Jeremia 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Juda ŋicwofuŋ Zedekia, Josiare ŋokâ hâcne, e ŋicwofuŋ gie‐ticne fuŋkerâ juhame Jeremiarao Wofuŋtaonec dâŋ kecʒiŋuc fuawec:

²Wofuŋzi kecʒiŋuc nazawec: “Go muc â kioŋ wiac bâfuarâ upegao râezemec.

³Erâ Jerusalem haeo kiŋaŋ fisirâ Juda ŋicwofuŋ Zedekiarao fuambiŋ jaŋe ŋicwofuŋfâc‐jeŋic kecʒiŋuc i jaŋere dâŋ jaretec baranʒepieŋ: Edom ŋicwofuŋ, Moabi ŋicwofuŋ, Amoŋ ŋicwofuŋ, Tiro ŋicwofuŋ â Sidoŋ ŋicwofuŋ.

⁴Erâ bomboŋfâc‐jeŋic dâŋ kecʒiŋuc jazaniŋte mujarezemec: ‘Anutu Tâpiri Ɋuŋɋasaŋ Wofuŋ, Israere Anutu eki ʒiŋuc mukac: Ŋoŋe bomboŋfâc‐ŋeŋic kecʒiŋuc jazanʒepieŋ:

⁵“Mâreŋ mecne, erâ mâreŋte faio ŋic â qowi juraŋgopieŋ jaŋe mecne i noni hâcne menane sicnehuc tâpiri sâko‐nanezi bâfuac‐jopapo, irec e me e râcnezo murâ râcnepemu.

⁶Ʒi ine mâreŋ i sasawa kiŋaŋ qaqa‐nane Nebukaneza, Babe ŋicwofuŋ hâcne, ere meo râepe fokac, ehuc kâte qowi jaŋe wâc kiŋaŋ qacneniŋte mujarepo.

⁷Ŋicne ŋicne jaŋe e ŋokâ‐ticne erâ ŋosa‐ticnere kiŋaŋ qahuc jufekupie e jahacne mâreŋ‐ticnere dameŋ maickezejec wâc; maickeme ŋicguru kâcɋene â ŋicwofuŋ tâpirihec jaŋe rauckepie kiŋaŋ qaqa‐jeŋic ezejec.

⁸“‘ “Ŋicguru moc ŋicwofuŋ‐jeŋichec kiŋaŋ qacneniŋte qikiŋneniŋmu me Babe ŋicwofuŋte tagi mi deniŋmu jaŋe ʒikazi me roroczi me huc hâmoczi bâtiŋ‐jopa raku Babe ŋicwofuŋ ecnepe bâsirowec‐jopa‐fârezejec; Wofuŋ nore dâŋ iŋuc.

⁹Irec porofete me findaŋdâŋ omane mumu me guŋ fuŋne mamana me mâsi bapare fuŋne mamana me qaŋgec bapa jaŋe dâŋ ʒiŋuc ŋazapie mi mananʒepieŋ: ‘Ŋoŋe Babe ŋicwofuŋ ere kiŋaŋ qaqa moc mi jujâmbâŋkeniŋmu.’

¹⁰Jaŋe mâreŋ‐ŋeŋickonec jâpec‐ŋopaniŋte â noni bâtâtiec‐ŋopape sipirickeniŋte findaŋdâŋ burecne ŋazaeŋgopieŋ.

¹¹Ŋicguru moc Babe ŋicwofuŋ tagi‐ticne dehuc kiŋaŋ qacneniŋmu jaŋe ine mana‐jarepe mâreŋ‐jeŋickoa gie he sarac ehuc ŋec juc enʒepieŋ, Wofuŋ nore dâŋ iŋuc.” ’”

¹²Juda ŋicwofuŋ Zedekia e ine ʒiŋuc muhuc dâŋ ijaha âzâcnepo: “Ŋoŋe Babe ŋicwofuŋ tagi‐ticne dehuc e jahacne â ŋicfâc‐ticne jaŋere kiŋaŋ qahuc mi sipirickerâ sâcne juniŋmu.

¹³Ŋicguru moc Babe ŋicwofuŋ kiŋaŋ mi qacneniŋmu jaŋe sipirickeniŋte Wofuŋzi muwec. Eme go â ŋicfâcge ŋoŋe wemocte dâŋ i mana‐bipierâ ʒika â roroc â huc hâmoczi ŋopame hâmoniŋte muŋgopieŋ me?

¹⁴‘Ŋoŋe Babe ŋicwofuŋ ere kiŋaŋ mi qajâmbâŋkeniŋmu’, porofete iŋuc ŋazaeŋgopieŋ jaŋere dâŋ mi mananʒepieŋ, jaŋe findaŋdâŋ burecne ŋazaeŋgopieŋ hâcne.

¹⁵Wofuŋte dâŋ ʒiŋuc: No jaŋe mi sorec‐jopapo, aricne, jaŋe nore ʒâŋeo âke hotahuc findaŋdâŋ burecne ŋazaeŋgopieŋ i behec‐ŋopape ŋoŋe mecne â porofete findaŋdâŋ ŋazaeŋgopieŋ jaŋe mecne mâmâc sipirickeniŋte iŋuc eeŋgopieŋ.”

¹⁶Eme no taha bapa â ŋic ŋokac ʒi sasawa ʒiŋuc jazapo, “Wofuŋzi kecʒiŋuc mukac: Porofetefâc‐ŋeŋic findaŋdâŋ kecʒiŋuc ŋazaeŋgopieŋ jaŋere dâŋ mi mananʒepieŋ, ‘Manaŋgopieŋ, Wofuŋ taha ufuŋ‐ticnere râqâc wiac i dameŋ mi ʒoraha Babe haeonec risie wareocmu,’ findaŋdâŋ i burec ehuc ŋazaeŋgopieŋ hâcne.

¹⁷Ŋoŋe dâŋjeŋic mi manahuc Babe ŋicwofuŋ kiŋaŋ qacnenʒepieŋ, iŋuc erâ sâcne juniŋmu; hae ʒi wemocte sesutac fuarâ foocte muŋgopieŋ?

¹⁸Jaŋe porofete fârine moc juŋgopieŋko â Wofuŋ nore dâŋ fojarekacko ine Anutu Tâpiri Ɋuŋɋasaŋ Wofuŋ no mu wâwâsic enarepie mupe nore taha ufuŋko mecne, Juda ŋicwofuŋte ficko mecne â Jerusalem haeo mecne râqâc wiac nâfocne fokac i Babe haeo mi baranʒepieŋ.

¹⁹Anutu Tâpiri Ɋuŋɋasaŋ Wofuŋ no wâtuŋ mecne, râqâc sâko â ŋeŋe wiac‐ticne mecne, erâ taha ufuŋte wâcwiac ʒanʒaŋne hae ʒira fokac, irec dâŋ mukopac.

²⁰Babe ŋicwofuŋ Nebukaneza e Jojakimte ŋokâ, Judare ŋicwofuŋ Jekonia erâ Judare â Jerusalemte ŋic fekicne sasawa Jerusalem haeonec Babe haeo bacjopa rawec dameŋ ira beheme fowec.

²¹Irec Anutu Tâpiri Ɋuŋɋasaŋ Wofuŋ, Israere Anutu no taha ufuŋko â Juda ŋicwofuŋ ere ficko erâ Jerusalem haeo râqâc wiac ʒanʒaŋne fokac irec ʒiŋuc mukopac hâcne:

²²Wiac i Babe haeo baranʒepieŋ, eme ira foha juku dameŋ moc maickeme no irec manasurâ mupe hae mâreŋ ʒira mocwâc risiezejec, Wofuŋ nore dâŋ iŋuc.”