1Wofuŋzi dâŋ kecʒiŋuc mukac: “O Israe, go maŋge bârisiecmuo norao sâcne risiecmu. Go nemuɋâŋfâcge ʒâŋe mai‐naneonec bârâriec‐jopahuc ra qohota ware qohota mi ecmuo,
2erâ dâŋge mujomirezo murâ Wofuŋte ɋetickehuc, ‘Wofuŋ e jujâmbâŋkekac’ muhuc jâmbomacko â mumutiŋ dâŋko erâ sioc mi ehuc mujomirecmuo ine ŋicne ŋicne jaŋe Wofuŋte ʒâŋeo jajambuŋ â ʒeri bari eec eniŋmu.”
3Wofuŋ e Judare ŋicfâc â Jerusalem ŋecjucfâc‐ticne jaŋe ʒiŋuc hâcne jazawec: “Gie ɋâricne he rikec eniŋ, â fâpâ uupicko sara mama ine mi eniŋ.
4Judare ŋicfâc â Jerusalemte ŋecjucfâc ŋoŋe Wofuŋ nore biŋe eniŋte maŋŋeŋickonec sâqocne unucke behec enʒepieŋ, i eebapa‐ŋeŋic hehesicnere erâ kimbeŋ‐nanezi ʒocbâruŋ iŋucne fuarâ ʒahuc fome muzac ine moczi moc bâhâpoocte eipiezac.”
5Dâŋ kecʒiŋuc Juda mâreŋko muiŋ musawec eniŋ, â Jerusalem haeo wâc musokaniŋ: “Hae mâreŋ rârec rârec qeŋ qaniŋ, ehuc hahaŋne bahuc mupie mananiŋ, ‘Ŋoŋe tumaŋnepie hae sanaŋ ŋerakac ira raʒinʒepeneŋ.’
6Ajoc, wiserâ Zioŋko raniŋ, ŋec domac mi eniŋ! Wiac hâhâwicne â sisipiric sâko faic mâreŋkonec mupe warekac hâcne.
7Laioŋ e ŋicne ŋicne sipiric‐jopaekaczi biac kâte uupic‐ticnaonec wefukac, e mâreŋge ima baocte faharerâ hae mâreŋ‐ticne behewec hâcne. Haege ŋerakac i sipiricke‐fâreme sesuctac fuarâ foocmu.
8Ŋoŋe irec hâcne mateŋ qonaŋkerâ ki ŋâŋâtâc â kio wâwâsic ehuc muniŋ: Wofuŋ kimbeŋ‐ticnere ʒocbâruŋzi mi behec‐nâpokac.”
9Wofuŋzi kecʒiŋuc mukac: “Dameŋ ira ŋicwofuŋ mecne, ŋic fekicne mecne hâbi fafara ejareocmu, ehame taha bapa maŋjeŋic omaeocmu â porofete bipic‐jeŋic taraocmu.”
10Eme mupo, “O Wofuŋ Anutu, go jâmbomac ŋicguru ʒi â Jerusalem rune jaŋe mâretec eatuc‐jopahuc ʒiŋuc jazameŋ: ‘Wamazi ŋoŋerao fuarâ fozejec’; ʒi ine ʒikazi fai‐jeŋicko feha juju‐jeŋic omaezo ekac i.”
11Dameŋ ira ŋicguru ʒi â Jerusalem rune jaŋe ʒiŋuc jazazo: “Mâreŋ sawao tiki burocne ŋerakac irecnec mâŋâŋ fâronezi waharâ fâretiŋ jaha ŋicfâc‐nane jaŋeraopec rakac, erâ i bâbâwosâe me babataniŋ gie baocte aricne,
12mâŋâŋ i mocwâc hâhâwicne, nore micte fisikac. Ʒi ine no nahac dâŋ mutara‐jarepemu hâcne.”
13Honeniŋ, karorac ɋâfoŋne iŋucne fisikac, ʒika keretac wiac‐ticne i mâŋâŋ ɋicwânʒâŋnehec iŋucne. Becâsicfâc‐ticne jaŋere gagasac i tucwipe jaŋere gagasac sirickekac, jei, sisipiricte biŋe eŋgopieŋ i!
14Jerusalem, go maŋge ʒure bataniŋ etec hehesicge omaeme ŋezicguzo, maŋgao mamana sâqocne fokac i mo dameŋko moc behetec raocmu?
15Oi, mananiŋ, Daŋ mâreŋkonec dâŋfânâŋ warekac â Eferaim tiki mâreŋkonec biŋe bâroŋ fisikac.
16Ŋicne ŋicne sawaŋdâŋ qajareniŋ, â Jerusalemko dâŋ ʒiŋuc jazaniŋ: “Mâreŋ ʒorickonec somâ bapazi warerâ Juda hae ŋerakac i râsi ejarehuc semuja heŋgopieŋ.
17Jerusalem e fenarewecte râreckehuc gie soŋaŋzi eekac iŋuc ehuc ruc baŋgopieŋ, Wofuŋ nore dâŋ iŋuc.
18Wiac i juju â eebapagere erâ faigao fekac, wiac hâtâne fua‐garekac â jujuge sipirickezo ekac i hehesicgere fârine hâcne.”
19Jei, busâqoc, jei, busâqoc! No ʒâic repicne manakopac, bunane herickekac, bunane ʒâʒâficne qakac. Wemocko niniŋkerâ juzapo? Ʒi qeŋfânâŋ â ʒikare ojawa manakopac hâcne.
20Sisipiriczi sisipiric irec biŋe fisikac, mâreŋ sasawa imacke‐fârekicne, fic wiac‐nane ututuŋ jâmbâŋ â qoruc boze‐nane ɋeŋfâfâc jaha sipirickekicne.
21Sându maro honeekopac â qeŋfânâŋ manaekopac i mo dameŋ omae‐nareocmu?
22“Jâmbomac, ŋicfâc‐nane jaŋe maŋ tâmiric, jaŋe no kâuc bacnueŋgopieŋ, jaŋe naru motec mutucne â mamana tâmiric, wiac sâqocne mana sarickeeŋgopieŋ, wiac biaŋnere ine kâuc baeŋgopieŋ.”
23Jei, no mâreŋko fipe rame sisifucne â sawane foha honepo, erâ sambâŋko fipe feme tatamac‐ticne basapo.
24Jei, no tiki honec‐jopape ɋiɋiteckembiŋ â mâreŋ facne sasawa qiriŋ qahuc ŋembiŋ.
25Jei, no ʒâŋe fipe rame ŋic moc mi jume honepo, â sawa wipe wise‐fârembiŋ.
26Jei, no ʒâŋe fipe rawec, eme hae mâreŋ nânâ mâririhec fowec i ŋerisieme mâreŋ burocne foha honepo, â hae‐ticne sasawa i ima bafârekicne, i Wofuŋ kimbeŋ sanaŋ‐ticnere erâ iŋuc fuawec.
27Wofuŋzi ʒiŋuc hâcne muwec: “Mâreŋ sasawa tuhutac fuarâ fozejec, bâbâsirowe ine mi bâsirowe‐fârezepac.
28Irec mâreŋ makuc baocmu â faic sambâŋ e gâpâreocmu. No iŋuc mupo â mana biric epo hâcne, erâ irec bunane mi sâqoreocmu â maŋnane wâc mi risieme behepemu.”
29Becâsicko rara ŋic â tepeŋic jaŋere ojoware erâ haene haene ŋic jaŋe wiseniŋmu, kâte uupicko rucneniŋmu â qânâuŋko raʒirâ soŋkeniŋmu, hae sasawa tuhu foha moczi moc maŋnao ŋec juc mocwâc mi eocmu.
30Sipiricgukicne go ine wemo ecmu? Go ŋaqi bâbâroŋ hetec huocmu me eri wiac golzi bakicne qonaŋkecmuo me ʒâŋe maige jâwec ruacnecmuo ine sahac bapa i sifu maŋgâŋ jaha ehuc jucmu. Sahacgere sasec ejareekac jaŋe qaisocguhuc jujuge gowac rozo maŋkehuc jueŋgopieŋ.
31Ŋokac moc gozi kime kio owa eekac, me ŋokac moc mârâc motec‐ticne rohuc kio huse eekac, kio owa iŋucne manapo, Zioŋte otâ ere kio owa hâcne, e nokafe hehuc meticne sicnerâ muwec: “Jei, ŋic ʒika qaqa jaŋere maio weaŋkekopac.”
