Text copied!
CopyCompare
A BUK TABU A MAULANA KUNUBU ma A KALAMANA KUNUBU - Iosua

Iosua 8

Help us?
Click on verse(s) to share them!
1Ma ra Luluai i ga biti tai Iosua dari: Koko una burut ma koko una ururian; una agur pa ra tarai na vinarubu par, ma una tut, ma una vana urama Ai; gire, iau tar tul tar ra king Ai ta ra limam, ma kana tarai, ma kana pia na pal, ma kana gunan bula;
2ma ra lavur magit u ga pait ia tai Ieriko ma kana king, una, pait ia bula tai Ai ma kana king; ia kaka ra tabarikik tana, ma ra umana vavaguai tana, avat a ra pa ia ba kavavat; una tibe ta tarai upi diat a paraparau aro namur ta ra pia na pal.
3Io, Iosua i ga tut, diat ma ra tarai na vinarubu par, upi diat a vana urama Ai; ma Iosua i ga pilak pa ra utul a vinun na arip na marmar na rangrang na tutana, ma i ga tulue diat ta ra marum.
4Ma i ga ve diat dari: Avat a paraparau ure ra pia na pal, aro namur ta ra pia na pal; koko avat a vana vailik kan ra pia na pal, avat a ki na vaninara ka;
5ma avet ma ra tarai par piragu avet a maravai tadav ra pia na pal, ma ba diat a irop upi avet, da dia ga pait ia lua, avet a lop ta ra luaina mata i diat;
6ma diat a irop mur avet tuk tar ta nam ba ave tar al vue diat kan ra pia na pal; tago diat a biti, Dia lop ta ra luaina mata i dat da lua; damana avet a vilau kan diat,
7ma avat a tut kan ra pakana ava parau tana, ma avat a vatur vake ra pia na pal; tago ra Luluai kavava God na tul tar ia ta ra lima i vavat.
8Ma ba ava tar uvia pa ra pia na pal avat a vautunge ma ra iap; varogop ma ra tinata kai ra Luluai damana avat a pait ia; ea, iau tar ve avat.
9Ma Iosua i ga tulue diat, ma dia ga vana ma dia ga paraparau ma dia ga kiki livuan tai Betel ma Ai, ta ra papar a taoai tai Ai; ma nam ra marum Iosua i ga ki pire ra tarai.
10Ma Iosua i ga tut ta ra kavunvun ma i ga tibe ra tarai, ma diat ma ra umana patuana Israel dia ga lue rap ra tarai urama Ai.
11Ma ra tarai par, a tarai na vinarubu nina dia ga varagur me, dia ga vana urama ma dia ga vana maravai, ma dia ga tur ta ra luaina mata i ra pia na pal Ai, ma dia ga ki ta ra papar a labur tana, ma tika na male livuan ta diat ma Ai.
12Ma i ga pilak pa a ilima na arip na marmar na tutana, ma i ga tibe diat upi diat a paraparau livuan tai Betel ma Ai ta ra papar a taoai ta ra pia na pal.
13Damana di ga vaki ra tarai, a kor na tarai par ta ra papar a labur ta ra pia na pal, ma ra tarai na pinarau ta ra papar a taoai tana; ma Iosua i ga ki ta ra bala na male ta nam ra marum.
14Ma ba ra king Ai i ga gire, dia ga tut ra malana ikilik, ma ra tarai ta ra pia na pal dia ga irop upi diat a varubu ma ra tarai Israel, a king ma kana tarai par, ta ra kukuba uro ta ra male Araba; pa i ga nunure ba ra tarai dia ga paraparau upi ia aro namur ta ra pia na pal.
15Ma Iosua ma ra tarai Israel par dia ga papait da di ga uvia pa diat, ma dia ga vilau ta ra nga i vana ra bil.
16Ma dia ga oro varurue ra tarai par ta ra pia na pal upi diat a korot mur diat; ma dia ga korot mur Iosua, ma di ga al vue diat kan ra pia na pal.
17Ma pa ta tutana mulai i ga ki Ai ba Betel, diat par dia ga irop ma dia ga korot mur ra tarai Israel; ma pa dia ga banu bat ra pia na pal, ma dia ga korot mur uka ra tarai Israel.
18Ma ra Luluai i ga biti tai Iosua: Una tulue ra rumu ta ra limam uro Ai, tago ina tul tar ia ta ra limam. Ma Iosua i ga tulue ra rumu ta ra limana uro ta ra pia na pal.

19Ma ra tarai na pinarau dia ga tut lulut kan ra pakana dia ga ki tana, ma dia ga vutvut ba i ga tulue ra limana, ma dia ga olo ta ra pia na pal, ma dia ga uvia pa ia; ma dia ga vautunge lulut ra pia na pal.
20Ma ba ra tarai Ai dia ga lingan namur, dia ga gire ra mi ta ra pia na pal i tubang rikai urama ra bakut, ma i ga dekdek upi diat a lop ta go ra nga ba ta nam ra nga; ma ra tarai nina dia ga lop upi ra bil dia ga talil, ma dia ga ubu diat dia korot mur diat.
21Ma ba Iosua ma ra tarai Israel par dia ga gire ba ra tarai na pinarau dia ga uvia pa ra pia na pal, ma ba ra mi ta ra pia na pal i ga tubang rikai, dia ga talil mulai ma dia ga ubu ra tarai Ai.
22Ma nam diat ta ra pia na pal dia ga vana rikai upi diat; damana dia ga tur livuan ta ra tarai Israel, ta umana tai tika na.papar ma ta ra umana tai ta ra tikai; ma dia ga ubu diat, ma pa dia ga nur vue ta tikai pi na laun valili ba na takap.
23Ma dia ga kinim ra king Ai a launa, ma dia ga agure pa ia pire Iosua.
24Ma ba Israel i ga ubu rit ra tarai Ai ta ra pupui, ta nam ra bil dia ga korot mur diat i tana, ma ba dia ga virua par ta ra mangi na pakat na vinarubu, ma dia ga panie, a tarai Israel par dia ga lilikun uro Ai ma dia ga ub ia ma ra pakat na vinarubu.
25Ma diat dia ga virua ta nam ra bung, a tarai ma ra vaden, a vinun ma a ura arip na marmar diat, a tarai Ai parika.
26Tago Iosua pa i ga likun ra limana nina i ga tulue vaarike ra rumu me, tuk tar ta nam ba i ga kamare vakakit vue ra tarai Ai par.
27Ia kaka ra lavur vavaguai ma ra tabarikik di ga ra pa ia ta ra pia na pal, a tarai Israel iat dia ga vatur vake varogop ma ra tinata ra Luluai i ga ve tar ia tai Iosua.
28Ma Iosua i ga tun vue Ai, ma i ga vue pukue vue upi na da ra anguvai vat pa na mutu, ma ra gunan i lingling ika, tuk tar ta ra bung gori.
29Ma i ga al vatokobe ra king Ai ta ra davai, ma i ga pu tuk tar ta ra ravian; ma ba i tar ong ra keake, Iosua i ga vartuluai, ma dia ga pala vairop ra minatina kan ra davai, ma dia ga vue tar ia ta ra mataniolo ta ra pia na pal, ma dia ga punang taun ia ma ra ngala ma anguvai vat, ma i ki abara tuk tar ta ra bung gori.
30Ma Iosua i ga pait ra uguugu na vartabar upi kai ra Luluai ra God kai Israel ta ra luana Ebal,
31da Moses ra tultul kai ra Luluai i ga vartuluai pire ra tarai Israel, da di ga tumu ia ta ra buk na varkurai kai Moses, tika na uguugu na vat ba pa di mut ia, ba pa ta tutana i ga mal ia ma ra palariam; ma dia ga tul tar ra umana tinabar di tuntun tar ia tadav ra Luluai tana, ma dia ga vartabar ma ra umana tinabar na varmaram tana.
32Ma abara i ga tumu tar ra tinata na varkurai kai Moses ta ra umana vat, ma i ga tutumu ta ra luaina mata i ra tarai Israel.
33Ma ra tarai Israel par, ma kadia lavur patuana ma ra umana raprap, ma kadia umana tena varkurai, dia ga tur ta ra ura papar a bok ta ra luaina mata i ra umana tena tinabar ra tarai Levi nina dia ga puak pa ra bok na kunubu kai ra Luluai, a umana vaira ma ra tarai Israel tuna; a ngungu tarai i ga tur ta ra bit a luana Gerisim, ma ta ra ngungu ta ra bit a luana Ebal, da Moses ra tultul kai ra Luluai i ga vartuluai lua tana, ba diat a tata vadoane value ra tarai Israel.
34Ma namur i ga luk ra lavur tinata na varkurai par, a tinata na varvadoan ma ra tinata na varvabilak, varogop ma ra lavur magit par di ga tumu ia ta ra buk na varkurai.
35Iosua pa i ga nur vue ta tinata ta nam par Moses i ga vartuluai tana, i ga luk vapar ia ta ra luaina mata i ra tarai Israel, ma ta ra luaina mata i ra vaden, ma ra lavur natu i diat, ma ra lavur vaira bula dia ga ki livuan ta diat.