Juan 21

1

2

3

4

5

6

7

8

9

10

11

12

13

14

15

16

17

18

19

20

21

¹Ngwalo mriid re koree, tsa lee Jesús mre ngwani lo re nee zha kuu mteed lo Jesús roo nitdoo kuu le Tiberias, ne tenzhee ngoke:

²Ndo Simún Pey, Mach (kuu ni zha lo “kwach”), Natanael (zha yez Caná yez kuu nzi yezlyu Galilea), ne rop nee wetsʼn (xgann Zebedeo), ne techop zha kuu mteed lo Jesús.

³Tsa lee Simún Pey nzhab: ―Lee na nda niit mbel. Tsa nzhab re nee lo Pey: ―No nee ya kon lu. Tsa mke re nee leen thib kano ne nda nee, per mniitta nee mbel yaala.

⁴Ne or ndeyeniʼa yezlyu, lee Jesús ngwani lo re nee roo nitdoo, per myeent re nee Jesúse.

⁵Tsa ne Jesús lo nee: ―Mndyeen, ¿chu neeka thib mbel mniitta goo? Tsa nzhab nee: ―Neeka thibe.

⁶Tsa ne Jesús lo nee: ―Blebi goo yex goo lad ban lo kano, tsa niit goo mbel. Ne tata mtsow neey, ne kwathoz mbel mniit nee ne neeka gagt koo nee yex leen nit.

⁷Tsa nzhapʼn lo Pey: ―¡Zha Nabeey! Per or mbin Simún Pey, Zha Nabeey, tsa mdok Pey xab Pey, tak mloo Pey xab ne oraaka mndaab Pey leen nit.

⁸Lee tedib net nee mtsino kano asta roo nitdoo, ne mdobyu nee yex kuu tseta nzo mbel, tak teeka thib gayoo metr nzo nee lo nitdoo.

⁹Ne or mzin re nee roo nitdoo, mwii nee nde bel, ne mwii nee lee thib mbel ngeyex lo ki, noga mwii nee pan.

¹⁰Tsa ne Jesús lo re nee: ―Deno goo chop tson mbel kuu mniit goo.

¹¹Ne lee Simún Pey mke leen kano, ne mdobyu yex kuu nzo re mbel kuu nabii, asta roo nitdoo, ne leen yexa nzo thib gayoo chop galbtsii btson mbel, ne tegal kwathoz mbel, per mratta yex.

¹²Tsa ne Jesús lo re nee: ―De wu ren goo. Per neeka thib nee myet leettsoo ganaabdiz lo Jesús, naa cho nak Jesús. Tak ne nee Jesús Zha Nabeey.

¹³Tsa mbig Jesús gax ne mzhen Jesús pan ne mndaa Jesús pan lo nee; ne tataga mtsow Jesús kon mbel.

¹⁴Welt ree ngok myon welt kuu ngwani Jesús lo re nee, kuu mteed lo Jesús, lo mrobana Jesús.

¹⁵Or ngwalo ndow ren re nee, tsa mnaabdiz Jesús lo Simún Pey ne nzhab Jesús: ―Simún xgann Jonás, ¿chu masraa nke leettsooʼa na nake re zha ree? Pey mkab ne nzhab: ―Ah Zha Nabee, neʼa lu nke leettsoon lu. Tsa nzhab Jesús lo Pey: ―Bkenap re mbak zhiil da.

¹⁶Tsa mbre Jesús mnaabdiz lo Pey tedib welt, ne nzhab Jesús: ―Simún xgann Jonás, ¿chu nke leettsooʼa na? Lee Pey mkab nzhab: ―Ah, Zha Nabee, neʼa lu nke leettsoon lu. Tsa nzhab Jesús lo Pey: ―Bkenap re mbak zhiil da.

¹⁷Ne ngok myon welt mnaabdiz Jesús lo Pey, ne nzhab Jesús: ―Simún xgann Jonás, ¿chu nke leettsooʼa na? Tsa nabil ngoo leettsoo Pey, tak myona welt ngenaabdiz Jesús lo Pey, naa chu nke leettsoo Pey Jesús. Ora mkab Pey ne nzhab Pey: ―Zha Nabee, reta kuu neʼa, neʼa lu nke leettsoon lu. Tsa nzhab Jesús lo Pey: ―Bkenap re mbak zhiil da.

¹⁸Wlipaa na nin loʼa. Leettsa mndyeena mdoka xaba, ne nyaʼa loka pa ta nlaaza, per leettsa gaka zha gox, taaba yaaʼa ne tedib zha tegok xaba, ne teno zha lu ta nlaazta yaʼa.

¹⁹Or nzhab Jesús kona, mndaa Jesús kwent naa xomod gath Pey, ne tsow Pey naroob men yelaaz Jesús. Tsaraa nzhab Jesús lo Pey: ―¡Bteke ditsʼn!

²⁰Or lee Pey mtsere lo, tsa mwii Pey na Juan ndeken dits re zha. Ne leeka na kuu mnaabdiz lo Jesús btsi kuu ndow rtsee re nee, rtsee chaan Zha Nabee, or kuu nzhapʼn, ¿cho taaʼa lo re zha kuu kutha?

²¹Or mwii Pey na, tsa nzhab Pey lo Jesús: ―Zha Nabee, ne lee zha ree, ¿kwan gak kon zha ree?

²²Jesús mkab ne nzhab: ―Os leen nlazʼn banka zha, asta leettsa bretabʼn, tata gake. ¡Ndoblota gona kona! Komsi bteke ditsʼn.

²³Ne lee diza mraats lo re wets ne lo re btan lee na gatht, per net Jesús gathtʼn, sinke kuu nzhab Jesús lo Pey nak: “Os leen nlazʼn banka zha asta leettsa bren, ¿cho mporta kona?”

²⁴Na ndaa kwent re koree, mwiin re koree ne mkee nay lo yeets. Ne, neʼaa wli kuu mkeen.

²⁵Noga mtsow Jesús tedib net re kuu thoz; ne os gake retay lo yeets, ndakʼn neeka dita lo yezlyu gaat yo re yeets kuu gake retay. Tbaa nake.