1Wofuŋ e kecʒiŋuc nazawec: “Go ra umbika moc furine barâ jomazemec, erâ opâo mi râetec huzejec.”
2Eme no Wofuŋzi muwec irec sâcko umbika furine barâ jomapo.
3Eme Wofuŋte dâŋ mocwâc fua‐nareme arecne jajahec ewec, ine kecʒiŋuc:
4“Go umbika furine barâ jomameŋ i rorâ Eufrata opâo rarâ ira haroŋaŋ hawecko soŋkezemec.”
5Eme Wofuŋzi naza mutâc ewec irec sâcko ra Eufrata opâo soŋkepo.
6Ʒoaŋ gie bapa bocjaha tarame Wofuŋzi ʒiŋuc nazawec: “Go faharerâ Eufrata opâo ra umbika ira soŋkecmurâ gazapo i ro barezemec.”
7Eme no Eufrata opâo rarâ umbika soŋkepoonec wiserâ ropo. Erâ honepo: Umbika e sâqorewecte wiac irec me irec babajunere sâc mocwâc mi ewec.
8Eme Wofuŋte dâŋ norao kecʒiŋuc fuawec:
9Wofuŋ e kecʒiŋuc mukac: “No irec sâc jaha Juda â Jerusalem jahere pepec penaroŋ sâko bawahape arictac ezejec.
10Ŋicguru hehesicne keci, nore dâŋ mananiŋte qikiŋneeŋgopieŋ, ehuc maŋrâŋgeŋ‐jeŋicte hata âtehuc nemu jabane kiŋaŋ qajarehuc fodape‐jareniŋte jaŋerao qohotaeŋgopieŋ jaŋe umbika kecʒi wiac irec me irec mocwâc mi babajune irec sâc jaha enʒepieŋ.
11Umbika ŋicte ombâŋko bohotahuc fosanaŋkeekac irec sâc jaha Israe kikefuŋ â Juda kikefuŋ sasawa jaŋe norao qohota‐hâmohuc ŋicfâc‐nane â ʒâŋe biŋe‐nane â mumuteŋ‐nane â eri‐nane erâ juniŋte hefârec‐jopapo, jaŋe ine mi manambiŋ.
12“Jeremia, go Israe ŋic ʒiŋuc jazac: ‘Wofuŋ, Israere Anutu e kecʒiŋuc mukac: “Waiŋ kiruŋ sasawa ira waiŋ opâ qapie hurâ fusucmaekac.” ’ Eme jaŋe ʒiŋuc gazaniŋmu: ‘Waiŋ kiruŋ sasawa ira waiŋ opâ qapene huocmu i nâŋe moc kâuc baŋgopeneŋ me?’
13Iŋuc gazapie jazazemec, ‘Wofuŋzi ʒiŋuc mukac: Manaŋgopieŋ, no mâreŋ ʒirec ŋecjucfâc sasawa â Dawidire tuc qarâ eri ŋeŋe‐ticnao ŋicwofuŋ ŋeeŋgopieŋ, â taha bapa â porofete erâ Jerusalem hae rune sasawa jaŋe ejarepe opâ sanaŋ gapemâc nâku maŋsifuc ejarezejec.
14Erâ nonizia ejarepe ŋic âgofâc‐jeŋic qanʒaŋ‐jopaniŋmu, â mame ŋokâ jaŋe qâqâhâmoc eniŋmu. No mi ŋezic‐jopapemu â busâqoc mi mana‐jarepemu, no buuruc wâc mi ejarehuc sipiric‐jopapemu. Wofuŋ nore dâŋ iŋuc.’”
15Wofuŋzi dâŋ muwecte pepec penaroŋ mi ehuc hazec râerâ mananʒepieŋ.
16Ŋoŋe dapâc mi fuaha â ŋafezi tiki mi foŋke‐fârehame kike‐ŋeŋic hepirickenʒipiŋte Wofuŋ Anutu‐ŋeŋic araŋ bacnehuc sâsenʒepieŋ; ŋoŋe tatamacte ʒâŋe fihapie eki mume mâreŋ gâpâreme dapâc qisiric fuazacte iŋuc hâcne enʒepieŋ.
17Mi mananiŋmuo ine no pepec penaroŋ‐ŋeŋicte erâ soŋsoŋko mâretec kiohuc jupemu; Wofuŋte lama guru kâpâcwâru bacjopa raniŋmure ʒâŋeuc‐nane bocjaha wahahuc domaocmu.
18Ŋicwofuŋ â neŋgoc‐ticne ŋokac bomboŋ jahe ʒiŋuc jazac: “Eridu‐ŋekic ʒâŋe rara biaŋ i qizec‐ŋekickonec biac hockerâ wahawecte ŋeŋe omanao waha ŋezepirec!”
19Negebe wâneŋko hae ŋerakac irec motâc basanaŋke‐fârekicne, moczi rome mi aŋkeocmu; Juda kikefuŋ ʒeŋgoma kâpâcwâru bacjopa rapie nâfocne moc mi juniŋmu.
20“Ŋoŋe qâhâŋnerâ fipie rame faic mâreŋkonec warehuc juŋgopieŋ jaŋe honec‐jopaniŋ. Lama guru gorao râec‐jopakicne jaŋe weni, lama gurufâcge biaŋne jaŋe hâcne?
21Eme go gahac âgo egareniŋte boc hefârec‐jopameŋ jaŋe bomboŋ egareniŋte mujareme weniŋuc mucmu? Go ŋokac gozi kime ʒâic fâro manaekac ʒâic iŋucne mi manacmu me?
22Eme ‘Wiac busâqocnehec iŋucne wemocte fai‐naneo fekac’, go iŋuc mu wioc erâ ʒiŋuc manazemec: Kiŋ bahacge ŋemâcnere erâ ŋaqi qoruc hetara‐garepie mimige fuazejec.
23Etiopia ŋic e sahac‐ticne sâcne hetikieme moc eocmu me? Me qowi mimicne lepad e sahac‐ticne qâqâreŋ hetikieme moc eocmu me? Iŋuc fome muzac ine sâqocne bahuc jueŋgopieŋ ŋoŋe iŋuc jaha wiac biaŋne ezo murâ sâcne enʒapiŋ.
24Irec no mâreŋ sawaonec mâŋâŋ sâkozi padi jawa bawiseekac irec sâc bâtâtiec‐ŋopapemu.
25Wiac fua‐gareocte mupo â kâdoc qagarepo iŋuc hâcne. Go nore nikecgume burecdâŋko roweckemeŋte
26no ŋaqi qoruc hetara‐garepe mimige tâtâc fuazejec.
27No boe sauge mecne, sasecgere ojawa mecne, sasec giege repicne mecne erâ tikio â gieo qâpuc wiac mamakâcne bajuekic i mâmâc hone manac efârepo hâcne. Jei, Jerusalem, go mo dameŋko wiac i qikiŋnerâ ɋaɋacne moc jucmu?”
