Yeremi 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Yinni Gusunɔ u nɛɛ, nɛ, Yeremi, n doo n kpɑkɑ dwe kpɑ n ye sɛ̃kɑ pɔrɑɔ, ɑdɑmɑ n ku ye doke nim sɔɔ.

²Mɑ nɑ kpɑkɑ ye dwɑ nɑ sɛ̃kɑ pɔrɑɔ nge mɛ u mɑn sɔ̃ɔwɑ.

³Mɑ Yinni Gusunɔ u kpɑm nɛɛ,

⁴n kpɑkɑ ye suo kpɑ n se n dɑ dɑɑ te bɑ mɔ̀ Efɑrɑtiɔ kpɑ n ye bere mi, kpee wɔru gɑgu sɔɔ.

⁵Mɑ nɑ seewɑ nɑ dɑ nɑ ye beruɑ mi, nge mɛ u geruɑ.

⁶Ye n tɛ, u mɑɑ nɛɛ, n wuro Efɑrɑti mi, kpɑ n kpɑkɑ ye suɑmɑ ye u rɑɑ nɛɛ, n bere mi.

⁷Mɑ nɑ seewɑ nɑ dɑ nɑ kpɑkɑ ye suɑ mi yɑ rɑɑ beruɑn di. Adɑmɑ nɑ deemɑ wee, yɑ sɑnkirɑ yɑ ǹ mɑɑ gɑru koorɔ.

⁸Yerɑ Yinni Gusunɔ u mɑn sɔ̃ɔwɑ u nɛɛ,

⁹nge mɛyɑ u koo Yudɑbɑ kɑ Yerusɑlɛmugibun tii suɑbu kpeerɑsiɑ.

¹⁰U nɛɛ, bɑ sɑ̃ɑwɑ tɔn kɔ̃sobu, bɑ ku rɑ wure bu win gɑri nɔ. Ben gɔ̃ru kĩrun gɑriyɑ bɑ rɑ n yɔ̃rɑri, kpɑ bɑ n bũnu yiirɑmmɛ bɑ n sɑ̃ɑmɔ. Bɑ koo kowɑ nge kpɑkɑ ye, ye yɑ ǹ mɑɑ gɑru koorɔ mi.

¹¹Nge mɛ bɑ rɑ kpɑkɑ sɛ̃ke pɔrɑɔ, nge mɛyɑ u rɑɑ Isirelibɑ kɑ Yudɑbɑ kpuro suɑ u tii sɛ̃ke bɑ n kɑ sɑ̃ɑ win tɔmbu, bɑ n win yĩsiru sɔɔwɑ, bɑ n sɑ̃ɑ win burɑru, kpɑ tɔmbɑ n nùn siɑrɑmɔ ben sɔ̃. Adɑmɑ bɑ ǹ win gɑri wure. Wi, Yinni Gusunɔwɑ u yeni geruɑ.

¹²Yinni Gusunɔ u nɛ, Yeremi sɔ̃ɔwɑ u nɛɛ, n doo n nɛn tɔmbu Isirelibɑ sɔ̃ mɑ wi, ben Yinni, u geruɑ u nɛɛ, tɑm bwɑ̃ɑrɑ wɑ̃ɑwɑ tɑm sɔ̃. Adɑmɑ bɑ̀ n wisɑ bɑ nɛɛ, bɑ yɛ̃ mɛ,

¹³sɑɑ yerɑ kon bu sɔ̃ n nɛɛ, mɛsumɑ wi, Yinni Gusunɔ u geruɑ. U nɛɛ, u koo de win mɔru yu ko nge tɑm mɛ mu koo Yerusɑlɛmun tɔmbu kpuro go, kɑ sinɑm be bɑ sɔ̃ Dɑfidin sinɑ gɔnɑ sɔɔ, kɑ yɑ̃ku kowobu, kɑ win sɔmɔbu, tem mɛn tɔmbu kpuro gesi.

¹⁴Kpɑ bu soonɑ bu kɔsukunɑ, bɑɑbɑ kɑ bii, u ǹ ben goon wɔnwɔndu mɔ̀. Gɑ̃ɑnu mɑɑ sɑri ni nu koo nùn yɔ̃rɑsiɑ sere u kɑ be kpuro go.

¹⁵Bɛɛ, Isirelibɑ, i swɑɑ dɑkio i nɔ, ye nɑ gerumɔ. I ku mɑɑ tii suɑ, domi Yinni Gusunɔ u kɑ bɛɛ gɑri mɔ̀.

¹⁶I Gusunɔ bɛɛn Yinni bɛɛrɛ wɛ̃ɛyɔ u sere kɑ yɑm wɔ̃kuru nɑ te tɑ koo de i sokukirɑ guunu wɔllɔ. Mɛyɑ i yɑm bururɑm mɑrɑ, ɑdɑmɑ u koo de mu tĩrɑ mɑm mɑm kpɑ mu gɔsiɑ yɑm wɔ̃ku bɑkɑru nge te tɑ wɑ̃ɑ gɔribun wɑ̃ɑ yerɔ.

¹⁷Ì kun gɑri yi swɑɑ dɑki, kon dɑ n swĩ bɔkuɔ bɛɛn tii suɑ bin sɔ̃. Kon nɔni yĩresu yɑri n bɑndɑ. Domi bɑ koo bɛɛ Yinni Gusunɔn tɔmbu yoru mwɛɛri bu kɑ dɑ tem tukumɔ.

¹⁸Yinni Gusunɔ u mɑn sɔ̃ɔwɑ u nɛɛ, n sinɑ boko kɑ win mɛro sɔ̃ɔwɔ n nɛɛ, bu sinɔ temɔ domi ben sinɑ furɔsu wɔrukɑ si su sɑ̃ɑ ben burɑru.

¹⁹Wee, wuu si su wɑ̃ɑ sɔ̃ɔ yɛ̃sɑn nɔm dwɑru giɑ Nɛgɛbuɔ, sin tɔmbɑ doonɑ kpuro, mɑ wuu si, su kɛnuɑ. Goo sɑri wi u koo mɑɑ su kɛniɑ, domi bɑ sin tɔmbu Yudɑbɑ gurɑ kpuro sem bɑ kɑ doonɑ tem tukumɔ.

²⁰Wunɛ Yerusɑlɛmu, ɑ nɔni seeyo ɑ wɑ, wee, wunɛn yibɛrɛbɑ bɑ wee sɔ̃ɔ yɛ̃sɑn nɔm geu giɑn di. Mɑnɑ tɔn be nɑ rɑɑ nun nɔmu sɔndiɑ bɑ wɑ̃ɑ, bèn sɔ̃ ɑ rɑɑ bɛɛrɛ mɔ.

²¹Be bɑ rɑɑ nun sokumɔ yinni, bɑ̀ n nun sɛɛyɑsiɑbu nɑ, mbɑ kɑɑ gere. Sɑɑ ye sɔɔrɑ wuriribu bu koo nun deemɑ nge tɔn kurɔ wi u yiire u kĩ u mɑ.

²²Kɑɑ tii bikiɑ gɔ̃ruɔ ɑ nɛɛ, mbɑn sɔ̃nɑ yeni yɑ nun deemɑ. Wunɛn torɑ dɑbinun sɔ̃nɑ bɑ wunɛn bekuru potɑ kɑ dɑm bɑ nun sekuru doke.

²³Etiopigii u koo kpĩ u win wɑsin gɔnɑ kɔsi? Musuku gbeeku gɑ koo mɑɑ kpĩ gu gen sɑnsun bɑusu kɔsi? Aɑwo. Nge mɛyɑ bɛɛ be i kɔ̃sɑn dɔɔnɛ mɔ, i ǹ kpɛ̃ i geɑ ko.

²⁴Yen sɔ̃, kon bɛɛ yɑrinɑsiɑwɑ nge mɛ woo gɑ rɑ yɑkɑsu yɑrinɑsie gbɑburɔ.

²⁵Wunɛ, Yerusɑlɛmu, yèn sɔ̃ ɑ nɛ, Yinni Gusunɔ duɑri, mɑ ɑ wunɛn nɑɑnɛ doke weesu sɔɔ, wee ye nɑ nun yiiye.

²⁶Kon wunɛn bekuru gbɑbiɑ kpɑ bu wunɛn tereru wɑ.

²⁷Nɑ wɑɑmɔ sɑkɑrɑru kɑ kuuki yi ɑ mɔ̀, sɑnɑm mɛ ɑ bũnu gɑsirimɔ ɑ sɑ̃ɑmɔ guunu wɔllɔ kɑ yɑkɑsɔ. Yɑ sɑ̃ɑwɑ gɑ̃ɑ kɔ̃sunu nɛn nɔni sɔɔ. Yen sɔ̃, wunɛ Yerusɑlɛmu, kɑɑ kɑm ko ɑ̀ kun tii dɛɛrɑsie. Sɑɑ yerɑ̀ ɑ mɑrɑ, ɑ kɑ tii dɛɛrɑsiɑ.