1Juda ŋicwofuŋ Jojakim, Josiare ŋokâ hâcne, e ŋicwofuŋ gie‐ticne fuŋkeha Jeremiarao Wofuŋtaonec dâŋ ʒiŋuc fuawec:
2“Wofuŋ e kecʒiŋuc mukac: Go Wofuŋ nore taha ufuŋte hae ʒoŋao ferâ domazemec. Ehuc Judare hae sâko ŋerakac irecnec ŋic taha ufuŋ‐naneo fodape‐nareniŋte fisiŋgopieŋ jaŋe dâŋ jazacmurâ mutâcne‐garepo sâc jazazemec. Ehuc dâŋ moc mi hesoŋkezemec.
3Eme jaŋe manarâ maŋjeŋic bârisiehuc hata‐jeŋic hehesicne behe‐fâreniŋmu mecne, eme no busâqoc mana‐jarehuc maŋnane risieme eebapa‐jeŋic sâqocnere erâ wiac hâhâwicne fua‐jareocte mupo i aka hecnepe fozejec.
4Goki ine jazac, ‘Wofuŋzi ʒiŋuc mukac: Ŋoŋe dâŋnane qikiŋnehuc sâcmutâc dâŋ ŋarepo i mana rereŋ mi eniŋmuo,
5ehuc kiŋaŋŋicfâc‐nane, porofete hâcne, dameŋ sâc ŋoŋerao sorec‐jopaekopac jaŋere dâŋ mananiŋte takic‐ŋopaocmuo
6ine Silo hae ecnepo sâc ijaha ufuŋ ʒi ecnepemu, erâ mupe mâreŋte faio ŋicne ŋicne jaŋe hae ʒirec sâwecdâŋ muranʒepieŋ.’”
7Eme taha bapa â porofete â ŋic ŋokac gâcne sâko jaŋe Jeremiazi dâŋ i Wofuŋte taha ufuŋko muhame manambiŋ.
8Eme Jeremia e Wofuŋzi ŋic ŋokac sasawa dâŋ jazaocte mutâcnecnewec sâc i mutarame izia taha bapa â porofete erâ ŋic ŋokac gâcne sâko jaŋe e rorâ mumbiŋ: “Go hâmo‐jâmbâŋkezemec.”
9Erâ mumbiŋ, “Go Wofuŋte ʒâŋeo âke hotahuc wemocte findaŋdâŋ ʒiŋuc mumec: ‘Taha ufuŋ ʒi i Silo hae wiac fuacnewec iŋucnea fuacnezejec, â hae ʒi ima bapie sesutac fuarâ fozejec’?” Iŋuc murâ ŋic ŋokac ʒeŋgoma jaŋe Wofuŋte taha ufuŋko qâturerâ Jeremia râsi ecnembiŋ.
10Eme Judaŋic fekicne jaŋe wiac irec biŋe manarâ ŋicwofuŋte fickonec waharâ Wofuŋte taha ufuŋko ferâ Motâc Ɋârio waha ŋembiŋ.
11Ehame taha bapa â porofete jaŋe ŋic fekicne â ŋic ŋokac sasawa ʒiŋuc jazambiŋ, “Ŋic keci e ʒikare biŋe ekac, i ŋoŋe ŋaŋac hazec‐ŋeŋiczi manahapie hae ʒi râsi ecnehuc findaŋdâŋ muwec irec.”
12Jeremia eki ine ŋic fekicne sasawa â ŋic ŋokac gâcne sâko ʒiŋuc jaza‐fârewec: “Wofuŋ e jahac ufuŋ â hae sâko ʒi irec findaŋdâŋ hazec‐ŋeŋiczi manambiŋ i mufuapemurâ sorecnuwec.
13Irec ʒi juju â eebapa biaŋne bâfuaniŋ, ehuc Wofuŋ Anutu‐ŋeŋic ere mumutâc dâŋ mana rereŋ eniŋ; eme wiac hâhâwicne fua‐ŋareocte muwec i busâqoc manahuc maŋne risieme aka hecneme fozejec.
14No nahac ine meŋeŋicko fepac domakopac ʒi, irec ŋoŋe manapie biaŋkekac me sâckekac irec sâcko wiac enareniŋ.
15Ʒiŋuc ine mana‐jâmbâŋkenʒepieŋ: Qâhâmocnuniŋmuo ine ŋic bahacmâc nore soczi ŋoŋere faio â hae sâko ʒi erâ ŋecjucfâc‐ticne jaŋere faio feocmu, i Wofuŋzi dâŋ keci sasawa hahaŋne bahuc mufua‐ŋarepemurâ sorecnuwec irec.”
16Jeremiazi iŋuc mume ŋic fekicne â ŋic ŋokac ʒeŋgoma jaŋe taha bapa â porofete ʒiŋuc jazambiŋ: “Ŋic kecʒi e ʒikare biŋe aricne, e Wofuŋ Anutu‐nâŋecte micte dâŋ nâzâjec hâcne.”
17Eme mâreŋ irec soŋaŋ kâcɋene gâcne jaŋe faharerâ ŋic ŋokac tumaŋnembiŋ ʒiŋuc jazambiŋ:
18“Juda ŋicwofuŋ Hisikia juwec dameŋ ira Morese haeonec ŋic moc ʒâŋene Mika, e porofete fua taniŋkerâ Juda ŋic ŋokac jaza‐fârewec, ‘Anutu Tâpiri Ɋuŋɋasaŋ Wofuŋzi mukac: Zioŋ tiki i nânâ gie iŋucne hec hetikic eniŋmu, â Jerusalem hae i ima bapie sesutac foha taha ufuŋte tikio kâte uupic fuazejec.’
19Iŋuc jazame Juda ŋicwofuŋ Hisikia â Judaŋic jaŋe e moc qâhâmombiŋ me? Aricne, jaŋe Wofuŋte hâwic‐jopaha mu huacbuc ecnembiŋ. Eme Wofuŋ e busâqoc mana‐jarehuc maŋne risieme sisipiric wiac fua‐jareocte muwec i aka hecneme fowec. Nâŋâc wiac hâhâwicne sâko fai‐nâŋecko feocte giene bazo eŋgopeneŋ hâcne.”
20Eme ŋic moc juwec ʒâŋene Uria, Semajare ŋokâ, Kiriati‐Jearim haeonec, eki iŋuc jaha Wofuŋte ʒâŋeo âke hotahuc findaŋdâŋ muwec. Ehuc Jeremiazi ewec irec sâc jaha hae â mâreŋ ʒirec findaŋdâŋ muwec hâcne.
21Eme ŋicwofuŋ Jojakim â ʒikaŋic erâ fekicnefâc‐ticne jaŋe dâŋticne manapie mi sâckeme ŋicwofuŋzi qâhâmoocte muwec. Uria eki ine irec biŋe manarâ hâwickeme Aigita mâreŋko wisewec.
22Iŋuc eme ŋicwofuŋ Jojakimzi Akaborore ŋokâ Elenataŋ erâ ŋic gâcne ehec mâmâc raniŋte Aigita mâreŋko sorec‐jopawec.
23Eme jaŋe Uria rorâ Aigita mâreŋkonec jowa warerâ ŋicwofuŋ Jojakimtao râembiŋ; eki ine ʒikazi qâhâmorâ qâŋɋâŋ‐ticne ŋic ŋokac omane jaŋere ʒâŋeruŋ gieo beheniŋte muwec.
24Safaŋte ŋokâ Ahikam eki ine Jeremia e ŋic ŋokac jaŋere meo feme qâhâmonʒipiŋte ŋezickewec.
