Text copied!
CopyCompare
Kâte Bible - Jeremia

Jeremia 19

Help us?
Click on verse(s) to share them!
1Wofuŋzi ʒiŋuc nazawec: “Go rarâ hapec afezi bakicne moc furine bac, erâ ŋic jaŋere soŋaŋ kâcɋene gâcne â taha bapa fekicne gâcne rocjopazemec.
2Rocjoparâ motâc sahacnao kuʒi dâkâne gurukeeŋgopieŋko Beŋ‐Hinom wâneŋ fuŋkerâ hurakac ira hurâ dâŋ gazapemu sâc mufua‐jarezemec.
3Ehuc muzemec, ‘Judare ŋicwofuŋfâc â Jerusalem hae rune ŋoŋe Wofuŋte dâŋ mananiŋ! Anutu Tâpiri Ɋuŋɋasaŋ Wofuŋ, Israere Anutu eki ʒiŋuc mukac: Manaŋgopieŋ, noni mupe hae mâreŋ ʒi wiac hâhâwicne fuacneocmu, eme biŋene mananiŋmu sâc jaŋe hazec‐jeŋic ʒâickezejec.
4I ʒiŋucte fuazejec: Jaŋe no behecnumbiŋ, ehuc nemu furune, jaŋe mecne, mamacfâc‐jeŋic mecne â Judare ŋicwofuŋfâc mecne mi manac‐jopambiŋ, jaŋe hosâc âsu rike‐jarehuc hae mâreŋ ʒi bâbiembiŋ, â ŋic bahacmâc jaŋere soc hae ʒira hoŋkepie fusucmarâ fowec.
5Erâ ŋokâfâc‐jeŋic Baali nemu bâzi rikecneniŋte tikio alata wiac barambiŋ; noni ine irec dâŋ moc mi mupo â jaŋe mi mutâcne‐jarepo, erâ maŋnaneo wiac iŋucnere dâŋ moc mi fuawec.
6Irec mananiŋ: Dameŋ moc maickeocmu ira hae mâreŋ ʒirec ʒâŋe i Tofete me Beŋ‐Hinom wâneŋ mi muhuc, Jopa Sipiric Eejare wâneŋ muniŋmu, Wofuŋ nore dâŋ iŋuc.
7Eme Juda â Jerusalem rune jaŋere mamana i batackepemu, ehuc râsifâc‐jeŋic jaŋere hâhâwic wisehapie ʒikare micko râec‐jopazepac, ehuc mupe juju‐jeŋic jowac rozo muŋgopieŋ jaŋere mezi wâc sipiric‐jopazejec. Eme qâŋɋâŋfâc‐jeŋic i sawa wipe â mâreŋ qowi behe‐jarepe jaŋere nânâ enʒepieŋ.
8No hae ʒi mupe wiac bipic tataranehec fuacneme mu âke sisic ecneniŋmu, eme jâuruhuc rac warec eniŋmu sâc jaŋe ŋifec bipic tatara ejareha ŋifec ine bâbâtiŋ‐ticnere nifepupu ecneniŋmu.
9Râsi ejarehuc juju‐jeŋic jowac rozo muŋgopieŋ jaŋe ʒârâ hâriŋ dameŋko somâ bajarehuc fiŋiŋiŋ‐jopahapie mupe naru motecfâc‐jeŋic jaŋere biuc nânʒepieŋ, ehuc jaŋaczia nânâc enʒepieŋ wâc.’
10“Eme go hapec i ŋic gohec mâmâc raniŋmu jaŋere ʒâŋe faio qanʒaŋnezemec.
11Ehuc jazazemec, ‘Anutu Tapiri Ɋuŋɋasaŋ Wofuŋ e ʒiŋuc mukac: Hapec â kuʒi wiac qanʒaŋnepie bâbâpiaŋkene mocwâc mi eekac irec sâc jaha ŋicguru â hae ʒi henʒaŋ qanʒaŋ‐jopapemu hâcne. Eme ducjopazore mâreŋ gâcne basahuc Tofete ira ducjopanʒepieŋ.
12No hae mâreŋ ʒi â ŋecjucfâc‐ticne iŋuc hâcne ejarepemu, Wofuŋ nore dâŋ iŋuc; irec hae sâko i Tofete iŋucne ezejec.
13Jerusalemte fic wiac â Juda ŋicwofuŋfâc‐jeŋic jaŋere fic i Tofete iŋucne mamakâcne efârezejec; eme fic bupu sâc juhuc sambâŋko bâpiŋ ŋeraŋgopieŋ jaŋe hosâc âsu rike‐jare jumbieŋ â nemu furune taha bâzi hoŋke‐jare jumbieŋ, fic i sasawa hâcne.’”
14Eme Jeremia e findaŋdâŋ mufuaocte Wofuŋzi Tofete haeo soreme raweckonec risierâ Wofuŋte taha ufuŋ irec hae ʒoŋao ferâ ŋic ŋokac ʒeŋgoma ʒiŋuc jazawec:
15“Anutu Tâpiri Ɋuŋɋasaŋ Wofuŋ e ʒiŋuc mukac: Manaŋgopieŋ, no hae sâko ʒi â hae piticfâc‐ticne sasawa jaŋerao sisipiric fuaocte uŋ sawaŋ ejarepo i maŋrâŋgeŋ juhuc dâŋnane mi manaŋgopieŋte mupe fârio qafârezejec.”