1Eme Jeremia e momori jaŋere sacmaŋko niŋgiŋko jaha juhame Wofuŋtaonec dâŋ mocwâc fuacneme arec jajahec ewec, ine kecʒiŋuc:
2“Wiacte wiac bâfua‐fâreekac â fua taniŋkeocte manatâc qâtâc eekac, ʒâŋene Wofuŋ, eki hâcne ʒiŋuc mukac:
3Go wira basac enaretec micgao ropemu, ehuc wiac qeŋ bipinehec â qame hukicne, goki kâuc baekic i hâcne gaza gowatuc epemu.
4Hae kecʒirec fic â Juda ŋicwofuŋ jaŋere fic â somâre ʒae wiac ima qahuc râsi sanaŋke‐jarenʒepeneŋ muhuc heropiembiŋ, fic irec Wofuŋ Israere Anutu no ʒiŋuc mukopac:
5No hehesic‐jeŋic sasawa irec erâ hae ʒi ʒâŋe mai‐nane bâsoŋkecnehuc aaricko â kimbeŋko jopapo ŋic i jaŋere qâŋɋâŋ i Kaldea ŋic jaŋe ware ʒika qahuc fic i hefuseniŋmu.
6Manakic, no hae i heɋârerâ bâpiaŋkepemu, ehuc rune jaŋe wama fofo dunduŋ â fofo sanaŋ bâfua‐jarepemu.
7Erâ Juda â Israe ŋic busâqoc faio juju‐jeŋic i hetikiepe bubiaŋ faio juju‐jeŋic fua‐jareocmu, ehame bâpiaŋ‐jopapemu.
8Jaŋe sâqocne bahuc bunaneo bambiŋ irec kiŋ bârâriehuc baɋaɋac‐jopapemu, â sindaŋ ehuc râpecnumbiŋ irec kiŋ bahac i bâtâmire‐jare‐fârepemu.
9Eme Jerusalem hae i wiac biaŋne sasawa ecnepe mâreŋko ŋicne ŋicne mananiŋmu sâc jaŋere maio mumuteŋ‐nane â aŋac‐nane â ʒeri‐nane â ʒâŋe rara biaŋ‐nane ezejec. Eme wiac biaŋne â wama bâfuacne‐fârepe honerâ bipic tatara ejareha ɋarac ɋarac qanʒepieŋ.”
10Wofuŋzi kecʒiŋuc mukac: “Hae mâreŋ ʒira, ŋoŋe ŋic â qowi tâmiric tuhutac fokac ira wiac kecʒiŋucte fânâŋ mocwâc fuame mananʒepieŋ:
11Aŋac ʒeri â daŋge bubiaŋ â ŋic ŋokac biŋe qaqac eejare; erâ Wofuŋte ufuŋko daŋge taha bafehuc hahaŋne barâ ʒiŋuc muniŋmu, jaŋere ʒeri fânâŋ mâmâc: ‘Anutu Tâpiri Ɋuŋɋasaŋ Wofuŋ e mumbiaŋkeniŋ! Wofuŋ e uruc jauŋ‐ticnehec hâcne, â aki anonoc‐ticne fofo sanaŋ foocmu!’ No mâreŋ ʒira busâqoc faio juju fokac i hetikiepe mârâc bubiaŋ faio juju fowec irec sâc fuarâ fozejec, Wofuŋ nore dâŋ iŋuc.”
12Anutu Tâpiri Ɋuŋɋasaŋ Wofuŋ e ʒiŋuc mukac: “Mâreŋ ʒi ŋic â qowi tâmiric tuhutac fokac erâ hae‐ticne ŋerakac ira mâreŋ kecɋaŋnehec mocwâc fuazejec, eme lama soŋaŋ jaŋe ira lamafâc‐jeŋic ejarepie waha fomananʒepieŋ.
13Tiki mâreŋko me wâneŋko me Negebe mâreŋko me Benjamiŋ mâreŋko me Jerusalem rârec rârec me Juda mâreŋko hae ŋerakac ira lama wosec‐jopaekaczi soŋaŋ‐jopahame mocwâc sicne fotâc enʒepieŋ. Wofuŋ nore dâŋ iŋuc.”
14Wofuŋzi kecʒiŋuc mukac: “Manakic, dameŋ moc maickeocmu ira Israe â Juda kikefuŋ jaŋere mumupaŋ dâŋbiaŋ mupo i fârio qaocmu.
15Ehame ʒoaŋ dameŋ ira mupe Dawidire oso gitecne tiŋne moc fuazejec, eme eki hâcne mâreŋko gie‐ticne mumutiŋ dâŋ â tiŋnere sâcko bahuc juzejec.
16Dameŋ ira Juda bafickezo â Jerusalemko wama foocmu, ehame hae irec ʒâŋe ʒiŋuc muniŋmu: ‘Wofuŋ e tiŋne‐nâŋec.’”
17Wofuŋ e kecʒiŋuc mukac hâcne: “Israe kikefuŋte eri ŋeŋeo ŋic babasa i Dawidirao mi fuazejec.
18Eme ŋic moc dameŋ sâc nore maio qowi bâzi rikeocte me taha bâzi rikeme hosâc‐ticne feocte me bâzire qowi qa hezuc eocte ŋic babasa i Lewire taha bapafâc jaŋerao mi fuazejec.”
19Eme Wofuŋte dâŋ Jeremiarao ʒiŋuc fuawec:
20“Wofuŋzi kecʒiŋuc mukac: No ŋafe â ʒoaŋ jahehec ʒâʒâfic epo i ŋoŋe sâcne hetâcnepie ŋafe furec sâckoa mocwâc mi eocmuo
21ine kiŋaŋŋic‐nane Dawidi ehec ʒâʒâfic epo i iŋuc jaha sâcne hetâcnezo, eme ŋokâ‐ticne moc mi fuarâ eri ŋeŋe‐ticnao ŋicwofuŋ ŋeocmu, â Lewi guruonec taha bapa, kiŋaŋ qaqafâc‐nane jaŋehec ʒâʒâfic epo i wâc sâcne hetâcnezo.
22Sambâŋko bâpiŋ ŋerakac i sâcne mi wowosene â hâwecmecko moŋgeŋ forakac i fiahuc sâcticne sâcne mi mamanane, eme no kiŋaŋŋic‐nane Dawidire ɋâricfâc â Lewire guruonec nore kiŋaŋ qahuc juniŋmu jaŋe basawec‐jopape irec sâc jaha enʒepieŋ.”
23Wofuŋte dâŋ Jeremiarao kecʒiŋuc fuawec:
24“Ŋic keci jaŋe dâŋ muhuc jueŋgopieŋ i moc hone manac ekomec me? Ine ʒiŋuc: ‘Wofuŋ e ŋicguru jajahec bâwosâec‐jofawec i hâcne hone suŋgiŋ ejactekac.’ Jaŋe iŋuc muhuc ŋicfâc‐nane qaisoc‐jopaeŋgopieŋ, ehuc jaŋere manapie ŋicguru moc buc mocwâc mi juŋgopieŋ ekac.
25Irec Wofuŋ no ʒiŋuc mukopac: No ŋafe â ʒoaŋ jahehec ʒâʒâfic epo, erâ sambâŋ â mâreŋ jahere sâcmutâc râepo i moc behepe omaeocmuo
26ine Jakobo â kiŋaŋŋic‐nane Dawidi jahere ɋâricfâc jaŋe wâc hone suŋgiŋ ejarepemu. Erâ jaŋere guruonec Abraham â Isaka erâ Jakobo ɋâricfâc‐jeŋic jaŋere ŋicwofuŋ mocwâc mi rowosâec‐jopapemu. No busâqoc faio juju‐jeŋic i hetikiepe bubiaŋ faio juju fua‐jareme aki anonoc ejarepemu hâcne.”
