1Jerusalem haere hata forakac sâc fotâcne rac warec ehuc mana honeniŋ: Ŋoŋe hae ʒoŋa‐ticnao ŋic moc e wiac tiŋne ebac ehuc juha, me siocmâc juocte ecneha bâfuaniŋmuo ine haere kiŋ behepemu.
2“Wofuŋ e jujâmbâŋkekac”, jaŋe iŋuc muipiehuc mumupaŋ‐jeŋic i me i mupie burecne eekac.
3O Wofuŋ, go siocmâc jueŋgopieŋ jaŋe hâcne hone maiŋ ejareekic, goki jopa bâtiŋ ejaretec jaŋe manapie wawahane ewec, â bâsirowec‐jopahaŋtec bâbâtiŋge qikiŋnembiŋ; ʒâŋe mai‐jeŋic râŋgeŋkewec i haroŋaŋ sanaŋne irec sâc jâuruwec, jaŋe maŋjeŋic bârisieniŋte takic‐jopawec.
4Eme no ʒiŋuc mupo: “Jaŋe ŋic ŋokac omane, jaŋe Wofuŋte hata â Anutu‐jeŋicte mumutâc dâŋ kâuc baeŋgopieŋte mutuc eeŋgopieŋ.
5Irec no ŋic kâcɋene jaŋerao moc rarâ dâŋ jazapemu, jaŋe Wofuŋte hata â Anutu‐jeŋicte mumutâc dâŋ manaeŋgopieŋ mecne.” Jaŋe ine iŋuc jaha kiŋaŋ gie‐jeŋic hetara‐fârehuc niŋgiŋ hetâcne‐fârembiŋ.
6Irec laioŋzi kâteonec wefurâ kisuc‐jopaocmu â kâte qâtozi sipiric‐jopaocmu, erâ qowi mimicne lepad e hae‐jeŋic râreckehuc ruc baocmu, eme ŋic jaŋe wahapie sâc kisuc qâsuc‐jopaocmu, i sindaŋ â qaqatara‐jeŋic hâhâwicne irec.
7“No weniŋuc erâ sâqocne bâtâmire‐garezapo? Naru motecfâcge jaŋe behecnumbiŋ, ehuc nemu fâri tâmiric jaŋerao ɋetickehuc mumupaŋ dâŋ mueŋgopieŋ. No nânâ mâriri bâfua‐jarepo, jaŋe ine rujeŋic no behecnurâ sasec ficko tumaŋnembiŋ.
8Jaŋe becâsic ŋicne wokemaŋ sâko â andachec iŋucne, moc e âgo‐ticnere ŋokac buroro ecneekac â moc e âgo‐ticnere ŋokac iŋuc jaha ecneekac.
9Eme no wiac irec mi bâtiŋ‐jopazapo me? Me ŋicguru iŋucne okacne mi bazu‐jarezapo me? Wofuŋ nore dâŋ iŋuc.
10“Waiŋ giegaŋ‐jeŋicko raʒirâ sipirickeniŋ, ima ine mi bafâreniŋ. Waiŋ qaŋeŋne hetâcneniŋ, jaŋe Wofuŋ nore biŋe aricne.
11Israe kikefuŋ â Juda kikefuŋ jaŋe boc qaisocnueŋgopieŋ, Wofuŋ nore dâŋ iŋuc.”
12Jaŋe Wofuŋ mickehuc ʒiŋuc mueŋgopieŋ, “E iŋuc mi eocmu, wiac hâhâwicne fai‐nâŋecko moc mi feocmu, nâŋe ʒika â roroc mi bâfuanaŋmu.
13Porofete jaŋere dâŋ i fânâŋ sawa, jaŋe dâŋ fârine mi bajueŋgopieŋ, irec wiac i jaŋacne faio fezejec.”
14Irec Anutu Tâpiri Ɋuŋɋasaŋ Wofuŋ e kecʒiŋuc mukac: “Manakic, jaŋe dâŋ iŋucne mueŋgopieŋte no dâŋnane micgao râepe ʒocbâruŋ iŋucne ezejec, eme izi ŋicguru ʒi ʒoc iŋucne epie ʒâseŋ‐jopazejec.
15Manaŋgopieŋ, no mupe ʒorickonec ŋicguru moc ware fisirâ Israe kikefuŋ ŋoŋe râsi eŋareniŋmu, Wofuŋ nore dâŋ iŋuc. Jaŋe ŋicguru sanaŋne â mârâc jaha fuarâ mimiŋzi ɋâric juwefumbiŋ. Ŋoŋe ŋic i dâŋmarac‐jeŋic kâuc baeŋgopieŋ, â dâŋ mueŋgopieŋ i fuŋne mi mana taraeŋgopieŋ.
16Tepe motec‐jeŋicte hâniŋ i ʒâŋeruŋ micaaŋ iŋucne, jaŋe ŋic qac momori sasawa.
17Jaŋe nânâ mâririge mecne, padige mecne i nâfâreniŋmu, ŋokâfâcge mecne otâfâcge mecne mâmâc omaec‐jopaniŋmu; lamafâcge mecne bulimakaofâcge mecne i nâmiziec‐jopaniŋmu; jaŋe waiŋ â jâmbo hândâŋ wiacge nâfâreniŋmu â hae sanaŋge ŋerakac ira roweckehuc juekic i hâcne ʒikazi henʒaŋ qanʒaŋneniŋmu.”
18“Dameŋ ira iŋuc jaha mi bâsirowec‐ŋopa‐fârepemu, Wofuŋ nore dâŋ iŋuc.
19‘Wofuŋ Anutu‐nâŋec e wemocte wiac i sasawa enârewec?’ Ŋic jaŋe iŋuc mu wioc epie ʒiŋuc jazazemec: ‘Ŋoŋe no behecnurâ ŋaŋacne mâreŋko nemu jabane kiŋaŋ qajarembiŋ, iŋuc jaha mâreŋ moc ŋaŋac rune mi juŋgopieŋko ŋic furune kiŋaŋ qajarenʒepieŋ.’”
20Jakobore kikefuŋko dâŋ kecʒiŋuc musokanʒepieŋ, â Juda mâreŋko mupie mananʒepieŋ:
21“O ŋicguru mutuc matacne â maŋ tâmiric, ʒâŋehec juhuc wiac mi honeeŋgopieŋ â hazechec juhuc dâŋ mi manaeŋgopieŋ ŋoŋe dâŋ ʒi mananiŋ:
22Ŋoŋe nore mi hâwic‐ŋopaekac me? Ŋoŋe nore maio ɋarac ɋarac mi qaeŋgopieŋ me? Wofuŋ nore dâŋ iŋuc. No hâwec mecqaŋeŋnao moŋgeŋ râepo, eme izi aka fofo sanaŋ foha hâweczi sâcne mi jâururâ wefuocmu, siri sâko qahuc qâipieocmu, hâhâwicne fânâŋkehuc sifu mi wefuocmu.
23Ŋicguru ʒi jaŋe ine maŋjeŋic râŋgeŋne â qaqaharicne, jaŋe hata kizurâ wisembiŋ.
24Ehuc maŋjeŋiczi ʒiŋuc moc mi mumbiŋ: ‘Nâŋâc Wofuŋ Anutu‐nâŋec araŋ bacnenaŋ, eki hâcne mume hoe ʒoaŋ sâckoa fuaekac â ekizia wâc mume qa roro â nânâsu i dameŋ mukicnao sâckoa fua‐nâreekac.’
25Hehesic‐ŋeŋiczi ine wiac irec hata hesifucke‐ŋarewec, â sâqocne‐ŋeŋiczi wiac biaŋne sakare‐ŋarewec.
26Ŋicfâc‐nane jaŋere ŋondeŋko ŋic hehesicne jueŋgopieŋ jaŋe wosaŋeŋ bapa iŋucne kamierâ ruc baeŋgopieŋ, â bitiŋzi ŋic kicjopaocte râe‐jareeŋgopieŋ.
27Ŋiczi hejeŋicko wipe qowi ŋiepie fusucmaekac, irec sâc jaha eeatuczi ficjeŋic fusucmarâ fokac; jaŋe iŋuc ehuc bomboŋ erâ juhapie mafa mâriri fua‐jareekac, ehame wokemaŋ â biuc sâkohec eeŋgopieŋ.
28Micjeŋickonec dâŋ hehesicne wahahuc foekac, bekâ mâsiŋ jaŋe juhâmoniŋte dâŋjeŋic mumutiŋ dâŋte sâcko mi mutaraeŋgopieŋ, â qarâ suriŋne jaŋere dâŋ tutumaŋko mi dopeckeeŋgopieŋ.
29Eme no wiac iŋucnere mi bâtiŋ‐jopazapo me? Me ŋicguru iŋucne jaŋe okacne mi bazu‐jarezapo me? Wofuŋ nore dâŋ iŋuc.”
30Mâreŋ ʒira wiac hâhâwicne â mamakâcne fuaekac.
31Porofete jaŋe burec ehuc findaŋdâŋ mueŋgopieŋ, â taha bapazi jaŋehec maŋ mocjaha ehuc guriŋ bapa gie baeŋgopieŋ, eme ŋicfâc‐nane jaŋe iŋuc hâcne foocte ejareekac. Mâc, wiac i tara‐fâreme ŋoŋe wenac eniŋmu?
