑɑlɑɣɑ sɩ Ɩsɛɣɛlɩ nyǝ́mɑ ɩ́ tɑɑ kɔɔ nɑ pɑ́ nɑ́ ɩ teu mpi pɩɩ tɛ nɑ pǝ́ sɩ tɔ pǝ sɑɑlʋɣʋ.

¹⁴Amɑ pɛlɛ pɑ tɑ pǝsɩ nɑ pɑ́ cɛkǝnɑ, nɑ hɑlǝnɑ sɑŋɑ ḿpʋ́ɣʋ́ pǝ tɩɩ wɛɛ. Ye pɑ sʋʋ nɔɣɔ pɛɛlʋɣʋ kʋpǝm tɑkǝlɑɣɑ kɛ kɑlʋɣʋ kɛ ɩsǝntɔ, pɑ lɑɣɑtʋ tɔɔ tɑkɑ sɑɑlɑɑɣɑ ŋkɛɣɛ. Yʋlʋ wei nɑ Kilisiti pɑ kpɛntɑ kʋlʋm tɔ pʋntʋ tike tɔɔ kɛ́ sɑɑlɑɣɑ kɑnɛ kɑ tɑ kenti.

¹⁵Nɑ hɑlǝnɑ sɑŋɑ ɩsǝntɔ, ye pɑ kʋlɑ Moisi tɑkǝlɑsɩ kɑlʋɣʋ, sɑɑlɑɣɑ ŋkɛ kɑ tǝkɑ pɑ lɑɣɑtʋ tɔɔ kɛ́.

¹⁶Pɑ ŋmɑɑwɑ Ɩsɔ Tɔm tɑɑ kɛ́ mpʋ sɩ: Yʋlʋ kɛɛsǝɣǝnɑ Tɑcɑɑ tɔɔ kɛ́ ɩlɛnɑ sɑɑlɑɣɑ ŋkɛ kɑ́ kɔɔlɩ ɩ tɔɔ.

¹⁷Tɑcɑɑ wei ɩ tɔm pɑ yɔɣɔtǝɣɩ Ɩsɔ Tɔm tɑɑ cǝnɛ ɩnɩ tɔ Ɩsɔ Feesuɣu kɛ́. Ye Tɑcɑɑ Feesuɣu ɩ́ wɛ timpi, hɛɛsʋɣʋ wɛnnɑ.

¹⁸Tɑ́ tǝnɑ mpɑ tɑ́ sɑɑlɑɣɑ kɛɛlɑ tɑ́ ɩsɛntɔɔ tɔ, Tɑcɑɑ teu nɑɑkɩ tɑ́ tɔɔ kɛ́ tǝnyǝnǝnyǝnɩ. Nɑ pǝ lɑɣɑsɑ-tʋɣʋ ḿpʋ́ɣʋ́ sɩ tǝ́ nǝɣǝsǝnɑ Tɑcɑɑ. Tǝ lɩɩ teu tɑɑ kɛ́ nɑ tǝ́ sʋʋ teu kʋkǝlǝm lɛmpɩ tɑɑ tɔtɔ. Tɑcɑɑ Feesuɣu lɑpǝnɑ tǝmlɛ tǝnɛ tǝ tɑkɑ.