1Zedekia e Juda ŋicwofuŋ erâ juhame jara 9 tataranao mosa namba 10 ira Babe ŋicwofuŋ Nebukaneza e momorifâc‐ticne sasawa rocjopame fisirâ Jerusalem hae somâckembiŋ.
2Eme juku Zedekia e ŋicwofuŋ juhame jara 11 irec mosa 4 â ʒoaŋ gie bapa namba 9 ira haesac âeckekupie hawec fuawec.
3Eme Babe ŋicwofuŋ ere ŋic fekicne kecʒiŋuc jaŋe haeo ferâ motâc ʒâʒâŋiŋko domawec ira waha ŋembiŋ: Nerega‐Sareze, Samega‐Nebo, Sasakim ŋic fekicne jaŋere micne, Nerega‐Sareze, qaŋgec bapa jaŋere micne erâ Babe ŋicwofuŋ ere ŋic fekicne gâcne sasawa.
4Ehame Juda ŋicwofuŋ Zedekia â momorifâcne sasawa jaŋe honec‐joparâ wisembiŋ, ehuc ŋicwofuŋte jufu gieopec ra sac jajahec jahere ŋondeŋko motâc domawec i fotâcnerâ ŋafeo hae beherâ Jordaŋ wâneŋkopec rambiŋ.
5Kaldea momori ŋic jaŋe ine jâpec‐jopa raku Jeriko mâreŋ burocnao Zedekia bâfuambiŋ; erâ ro Babe ŋicwofuŋ Nebukaneza Hamati mâreŋko Ribela haeo ŋewec erao barambiŋ. Eki ine dâŋticne mutarawec.
6Erâ Babe ŋicwofuŋzi mume Ribela haeo ira Zedekiazi honeha ŋokâfâc‐ticne qâhâmoc‐jopambiŋ, erâ Judaŋic fekicne sasawa jaŋe iŋuc jaha Babe ŋicwofuŋzi mume qâhâmoc‐jopa‐fârembiŋ.
7Zedekia e jahacne ine mume ʒâŋene âke hâpombiŋ, erâ Babe haeo baraniŋte kâpâcwâruzi niŋgiŋkembiŋ.
8Ŋicwofuŋte erific â hae rune jaŋere fic wiac i Kaldea ŋic jaŋe rikepie ʒâseŋkewec, erâ Jerusalem haere qânâsac i heroc qâropiembiŋ.
9Ŋicwofuŋ momori fuŋfuŋfâc‐ticne jaŋere micne ʒâŋene Nebuʒaradaŋ e ŋic ŋokac ʒanʒaŋne haeo jumbiŋ â erao wisembiŋ jaŋe kâpâcwâru bacjoparâ Babe haeo amec‐jopa rawec.
10Ŋic hapetac, fic hae tâmiric gâcne ine ŋicwofuŋ momori fuŋfuŋfâc‐ticne jaŋere micne Nebuʒaradaŋzi Juda mâreŋkoa juniŋte mana‐jarehuc waiŋ gie â mâreŋ jarewec.
11Babe ŋicwofuŋ Nebukanezazi momori fuŋfuŋfâc‐ticne jaŋere micne Nebuʒaradaŋ e Jeremiare dâŋ ʒiŋuc âzâcne mutâc ewec:
12“Go mutec bafisipie hone soŋaŋ ecnehuc sahac‐ticne moc mi bâʒâickezemec, aricne, e jahac dâŋ gazame sâc ine wiac ecnezemec.”
13Eme ŋicwofuŋ momorifâc‐ticne jaŋere micne Nebuʒaradaŋ â ŋic fekicne jaŋere micne Nebusaʒibaŋ â qaŋgec bapa micne‐jeŋic Nerega‐Sareze erâ Babe ŋicwofuŋ fekicnefâc‐ticne sasawa
14jaŋe kiŋaŋ sorec‐jopapie Jeremia momori jaŋere hae ʒoŋaonec bafisipie rambaŋko juocte Gedalia, Ahikamte ŋokâ, Safaŋte ŋosa hâcne erao râembiŋ. Iŋuc epie ŋicfâc‐ticne jaŋere ŋondeŋko juwec hâcne.
15Jeremia e momori jaŋere hae ʒoŋao jaha juhame Wofuŋte dâŋ kecʒiŋuc fuacnewec:
16“Go ra Etiopia ŋic Ebemelec âzâcnec, ‘Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: Manakic, no hae ʒirec findaŋdâŋ mupo i bâbâpiaŋ mâcne, sisipiric fuacneocte mupe fârio qaocmu; dameŋ ira gore ʒâŋe faio fârinehec eocmu hâcne.
17Go gahacne ine dameŋ ira bataracgupemu, eme go ŋic hâhâwic bajareekic jaŋere meo moc mi râecgunʒepieŋ.
18Aricne, go ʒikare nânâ ezicte no ŋezicgu‐jâmbâŋkepemu, eme norao roweckehuc jumeŋte mi sipirickehuc jujuge ʒuhuckerâ juzemec. Wofuŋ nore dâŋ iŋuc.’”
