1Ner wiz kuu ndelo sman, lee Mari Magdalen ngwa roo baa kwathoz til, or kuu bee nakow raa na; ne mwii Mari yenta ke kuu now roo baa.
2Tsa lijer ndya Mari ta ndo Simún Pey kon na, ne ne Mari lo rop nee: ―Mlooʼa zha Jesús Zha Nabee leen baa, ne netaa pa ngwalaa zha Jesús.
3Tsa mroo rop nee Pey ne ngwa nee roo baa.
4Ne lijer nda nee rop nee, per masraa lijer ndan nake Pey, ne nerʼn mzin roo baa.
5Tsa mkiitsʼn yekʼn ne mwiin, tsa mwiin re lar kuu mchiix zha Jesús, per mndaabtʼn leen baa.
6Tsaraa mzin Simún Pey ne mndaab Pey leen baa. Ne noga Pey mwii re lar kuu mchiix zha Jesús;
7ne noga mwii Pey lar kuu mchiix zha yek Jesús ne nzibte thibka kon lar kuu mchiix zha Jesús, sinke leey nayiits ne zhaata nzibe.
8Tsa no na mndaab leen baa; tsa mwiin ne ngwalaazʼn kuu ngok.
9Tak ter yen na kuu mbez lo xkiiz Diox, kuu nzhab lee Jesús ndoblo roban xid re zha nguth.
10Ora lee rop nee Pey ndya nee liz nee.
11Per lee Mari Magdalen myaan par dits gax roo baa, ne nzhonn Mari ne nkiits yek Mari mwii Mari leen baa.
12Tsa ngwani chop mandad chaan Diox lo Mari, rop mandad nok lar kuu nakits na ne rop mandad ndob ta mxoob zha kwerp Jesús, thib zha ndob ta mzhoob yek Jesús, lee tedib zha ndob ta mzhoob nii Jesús.
13Tsa nzhab rop mandad lo Mari: ―¿Chebee nzhonna? Lee Mari mkab ne nzhab: ―Nzhonn na tak mbe zha Zha Nabee lon, ne netʼn pa ngwalaa zha zha.
14Ne ngwalo nzhab Mari koree, tsa mtsere lo Mari, ora mwii Mari lee Jesús ndo tya; per net Mari Jesúse.
15Tsa nzhab Jesús lo Mari: ―¿Chebee nzhonna? ¿Cho nkwaana? Per lee Mari mtsow xgab zha kuu nkenap wert mni lo Mari. Tsa nzhab Mari: ―Os lu mbe zha, ne lon naa pa ngwatana zha, tsa gwen zha.
16Tsa lee Jesús nzhab lo Mari: ―¡Mari! Ne lee Mari mtsere lo, ne diiz Hebreo nzhab Mari: ―¡Raboni! ―diz ree nak maestr.
17Lee Jesús nzhab lo Mari: ―Keezta na, tak ter ndyan lo Xutʼn, per gwa ne guz lo re wetsʼn, lee na ndyan lo Xutʼn kuu nak Xut goo, lo Diox kuu nak Diox da ne Diox kuu nak Diox goo.
18Tsa lee Mari Magdalen, myaadne lo re nee kuu mteed lo Jesús, lee Mari mwii Jesús Zha Nabee; ne ne Mari lee Jesús nzhab re koree lo Mari.
19Ne leettsa mziy yezlyu wizaka, kuu nak ner wiz sman, lee re nee zha kuu mteed lo Jesús, mkaltaa nee leen thib yuu ne mtow nee roo yuu, tak nzeb nee ne nee re zha Israel. Tsa lee Jesús mndaab ne mndo ndrol lo re nee, ne ne Jesús lo re nee: ―Tsan, reta goo, ¡nlazʼn wen kwin goo!
20Ngwalo nzhab Jesús kona, tsa mloo Jesús yaa Jesús ne cho Jesús lo re nee, tsa kwathoz naley ngoo leettsoo nee, tak mwii nee Zha Nabee tedib welt.
21Tsa ne Jesús lo re nee tedib welt: ―¡Nlazʼn, wen kwin re goo! Leeka taxal mtaal Xutʼn na. Tabaaka taalʼn goo.
22Ne or ngwalo ne Jesús koree, ora mlaa Jesús lo re nee ne ne Jesús: ―Bkayaa goo Mbi Nayon.
23Loka zha kuu tsow goo perdon falt chaan, tetsow Diox perdon falt chaan zhaʼa; ne loka zha kuu tsowt goo perdon falt chaan, tsowt Diox perdon falt chaan zhaʼa.
24Per lee Mach, kuu nak thib zha lo re tsib chop nee; zha kuu ni nee lo kwach, yent zha or mzin Jesús.
25Bluz tsaraa nzhab nee lo Mach: ―Mwiiʼa nee Zha Nabee. Per lee Mach mkab ne ne lo nee: ―Os leen wiitʼn yaa Zha Nabee ta mtob re zha klab, ne os leen gotʼn kwen yaan ta mtob zha klab, ne gotʼn yaan cho zha, yelaztʼn lee zha mroban.
26Xon wiz bluz; lee re nee mkaltaa leen yuu tedib welt, ne no Mach ndo kon re nee tsya. Ne now roo yuu nzo re nee, per lee Jesús mndaab ne mndeli ndrol lo re nee, ne ne Jesús: ―Tsan reta goo, nlazʼn wen kwin goo.
27Tsa nzhab Jesús lo Mach: ―Wii yaan ne bloo kwena tree, ne bloo yaaʼa chon. Ne gagta zha nad. ¡Sinke gwalaaz leen mroban!
28Tsa lee Mach nzhab: ―¡Lu nak Zha Nabee lon ne Diox da!
29Tsa nzhab Jesús lo Mach: ―Nyelaaza mroban na, tak mwiiʼa na. ¡Wen nda re zha kuu mwiit na ne nyelaaz zha lee na mroban!
30Ne noga mtsow Jesús tedib net re milagr lo re nee, kuu mket lo yeets ree.
31Per lee re diiz ree mkey, tsa yelaaz goo lee Jesús nak Crist Kuu Mtaal Diox Nabee, ne lee zha nak Xgann Diox, ne tsa tsow goo gan yalnaban kuu thitanax.
