1Wofuŋzi kecʒiŋuc muwec: “Go hurâ Judare ŋicwofuŋ ere ficko ferâ dâŋ ʒiŋuc mufuazemec:
2‘Judare ŋicwofuŋ, Dawidire eri ŋeŋeo ŋekomec, go â kiŋaŋ qaqafâcge erâ motâc ʒirâ raʒic wefuc eeŋgopieŋ ŋoŋe mâmâc Wofuŋte dâŋ mananiŋ!
3Wofuŋzi ʒiŋuc mukac: Ŋoŋe mumutiŋ dâŋ â tiŋne juju dopeckehuc junʒepieŋ, ehuc ro waha âte ejarekicne jaŋe bâbâʒâic ŋic ere meonec batarac‐jopanʒepieŋ; ŋic jabane â hozec bekâ jaŋe fific mi bacjopanʒepieŋ, erâ ŋic jopa qâʒâic eejare me soc bahacmâc hohoŋke i hae ʒira wâc mi fuazejec.
4Ŋoŋe dâŋ keci mana rereŋ ejâmbâŋ‐keniŋmuo ine ŋicwofuŋ Dawidire eri ŋeŋeo ŋeniŋmu jaŋe fic kecʒirec motâcko mocwâc wefunʒepieŋ, erâ jaŋe mecne, kiŋaŋ qaqafâc‐jeŋic mecne â ŋicfâc‐jeŋic jaŋe mâmâc becâsic keretacko ŋehuc rac warec enʒepieŋ.
5Ŋoŋe dâŋ keci mi mananiŋmuo ine erific ʒi sesuctac fuarâ foocte no nahacnao ɋetickehuc mupaŋkekopac, Wofuŋ nore dâŋ iŋuc.
6Wofuŋ no Juda ŋicwofuŋ erific‐ticnere ʒiŋuc mukopac: “‘No gore manape Gileade mâreŋ iŋucne â Lebanoŋ tiki botâŋne irec sâc ekomec; ʒi ine ima bacgupe hae sesucne â tuhutac erâ fozemec.
7No ŋic sipiricguniŋte ʒikare wiac‐jeŋichec bâwosâec‐jopapemu, eme jaŋe jâmâzâcge biaŋne jâmbâŋ i qafararâ ʒocko behepie ʒazejec.
8“‘Eme ŋicne ŋicne guru sâko jaŋe hae ʒi jâuruhuc jaŋackoaŋ muc manac erâ ʒiŋuc muniŋmu: “Wofuŋ e fuŋne weniŋucte hae sâko keci wiac iŋucne ecnewec?”
9Iŋuc mu wioc epie ʒiŋuc bâtikie‐jareniŋmu: “Jaŋe Wofuŋ Anutu‐jeŋic ehec ʒâʒâfic ekicne i hetâcnerâ nemu gâcne jaŋe fodape‐jarehuc kiŋaŋ qajare jumbieŋte.” ’”
10Ŋoŋe hâmokicne ere mi kioniŋ, â ere mu mamakuc wâc mi eniŋ, aricne, mâreŋ‐ticne beherâ rawec ere ine jâmbomac kionʒepieŋ, eki hâcne mocwâc mi risieocmu, â fufua mâreŋ‐ticne mocwâc mi honeocmu.
11Josiare ŋokâ, Juda ŋicwofuŋ Salum hâcne, e mamac‐ticne Josia ere tuc qarâ ŋicwofuŋ juweczi mâreŋ ʒi beherâ rawec, ere hâcne Wofuŋzi ʒiŋuc mukac: “E ʒira mocwâc mi risie wareocmu.
12Aricne, e kâpâcwâru barâ barambiŋ ira hâmozejec, mâreŋ ʒi ine mocwâc mi honezejec.”
13“Jei, ŋic keci! E sindaŋ ehuc ficticne baekac, â eebapa repicne ehuc fic maŋne maŋne bâfuaekac, erâ âgo‐ticne, kiŋaŋ mâc qanarezejec muhuc gie furi mi râcneekac.
14Ehuc muekac, ‘No ficsâko maŋne maŋne kâcɋene iŋucne moc bape, ehuc qâqâtâc kataŋ‐ticne barâ maŋne jâmâzâc paraŋzi bâpiaŋkerâ peŋ bâbâroŋzi rikepemu.’
15Go fic jâmâzâczi bacmurâ ʒoɋac ehuc ŋicwofuŋ jujugere fuŋne bataniŋkezo mukomec me? Mamacgezi weniŋuc ewec? E nânâ opâ nâhuc juwec, erâ mumutiŋ dâŋ â tiŋne juju foocte giene bawec. Iŋuc ehuc sâcne juhâmowec.
16E ro waha âte ejarekicne â qarâ suriŋne jaŋere dâŋ dopeckewecko wiac biaŋkerâ fowec; eme ŋic iŋucnere, no mana taracnukac, mi muzo me? Wofuŋ nore dâŋ iŋuc.
17Gore ʒâŋe â mamanasuzi ine moneŋ mafare â ŋic bahacmâc jaŋere soc hoŋkezore erâ ŋic fific bacjopahuc bâʒâic‐jopazore sawa domaekac.”
18Irec Wofuŋzi Josiare ŋokâ, Juda ŋicwofuŋ Jojakim hâcne ere ʒiŋuc mukac: “Ere mu mamakuc ehuc ʒiŋuc mi muniŋmu: ‘O hahac‐nane, o seŋnane!’ Erâ ʒiŋuc wâc mi muniŋmu: ‘O bomboŋ fekicne, o eri qaraweŋ‐ticnehec!’
19Aricne, e doŋgi iŋucne duckenʒepieŋ, fârerâ ra Jerusalem haere motâc ocniŋuc taicko behepie fozejec.”
20“Go Lebanoŋ tikio ferâ kio owa ec, Basaŋ mâreŋko marac fânâŋge fuaoc; kifânâŋgezi fuarâ Abarim tikionec wahaoc, jorocfâcge jaŋe henʒaŋ‐jopa‐fârekicne irec.
21Go mana mezac tâmiric juhaŋtec dâŋ gazapo, goki ine mumeŋ, ‘No manaŋore takicnukac.’ Go ɋiegaonecteaŋ iŋuc ehuc jumeŋ hâcne, ehuc dâŋnane mana rereŋ mi emeŋ.
22Ʒi ine mâŋâŋzi lama soŋaŋfâcge ficne suec‐jopame raniŋmu, ehame jorocfâcge jaŋe kâpâcwâruo bacjopa raniŋmu wâc. Iŋuc fuame hehesicge sasawa irec erâ mimi busâqoczi faigao feme qurutuazemec.
23Lebanoŋ tikio ŋec juc ehuc jâmâzâc hahaŋko sareŋge ba akic ekomec go ŋokac gozi kime ʒâic serereŋ manaekac ʒâic irec sâc fua‐gareme kio huse wemo afecne ecmu!”
24Wofuŋzi dâŋ kecʒiŋuc muwec: “No jujâmbâŋkekopacte ine Jojakimte ŋokâ Konia, Juda ŋicwofuŋ hâcne, go mefâre‐naneo meo fefe maqâreŋhec iŋucne fotec muzac sifu hetaracguzapo.
25No jujuge sipirickezo muŋgopieŋ â hâhâwic bajareekic jaŋere meo râecguzepac, ine Babe ŋicwofuŋ Nebukaneza â Kaldea ŋic jaŋere meo hâcne.
26No go â neŋgocge rocguwec e mâmâc jaha mâreŋ mocko, mi fuapicko ira hâcne tuŋŋofape juku hâmozepirec.
27Â risienicte maŋ hâhâŋ eŋacteekac mâreŋ ira ine moc mi risiezepirec.”
28Eme Jeremiazi muwec: “Ŋic keci, ʒâŋeŋe Konia e kuʒi sâqocne qanʒaŋnekicne me râqâc qaisockekicne iŋucne me? E â ɋâricfâc‐ticne jaŋe wemocte mâreŋ moc mi manambiŋko tuŋjopakicne â jâpec‐jopakicne?
29O mâreŋ, mâreŋ, mâreŋ, go Wofuŋte dâŋ manac!
30Wofuŋzi kecʒiŋuc mukac hâcne: ‘Ŋic keci e naru motec tâmiric, fuŋne‐ticne iŋuc qâreŋkeniŋ; e mâreŋko juocmu sâc ba bititic ehuc juzejec, â ɋâricfâc‐ticne jaŋeraonec moczi Dawidire eri ŋeŋeo ŋehuc Judare ŋicwofuŋ juocte hatane mi fuacnezejec.’”
