1Wofuŋte dâŋ norao kecʒiŋuc fuawec:
2“Go mâreŋ ʒira ŋokac naru motec tâmiric juzemec.
3Wofuŋ no naru motec hae mâreŋ ʒira fuaeŋgopieŋ â neŋgocfâc‐jeŋic rocjopaeŋgopieŋ erâ mamacfâc‐jeŋic mâreŋ ʒira bâfuac‐jopaeŋgopieŋ jaŋere ʒiŋuc mukopac:
4Jaŋe huc repicne bacjopame hâmonʒepieŋ. Ehame jaŋere ki mamakuc mi fuaocmu â moczi mi ducjopaocmu; jaŋe mâc jawa iŋucne mâreŋko fohuc mâreŋte guec bâfuanʒepieŋ. Jaŋe ʒikazi kimiziec‐jopaocmu â nânâ basahuc hâmohapie qâŋɋâŋfâc‐jeŋic i sawa wipe â mâreŋ qowi jaŋere nânâ eniŋmu.”
5Wofuŋ e ʒiŋuc mukac wâc: “Go ki mamakuc eere ficko moc mi fezemec, â soŋgâŋte wâc mi razemec, erâ busâqoc mi mana‐jarezemec. No ŋicguru keci jaŋe wama‐nane erâ aki anonoc â buuruc‐nane jowac ropo hâcne, Wofuŋ nore dâŋ iŋuc.
6Eme mâreŋ ʒira kâcɋene mecne piticne mecne hâmopie moc mi ducjopaniŋmu, â jaŋere erâ ki mamakuc ee me memotec hehetâc me qizec bâbâtâc i wâc mi eniŋmu.
7Me hâmoc fuame ki mamakuc eekac ŋic e bâmiriŋkeniŋte soŋgâŋko nânâ rârâcne i mi eniŋmu; me neŋgoc mamac jahec‐ticne hâmopire mu bâmiriŋ eecne i wâc omaeocmu.
8Tiwâ bâzire tumaŋneniŋmu fic ira ferâ jaŋehec ŋehuc nânâ opâ nâzemec.
9Anutu Tâpiri Ɋuŋɋasaŋ Wofuŋ, Israere Anutu no kecʒiŋuc mukopac hâcne: Manaŋgopieŋ, ŋaŋacne juju dameŋko hae mâreŋ kecʒirec mana aŋac â ʒeri bubiaŋ â ŋic ŋokac roroc ehuc ʒeri wiac ee i mupe ʒâŋe fai‐ŋeŋicko omaeocmu.
10“Eme dâŋ i sasawa ŋicguru keci jazatec ʒiŋuc wio‐gareniŋmu: ‘Wofuŋ e wemocte wiac hâhâwicne sâko keci fai‐nâŋecko fefâreocte muwec, nâŋe wemo kiŋ bahac moc bâfuahuc Wofuŋ Anutu‐nâŋec bunao bambeŋ?’
11Iŋuc mu wioc egarepie jazazemec: ‘Wofuŋte dâŋ ʒiŋuc fokac. Mimiŋnefâc‐ŋeŋic jaŋe behecnurâ nemu jaŋerao qohotarâ kiŋaŋ qajarehuc fodape‐jare jumbieŋ, ehuc no qaisocnurâ sâcmutâc dâŋnane qâsua jumbieŋ.
12Ŋoŋe ine mimiŋnefâc‐ŋeŋic siric‐jopahuc sâqocne fehuc baeŋgopieŋ, ŋoŋe ru sâc maŋrâŋgeŋ â hehesic juhuc wiac ebac eeŋgopieŋ, ehuc nore dâŋ mi manaeŋgopieŋ.
13Ŋoŋe iŋuc eeŋgopieŋte mâreŋ ʒirecnec tuŋŋopape mâreŋ moc, ŋoŋe kâuc baŋgopieŋ â mimiŋnefâc‐ŋeŋic jaŋe wâc kâuc bambiŋ, ira hâcne ranʒepieŋ; eme ira nore jauŋ basahuc ŋafe furec nemu kiŋaŋ qajarehuc juniŋmu.’”
14Wofuŋzi ʒiŋuc mukac: “Manaŋgopieŋ, dameŋ moc maickeocmu ira ʒiŋuc mocwâc mi muniŋmu, ‘Wofuŋzi jujâmbâŋkekac, eki hâcne Israe ŋic Aigita mâreŋkonec jowac‐jopame warembiŋ’,
15aricne, kecʒiŋuc ine muniŋmu, ‘Wofuŋ jujâmbâŋkekac, eki hâcne Israe ŋic faic mâreŋkonec â mâreŋ sâc tuŋjopame rambiŋ irecnec batarac‐jopawec.’ No hâcne mimiŋnefâc‐ŋeŋic mâreŋ qikiŋne‐jarepo ira bârisiec‐jopazepac.”
16Wofuŋte dâŋ kecʒiŋuc fokac wâc: “Manaŋgopieŋ, no opâ qowi roro ŋic bocjaha hefârec‐jopape wasaŋko fârec‐jopanʒepieŋ; eme ʒâhec wosaŋeŋ bapa bocjaha hefârec‐jopape ware tikine tikine â facne facne â qânâ hawec sâc ficne qosac qosac ehuc rocjopanʒepieŋ wâc.
17Ʒâŋe‐nanezi hata‐jeŋic sasawa hone jâjâpehape nore maio sosoŋko i sâcne mi eniŋmu, kiŋ bahac‐jeŋic ʒâŋe mai‐naneo tâtâc fokac.
18No qanaŋ kiŋ bahac â sâqocne‐jeŋicte okacne bafehuc bazu‐jarepemu, i mâreŋ‐nane nemuɋâŋ‐jeŋicte âsu gârezi bâsâqorembiŋte â mâreŋ nore biŋe fowec i wiac‐jeŋic mamakâcnezi bâfusembiŋte.”
19O Wofuŋ, go tâpiri‐nane â dapeŋ‐nane, go ʒârâ hâriŋ dameŋko huec sanaŋ‐nane. Ŋicne ŋicne jaŋe mâreŋ qaŋeŋnaonec gorao fisirâ ʒiŋuc muniŋmu: “Mimiŋnefâc‐nâŋec jaŋe burec wiac, nemuɋâŋ racne â fâri tâmiric i sawa bajumbiŋ.
20Ŋiczi nemu fârine sâcne bâbâfuac‐jopane me? Arictac, ŋiczi nemu bâfuakicne i fârine aricne!”
21“Irec manac, no dameŋ ʒi fuŋne‐nane qazu‐jarepemu, ehuc tâpiri â sasanaŋ‐nane bataniŋke‐jarepe ʒâŋe‐nane ‘Wofuŋ’ i mana taranʒepieŋ.”
