1Ojai, qizec‐nane i opâ ʒâkâŋ eha ʒâŋeuc‐nane i opâ ʒâŋe iŋucne ezac me! Eme no ŋafe ʒoaŋ ŋicfâc‐nane qâhâmoc‐jopakicne jaŋere erâ kiohuc juzapo.
2Ojai, mâreŋ sawao boze‐nane moc ŋeme muzac no ŋicfâc‐nane behec‐joparâ ira ra juzapo! Jaŋe boe sau ŋic sasawa, erâ ŋicguru eeatuc‐jeŋichec.
3Nameŋ‐jeŋic i tepeo gurutuc âtepie huekac irec sâc ecneŋgopieŋ, ehame jauŋ fârizi mâcne, burecdâŋzi mâreŋ‐jeŋicko sanaŋkeekac; jaŋe hehesiczi hehesic bâfuaeŋgopieŋ, ehuc no mi manacnueŋgopieŋ, Wofuŋ nore dâŋ iŋuc.
4Ŋoŋe ʒeŋgoma âgofâc‐ŋeŋic jaŋere sawaŋ‐ŋeŋic qahuc junʒepieŋ, ehuc qomâfâc‐ŋeŋic jaŋerao wâc mi roweckenʒepieŋ; jaŋe docbapa sasawa â âgofâc‐ŋeŋic jaŋe wâc micko âkec eeŋgopieŋ.
5Jaŋe ʒeŋgoma âgofâc‐jeŋic eatuc‐jopaeŋgopieŋ, ehuc moczi moc dâŋ fâri qizecne mi muekac; jaŋe nameŋ‐jeŋiczi burecdâŋ muocte esockeeŋgopieŋ, erâ qac qâsoric eku risieniŋte mi afeckeeŋgopieŋ.
6Jaŋe bâbâʒâiczi bâbâʒâic â eatuczi eatuc bâfuaeŋgopieŋ, ehuc no manacnuniŋte ine mi ejareekac, Wofuŋ nore dâŋ iŋuc.
7Irec Anutu Tâpiri Ɋuŋɋasaŋ Wofuŋzi ʒiŋuc mukac: “Manakic, no ʒocko rikec‐jopahuc ba esâic ejarepemu. Iŋuc mi ehuc ine ŋicfâc‐nane weniŋuc ejarepe sâckeocmu?
8Jaŋe nameŋ‐jeŋic i tepe motec hâmoc bâbâfua iŋucne, eatuc dâŋ muekac hâcne; miczi âgofâc‐jeŋic jaŋehec wamadâŋ mueŋgopieŋ, maŋjeŋiczi ine bitiŋ râe‐jareniŋte dâŋne manasu biric eeŋgopieŋ.
9Wiac iŋucnere mi bâtiŋ‐jopazapo me? Â ŋicguru iŋucne okacne mi bazu‐jarezapo me? Wofuŋ nore dâŋ iŋuc.
10“Tiki jaŋere erâ ki mamakuc eniŋ, â mâreŋ sawao lama bulimakao sopâc kecɋaŋ fua‐jarewec irec kio owa eniŋ, i hâmo ɋaŋac ekicnere moczi moc sicne fotâc mi eocmu, â lama bulimakao jaŋe ira mocwâc mi dâŋepie mananiŋmu; sawa wipe mecne, qowi mecne jaŋe mâmâc jaha irecnec wiserâ ratâmirembiŋ.
11No Jerusalem hae qâropiepe ŋetâc qâtâtieme hae sesucne fuarâ foocmu, ehuc kâte qâto jaŋere ŋeŋe hae eocmu; no Judare hae sâko ŋerakac i wâc ima bape maŋnao ŋiczi ŋeŋe juju mocwâc mi eniŋmu.”
12Mâreŋ i fuŋne weniŋucte sipirickerâ tuhu mâreŋ iŋucne niniŋ siarereŋ foha moczi moc sicne fotâc mi eekac? Irec fuŋne i mo ŋiczi maŋɋârâŋhec juhuc mana tarazac? Me Wofuŋ, go micdâŋge i mo ŋic âzâcnetec mufuazac?
13Jeremiazi iŋuc wiome Wofuŋzi ʒiŋuc muwec: “Jaŋe sâcmutâc dâŋnane jarepo i behembiŋ, â dâŋnane mana rereŋ mi embiŋ, ehuc irec sâcko mi jumbiŋ.
14Jaŋe ine maŋrâŋgeŋ ehuc jaŋacne dâŋ reŋkembiŋ, â mamacfâc‐jeŋic jaŋe qazu‐jarembiŋ irec sâc ehuc Baali nemu fuŋne fuŋne bâjâpec‐jopambiŋ.
15Irec Anutu Tâpiri Ɋuŋɋasaŋ Wofuŋ, Israere Anutu no ʒiŋuc mukopac: Manakic, no ŋicguru ʒi kegocjâc hâtâ qiŋqiŋne â qotâre micopâ gumec‐jopapemu.
16No bâtâtiec‐jopape ŋicne ŋicne, jaŋacne â mamacfâc‐jeŋic jaŋe mi manac‐jopambiŋ, jaŋere ŋondeŋko siŋsaŋ qarâ juniŋmu, ehame mupe râpefuŋ‐jeŋicko ʒika fuame hâmo sipiric efârenʒepieŋ.”
17Anutu Tâpiri Ɋuŋɋasaŋ Wofuŋ e ʒiŋuc mukac: “Ŋoŋe irec manasurâ ŋokac ki soŋgâŋ eeŋgopieŋ jaŋe wira‐jarepie warenʒepieŋ, ehuc ki mamakucte fuŋne mamana ŋokac jaŋe wâc fisiniŋte dâŋ râepie razejec.
18Eme jaŋe berec jaha ware fisirâ nâŋere erâ ki mamakuc epie ʒâŋeuc‐nâŋec bocjaha wahazejec.
19Manac, Zioŋkonec kigaere fânâŋ fisime manaŋgopeneŋ: ‘Jei, ro waha âte enârekicne i hâhâwicne, â fai‐nâŋecko mimi busâqoc fewec i hâhâwicne jaha. Jaŋe fic hae‐nâŋec heroc qâropiembiŋte mâreŋ‐nâŋec behembeŋ.’”
20Ŋokac bureŋ, ŋoŋe Wofuŋte dâŋ mananiŋ, â micdâŋ‐ticnere hazec râeniŋ; otâfâc‐ŋeŋic ki soŋgâŋ eere fuŋne qazu‐jareniŋ, ehuc ŋaŋackoaŋ kigae qaqazuc eniŋ.
21Hâmoczi ficne ficne rocnâpohuc ŋicwofuŋ ficko raʒiwec wâc, ehuc naru motec jaŋe hae ʒoŋao â ŋicmotec jaŋe tutumaŋte tomao juhapie mâmâc rocjopawec hâcne.
22Go jazac, “Wofuŋte dâŋ kecʒiŋuc fokac: ‘Ŋic qâŋɋâŋfâc‐jeŋic jaŋe jawa iŋucne gieo forahuc mâreŋte guec enʒepieŋ, erâ qa roro ŋic jaŋe râpefuŋ‐jeŋicko padi ɋiti râepie foraekac irec sâc fohapie moczi moc ro nusec mi ejareocmu.’”
23Wofuŋzi kecʒiŋuc mukac: “Maŋɋârâŋheczi maŋɋârâŋ‐ticnere erâ mumuteŋ dâŋ mi muzejec, tâpiriheczi tâpiri‐ticnere erâ mumuteŋ dâŋ mi muzejec, â moneŋ mafaheczi moneŋ mafa‐ticnere erâ mumuteŋ dâŋ mi muzejec wâc.
24Aricne, moc e mumuteŋ dâŋ muzo murâ ine maŋɋârâŋhec juhuc no manacnukacte erâ muzejec. Wemocte? Wiac no Wofuŋ jukopaczi mâreŋko aki anonoc, sâcmutâc dâŋ tiŋne â tiŋne jujure hata bâfuaekopac i! No wiac iŋucnere mana aŋac eekopac hâcne, Wofuŋ nore dâŋ iŋuc.”
25Wofuŋzi ʒiŋuc mukac: “Manakic, dameŋ moc maickeocmu ira sahacko maheczi ma tâmiric tinac jueŋgopieŋ jaŋe ʒeŋgoma bâtiŋ‐jopapemu.
26Ine Aigita ŋic mecne, Judaŋic mecne, Edomŋic mecne, Amoŋŋic mecne, Moabi ŋic mecne, erâ mâreŋ burocnere ŋecjucfâc qizec susuc‐jeŋic naki ŋifec â ŋifec sawa bâtâcneeŋgopieŋ jaŋe mâmâc. Qâpuc ŋicne ŋicne jaŋe jâmbomac sahacko ma tâmiric jueŋgopieŋ, Israe kikefuŋ jaŋe ine furu jaha sahacko ma i foipie‐jareha maŋjeŋiczi mâc foekac.”
