1Erâ Wofuŋzi dâŋ moc ʒiŋuc muwec: “Ŋic moc e ŋonâŋ‐ticne beheme ra ŋic moc rorâ juku mârâc ŋowe‐ticnerao sâcne mocwâc risieme roocmu me? Iŋuc eene fome muzac mâreŋ i boe sau mâreŋ ezac i! Goki ine ŋic bocjaha jaŋehec sasec gie bameŋzi norao sâcne risiecmu me? Wofuŋ nore dâŋ iŋuc.
2Go qâhâŋnerâ tiki mâreŋ burocnaopec ʒâŋe firâ honec: Go wena moc mi mana‐jaretec bâsâqorecgumbiŋ? Go Araba ŋic jaŋe mâreŋ sawao ruc bahuc ŋeeŋgopieŋ irec sâc jaha ehuc hatamecko sasecŋic jaŋere woŋec ŋehuc jumeŋ, ehuc sasec â hehesicgezi mâreŋ bâsâqoremeŋ.
3Irec hâcne hoere aka fuame hoe afecne me ŋemâcne i omae‐fârewec. Goki ine boe sau ŋokac iŋucne maŋrâŋgeŋ erâ mimi jaŋgeŋ jumeŋ.
4Ʒi ine ʒiŋuc wira‐narekomec: ‘O Mamac‐nane, no socɋâri juhape go âgo enaremeŋ i!
5Go mamana sâqoc tatara tâmiric enarecmurâ mukic, â aaricgezi tofamâc foraocte mukomec me?’ Jâmbomac, go iŋuc hâcne muekic, erâ ine sâqocne bazore manatec mi quŋkeekac.”
6Eme Wofuŋ e Josiazi ŋicwofuŋ juwec dameŋ ira ʒiŋuc nazawec: “Israe e qaqatara ŋokaczi wiac ebac ewec i moc honemeŋ me? E tiki ʒora sasawa ira ferâ jâc dodomane sasawa irec fuŋnao rarâ sasec gie bahuc juwec.
7Eme no ʒiŋuc manapo, ‘Wiac i efârerâ norao risieocmu.’ Eki ine mi risiewec. Ehame qoticne eeatucne, Juda hâcne, e i honewec.
8Eme no Israe maŋrâŋgeŋhec e sasec gie‐ticnere erâ pasi râcnehuc behepo, i qoticne eeatucne, Juda hâcne, e honewec. Hone‐bipiehuc mi hâwickeha ra sasec gie jaha bawec.
9Eme sasec gie‐ticnere maname afeckeha mâreŋ bâsâqorewec, ehame qânâ â jâc araŋ babajare izi sasec gie‐ticne ewec.
10Eme qoticne eeatucne, Juda hâcne, e iŋuc jaha wiac sasawa hone‐bipiehuc maŋticne norao hâcbuc mi râewec, aricne, burec burec sawa norao risiewec, Wofuŋ nore dâŋ iŋuc.”
11Eme Wofuŋzi ʒiŋuc nazawec: “Israe maŋrâŋgeŋne ere kiŋzi wawahane foha Juda eeatucne ere kiŋzi fekac.
12Go rarâ mâreŋ faicpec dâŋ kecʒiŋuc musokahuc muzemec: ‘Israe maŋrâŋgeŋne go risiezemec, Wofuŋ nore dâŋ iŋuc. No buuruc‐nanehecte mamana sâqoc tatara tâmiric mi baju‐ŋarepemu, Wofuŋ nore dâŋ iŋuc.
13Mocjaha, kiŋge hone tarac. Go Wofuŋ Anutuge no râpecnurâ jâc dodomane sasawa irec fuŋnao nemu jabane jaŋerao ra qohota ware qohota ehuc jumeŋ, Ehuc dâŋnane mana rereŋ mi emeŋ, Wofuŋ nore dâŋ iŋuc.
14Naru motec râŋgeŋne ŋoŋe risieniŋ, no hâcne bomboŋ‐ŋeŋic, no hae mockonec ŋic moc â guru mockonec ŋic jajahec, iŋuc iŋuc rocjoparâ Zioŋko râec‐ŋopapemu, Wofuŋ nore dâŋ iŋuc.
15“‘Erâ no maŋnanezi mana ʒiziwec‐jopaekopac, ŋic iŋucne hâcne soŋaŋ râec‐jopape jaŋe mamana â maŋɋârâŋhec juhuc soŋaŋ‐ŋopanʒepieŋ.
16Eme ʒiŋuc fuaocmu: Dameŋ ira fua sawec erâ mâreŋ ŋefusucmahuc ʒiŋuc mocwâc mi muniŋmu: “Oc, ʒi Wofuŋte ʒâʒâfic katapa”. Erâ irec mocwâc mi manasuhuc mu wioc eniŋmu me basaniŋmu, â ɋâricne mocwâc mi baniŋmu.
17Mâcne, dameŋ ira Jerusalem haere “Wofuŋte eri ŋeŋe hâcne” muniŋmu, ehame ŋicne ŋicne jaŋe Wofuŋ ʒâŋe‐nanere erâ tumaŋneniŋmu, ehuc râŋgeŋkerâ maŋjeŋic hehesicne irec sâcko mocwâc mi juniŋmu.
18Dameŋ ira Juda kikefuŋ â Israe kikefuŋ jaŋe qâturerâ mâmâc jaha faic mâreŋkonec risierâ mimiŋnefâc‐ŋeŋic jaŋere biŋe mâreŋ jarepo ira fisiniŋmu.
19“‘Eme ʒiŋuc manapo: No ŋokâ‐nane mugarehuc mâreŋ fâri biaŋ jâmbâŋ moc ŋicguru gâcne jaŋere sâc sirickekac i hâcne garepemu. Erâ ʒiŋuc wâc manapo: “Mamac‐nane”, go iŋuc munarehuc bâjâpecnuhuc juku mocwâc mi râpecnucmu.
20Jei, ŋokac moczi ŋowe‐ticne eatuckeekac iŋuc jaha Israe kikefuŋ ŋoŋe no eatucnumbiŋ. Wofuŋ nore dâŋ iŋuc.’”
21Oi, mananiŋ! Israe ŋic jaŋe hata hehesicne âtehuc Wofuŋ Anutu‐jeŋicte nikec‐jopame râpeckembiŋte tiki burocnao kio ŋâŋâtâc â kio wâwâsic‐jeŋicte fânâŋ fuakac.
22“Naru motecfâc‐nane maŋrâŋgeŋhec ŋoŋe risieniŋ, eme qaqatara‐ŋeŋic behepemu.” Mume muniŋmu: “Manakic, go Wofuŋ Anutu‐nâŋec jukicte nâŋe ʒi gorao fâŋgopeneŋ.
23Jâmbomac, tikine tikine ojowa fua raekac i burec sasawa, Israere bâbâpiaŋ ine jâmbomac Wofuŋ Anutu‐nâŋec gorao mocjaha fokac.
24“Mamacfâc‐nâŋec wiac hure hemârec embiŋ i socɋâri juhapene nemu repicnezi biac fuŋkerâ lama bulimakaofâc‐jeŋic mecne, naru motecfâc‐jeŋic mecne mâmâc nâcjopa wefuku nâcjopa‐fârewec.
25Mimi‐nâŋeczi fofo enârehame waha fonʒepeneŋ â mimi busâqoczi foŋnâpozejec. Nâŋe sâqocne bahuc Wofuŋ Anutu‐nâŋec bunao bambeŋ hâcne, nâŋe mecne, mamacfâc‐nâŋec jaŋe mecne, ɋie‐nâŋeckonecteaŋ iŋuc ehuc juwefumbeŋzi miŋecgac eeŋgopeneŋ jaha, ehuc Wofuŋ Anutu‐nâŋecte dâŋ mana rereŋ mi embeŋ.”
