1Mataŋ ere ŋokâ Sefatia â Pasahurure ŋokâ Gedalia â Selemiare ŋokâ Juka erâ Malikiare ŋokâ Pasahuru jaŋe Jeremiazi ŋic ŋokac sasawa dâŋ kecʒiŋuc jazawec i mana‐fârembiŋ:
2“Wofuŋzi ʒiŋuc mukac: Moc e hae ʒira ŋeocmuzi ʒikare nânâ eocmu, â nânâre me huc hâmocte sipirickeocmu; â moc e Kaldea ŋic jaŋerao wiseocmu e ine juju‐ticne ŋezickehuc ʒikare nâfocne erâ juocmu.
3Wofuŋ e ʒiŋuc mukac: Hae ʒi i jâmbomac Babe ŋicwofuŋ momorifâc‐ticne jaŋere meo feme ro rauc eniŋmu.”
4Iŋuc mume ŋic kâcɋene jaŋe ŋicwofuŋ âzâcnembiŋ, “Ŋic keci mutec qâhâmonʒepieŋ! E dâŋ iŋucne jazahuc hae ʒirec maŋnao momori ʒanʒaŋne juŋgopieŋ jaŋe mecne erâ ŋic ŋokac gâcne sasawa jaŋe mecne maŋjeŋic bawahaekac; ŋic e ŋicguru ʒi jaŋe juhâmoniŋte mâcne, sipirickeniŋte manasuhuc juekac.”
5Ŋicwofuŋ Zedekiazi ine muwec: “Sâcne, meŋeŋicko feoc, ŋicwofuŋ e ŋoŋere dâŋ qaocte tâpiri mi focnekac i!”
6Iŋuc mume Jeremia rorâ ŋicwofuŋte ŋokâ Malikia ere opâ nombâŋ momori jaŋere hae ʒoŋao fowec ira behepie huwec, ine repazi niŋgiŋkerâ râepie huwec. Opâ nombâŋko ine opâ aricne, sohoŋ sawa fowecte Jeremiazi sohoŋmaŋko hurâ bâutuckewec.
7Ebemelec, Etiopianec ŋic kâcɋene moc e ŋicwofuŋte erificko juweczi Jeremia opâ nombâŋko behepie huwec irec biŋe manawec. Ehame ŋicwofuŋ e dameŋ ira Benjamiŋ Motâcko ŋewec.
8Irec Ebemeleczi ŋicwofuŋte erific beherâ ŋicwofuŋtao ra ʒiŋuc muhuc âzâcnewec:
9“O ŋicwofuŋ‐nane, ŋic keci jaŋe porofete Jeremia wiac ecne‐fârerâ opâ nombâŋko behepie huwec i mâsi sâqoc qaqocne; e haeo nânâ poroŋ omaekacte ira nânâ tâmiric ŋeku hâmoocmu i!”
10Mume ŋicwofuŋzi Etiopia ŋic Ebemelec âzâcnewec, “Go ʒirecnec ŋic jahec â moc rocjopatec ra Jeremia e hâmozacte nombâŋkonec fârepie wefuzejec!”
11Eme Ebemelec e ŋic i rocjoparâ ŋicwofuŋte ficko mafafic rurumaŋnao fic maŋne moc fowec irecnec qoruc wambane â ŋaqi wiac suckekicne i rorâ repao niŋgiŋkerâ opâ nombâŋko Jeremiarao râeme huwec.
12Izi ine Etiopia ŋic Ebemeleczi Jeremia ʒiŋuc âzâcnewec: “Go qoruc wamba â ŋaqi wiac suckekicne i repazi nâguzacte fitackec.” Mume Jeremiazi iŋuc ewec.
13Eme jaŋe Jeremia repazi opâ nombâŋkonec fârepie wefuwec. Iŋuc epie Jeremia e momori jaŋere hae ʒoŋao juwec.
14Ŋicwofuŋ Zedekia e porofete Jeremiazi Wofuŋte ufuŋko motâc namba 3 ira fuacneocte dâŋ râeme rawec. Eme Jeremia e ra fisime ŋicwofuŋzi ʒiŋuc âzâcnewec: “No dâŋ moc wio‐garezo ekopac, irec go wiac moc mi hesoŋke‐narezemec.”
15Eme Jeremiazi Zedekia âzâcnewec, “No dâŋ gazape qâhâmocnuniŋte mucmu i! Â dâŋ gaza mutâc epe ine sifu mi mana‐narecmu.”
16Iŋuc mume ŋicwofuŋ Zedekiazi Jeremia bucko kamierâ mupaŋkecnewec, “Juju bâfua‐nârewec Wofuŋ e jujâmbâŋkekacte no mi qâhâmocgupemu â ŋic jujuge sipirickezo muŋgopieŋ jaŋere meo wâc mi râecgupemu.”
17Eme Jeremiazi Zedekia âzâcnewec, “Wofuŋ, Anutu Tâpiri Ɋuŋɋasaŋ Wofuŋ â Israere Anutu e ʒiŋuc mukac: Go Babe ŋicwofuŋ fekicnefâc‐ticne jaŋerao hucmuo ine jucmu, eme hae ʒi turuŋkepie mi ʒahame go â wiacfâcge ŋoŋe sâcne juniŋmu.
18Babe ŋicwofuŋ fekicnefâc‐ticne jaŋerao mi hucmuo ine hae ʒi Kaldea ŋic jaŋere meo feme turuŋkepie ʒaocmu, ehame go gahacne wâc sâcne mi wise‐jarecmu.”
19Iŋuc mume ŋicwofuŋ Zedekiazi Jeremia ʒiŋuc âzâcnewec: “No Judaŋiczi Kaldea ŋic jaŋere guruo biac humbiŋ juŋgopieŋ jaŋere hâwicnukac; jaŋere meo râecnupie penaroŋ ehuc kosa enarenʒipiŋkohec.”
20Jeremiazi ine muwec: “Jaŋere meo mi râecguniŋmu, go Wofuŋte dâŋ gazakopac i manarâ sâcne juhâmocmu â jujuge mi sipirickeniŋmu.
21Go qatararâ jaŋerao mi hucmuo ine Wofuŋzi dâŋ kecʒiŋuc naza nowatuc ewec i fârinehec eocmu:
22Manakic, Juda ŋicwofuŋte erificko ŋokac nâfocne juniŋmu jaŋe sasawa Babe ŋicwofuŋ fekicnefâc‐ticne jaŋerao amec‐jopa hupie kecʒiŋuc muniŋmu: ‘Ojai, ŋic âgofâcge jaŋe eatucguhuc bawahacgumbiŋ, eme ʒi sohoŋmaŋko juhaŋtecne behecguŋgopieŋ.’
23Ŋokac naru motecfâcge sasawa jaŋe ine Kaldea ŋic jaŋerao amec‐jopa huniŋmu, erâ go gahacne wâc sâcne mi wise‐jarecmu, aricne, rocgurâ Babe ŋicwofuŋ ere meo râecgupie fecmu â hae ʒi turuŋkepie ʒaocmu.”
24Eme Zedekiazi Jeremia âzâcnewec, “Gohec dâŋ muc manac ekoperec irec biŋe ŋic moczi moc mi manazejec, manapie ʒikare biŋe ezicte.
25Me gohec dâŋ muc manac ekoperec i fekicne jaŋe manarâ gorao fisirâ muniŋmu, ‘Go ŋicwofuŋ dâŋ âzâcnemeŋ me ŋicwofuŋzi go gazawec i nâzâc! Mufua‐nâretec akicgunaŋmu.’
26Iŋuc mupie ine ʒiŋuc jazazemec: ‘No ŋicwofuŋ dapecnerâ Jonataŋte ficko mocwâc mi risiepemurâ mana‐nareocte numucnepo, no ira hâmozipore.’”
27Eme ʒâhec ine jâmbomac ŋic fekicne sasawa jaŋe Jeremiarao fisirâ mu wioc ecnepie ŋicwofuŋzi dâŋ âzâcne mutâc ewec sâc jazawec. Eme dâŋ muc manac ekicne irec biŋe moc mi manambiŋte niniŋkerâ behembiŋ.
28Jeremiazi ine momori jaŋere hae ʒoŋao jukuhame dameŋ maickeme râsi jaŋe Jerusalem hae ro rauc embiŋ.
