1Ŋicne ŋicne jaŋere erâ Wofuŋte dâŋ porofete Jeremiarao fuawec ʒine hâcne.
2Aigita mâreŋte dâŋ â Aigita ŋicwofuŋ, ʒâŋene Farao Neko ere momori guru irec dâŋ. Jaŋe Eufrata opâo, Kakemisi haeo domahapie Babe ŋicwofuŋ Nebukaneza eki jopawec. Ine Josiare ŋokâ Jojakim e Juda ŋicwofuŋ erâ juhame jara 4 ewec dameŋ ira.
3“Ŋoŋe maro piticne â kâcɋene hepie hume ʒikare ware birickeniŋ!
4Becâsic becsahac wiac râe‐jare‐fârerâ ŋaŋacne wâc ferâ ŋeniŋ, aeŋdu hepie huoc, damu sându qâteckeniŋ, â maruku wâc hepie huoc!
5Hâc, no ine wemo honekopac? Jaŋe hâwic‐jopaha wiseŋgopieŋ i! Qac momorifâc‐jeŋic bawahac‐jopakicnere siŋsaŋ qahuc wise wisehuc risie fi mi eŋgopieŋ. Rârec rârec hâhâwic sasawa, Wofuŋte dâŋ iŋuc.
6Ŋic kike afeczi eipierâ sâcne mi wiseocmu, â ŋic tâpiri wânʒâŋheczi sahac‐ticne sâcne mi ŋezickeocmu. Faic mâreŋko Eufrata opâ mecnao fâfâc‐jopame waha jopaocmu hâcne.
7“Mozi Nilu opâ iŋucne siwiŋnerâ sokakac, ehuc opâ‐ticnezi opâ sâko iŋucne ruminehec fisikac me?
8Aigita mâreŋzi hâcne Nilu opâ iŋucne siwiŋnerâ sokakac, â opâ‐ticne i opâ sâko iŋucne ruminehec fisikac. Ehuc mukac: No sokarâ mâreŋ qofackepemu, ehuc hae ŋerakac ine ima bahuc ŋecjucfâc‐jeŋic bâsirowec‐jopapemu.
9Ajoc, becâsic ŋoŋe gasackeniŋ, keretac ŋoŋe ʒocnehec raniŋ! Ŋic qac momori ŋoŋe ʒikare afeckeniŋ, Etiopia â Puti mâreŋ rune maro hepie huekac â Ludi mâreŋkonec tepere fuŋne mamana ŋoŋe hâcne.
10Ʒoaŋ gie bapa i Anutu Tâpiri Ɋuŋɋasaŋ Wofuŋ ere ʒoaŋ, okac babazure ʒoaŋ hâcne, e ira râsifâc‐ticne jaŋere okac babazu gie baocte. Ʒika‐ticnezi dameŋ ira ŋic nâcjopahuc socjeŋic nâ gapec tâmiric nâku biric boroc eocmu. Anutu Tâpiri Ɋuŋɋasaŋ Wofuŋ e fâic mâreŋko Eufrata opâo taha bâzi moc fuacneocte giene baocmu hâcne.
11O Aigita ŋokac ʒeŋoŋ, go Gileade haeo ferâ wokemaŋ rozemec! Go marasiŋ wiac bocjaha i maŋgâŋ rohuc juekic, go mocwâc mi biaŋkemu.
12Ŋicne ŋicne jaŋe mimi busâqocgere biŋe manaŋgopieŋ, â kio owage i mâreŋ sâckerâ fokac. Momori moc e momori âgo‐ticnehec hehetuŋ ehuc rândiŋkerâ mâmâc jaha mâreŋko waha jofaekac hâcne.”
13Babe ŋicwofuŋ Nebukaneza e Aigita mâreŋ ima baocte fisizo ewec irec dâŋ Wofuŋzi porofete Jeremia âzâcnewec i kecʒiŋuc:
14“Aigita mâreŋko musaweniŋ, â Migidoli ira mufuaniŋ; Memfisi â Tapanese haeo ira mufuaniŋ wâc, ehuc muniŋ: ‘Go sanaŋkerâ ʒawiehuc domac, wiac rârecguhuc fokac i ʒikazi ɋâcke‐fâreocmu hâcne.’
15Qac momorige e fuŋne weniŋucte sanaŋkerâ mi domahuc rândiŋkewec? I Wofuŋzi herândiŋkewec irec.
16Guru sâkofâcge jaŋe fâfâc‐jopame waha jopawec, ehame ʒiŋuc nazaŋ gazaŋ embiŋ: ‘Ajoc, fific gururiŋfâc‐nâŋec jaŋere ʒikare erâ fahare guru‐nâŋecko â fufua hae mâreŋ‐nâŋecko risienaŋ.’
17Farao, Aigita ŋicwofuŋ ere ʒâŋe ʒiŋuc muniŋ: ‘Dameŋ qâtirihuc ojawa qaqa.’
18“Wofuŋ Sâko, ʒâŋene Anutu Tâpiri Ɋuŋɋasaŋ Wofuŋ e ʒiŋuc mukac: No jujâmbâŋkekopacte Taboro tikizi tiki gâcne jaŋere ŋondeŋko ŋekac, â Karamele tikizi hâwec heririŋko ŋekac irec sâc ŋic moczi ware fisiocmu.
19Aigita ŋecjucfâc‐ticne ŋoŋe wisezore he wiac‐ŋeŋic bâmockeniŋ! Memfisi hae ʒoczi ʒâseŋkeme sesuctac fuarâ foocmu.
20“Aigita mâreŋ e bulimakao ŋokacne ɋâricne hawari biaŋ iŋucne, e hâcne faic mâreŋkonec neŋgeczi râsi fisicneocmu.
21Momorifâc‐ticne mâreŋ ira jaba juhuc moneŋte erâ ʒika gie baeŋgopieŋ jaŋe bulimakao wokemaŋnehec iŋucne; jei, jaŋe wâc iŋuc jaha fotikierâ mâmâc wiseniŋmu, jaŋe sisipiric dameŋ‐jeŋic, bâbâtiŋ dameŋ‐jeŋic hâcne izi maic‐jopame mi sanaŋkeniŋmu.
22“Fânâŋ‐ticne i homazi foforâ juhuc fânâŋkeekac iŋucne; râsifâc‐ticne jaŋe tâpirihec fisiniŋmu, ehuc jâc qafaraeŋgopeneŋ irec sâc râric barâ fisi‐jareniŋmu.
23Jaŋe jâckâte‐ticne uupicnehec i sifu qafaranʒepieŋ, jaŋe ɋirikiŋ jaŋere ʒare jâurueŋgopieŋ, mi wowosec‐jopane.
24Aigitare otâ e qurutuaocmu, e faic mâreŋkonec ŋicguru moc jaŋere meo feocmu hâcne. Wofuŋ nore dâŋ iŋuc.”
25Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: “Manaŋgopieŋ, no Tebeŋ mâreŋkonec Amoŋ nemu mecne â Farao mecne erâ Aigitare nemu â ŋicwofuŋ jaŋe okacne fisi‐jarepemu, Farao erao qohotaeŋgopieŋ jaŋe hâcne.
26No juju‐jeŋic sipirickezo muŋgopieŋ jaŋere meo râec‐jopapemu; Babe ŋicwofuŋ Nebukaneza â kiŋaŋŋicfâc‐ticne kâcɋene jaŋere meo hâcne. Juku wiac i fua tarame Aigita mâreŋko ŋic mârâc jaha ŋeŋe juju ejumbieŋ irec sâc mocwâc ŋeŋe juju enʒepieŋ, Wofuŋ nore dâŋ iŋuc.
27“Kiŋaŋŋic‐nane Jakobo go ine mi hâwicguzejec, â Israe go mi fâfârezemec; manakic, no hâcne mâreŋ taickonec bataracgupemu erâ ɋâricfâcge jaŋe kâpâcwâruo juŋgopieŋ mâreŋ irecnec jowac‐jopa warepemu; eme Jakobo e mâreŋ‐ticnao risierâ wama faio juzejec, erâ mana mezac tâmiric juha moczi moc mu hâhâwic mi ecnezejec.
28Kiŋaŋŋic‐nane Jakobo no gohec jukopacte mi hâwicguzejec. Tuŋgupe ŋicne ŋicne jaŋere ŋondeŋko hurâ jumeŋ jaŋe sasawa bâsirowec‐jopapemu, go ine mi bâsirowecgupemu. Aricne, mana manahuc sawa bâtiŋgupemu, okacne tâmiric mâc jâmbâŋ jucmurâ ine mi manakopac. Wofuŋ nore dâŋ iŋuc.”
