1Zedekia e jara‐ticne 21 bazume ŋicwofuŋ âkendâŋnepie juwec. Erâ Jerusalem haeo ŋicwofuŋ gie‐ticne bahuc jukuhame jara 11 tarawec. Neŋgoc‐ticne ʒâŋene Hamuta e Lebina haeonec Jeremia wase‐ticnere otâ.
2Zedekia e Wofuŋzi wiac honeme sâqoreekac i hâcne ehuc juwec, ine Jojakimzi ejujec irec sâcko jâmbâŋ.
3Eme Wofuŋ e juku kimbeŋ‐ticnere erâ Jerusalem â Juda behec‐jofawec. Zedekia eki ine Babe ŋicwofuŋ râpeckewec.
4E ŋicwofuŋ juhame jara namba 9‐ko mosa namba 10 â ʒoaŋ gie bapa namba 10 jaha ira Babe ŋicwofuŋ Nebukaneza momorifâcne rocjopa‐fâreme Jerusalem hae râsi fisicnembiŋ. Fisirâ hae somâckehuc rârec rârec ʒae bambiŋ.
5Iŋuc erâ somâ bahuc juwefukuhapie Zedekia ŋicwofuŋ juju dameŋ‐ticnere jara namba 11 maickewec.
6Eme mosa namba 4 â ʒoaŋ gie bapa namba 9 ira haeo roroc sâkozi ɋârâŋkeme hae mâreŋ irec ŋic jaŋe nânâ omae‐fâreha basambiŋ.
7Ehame râsi jaŋe haeo feniŋte sac âkeʒupie hata fuawec. Eme ŋicwofuŋ â momorifâcne sasawa jaŋe honerâ ŋafeo sac jajahec ŋondeŋ‐jekicko ŋicwofuŋte ʒariŋ gieo moc domawec i fotâcnerâ wisembiŋ. Ine Kaldea ŋic jaŋe hae sâko orâŋkehuc juhapie jaŋe Jordaŋ wâneŋkopec rambiŋ.
8Eme Kaldea momori ŋic jaŋe ine ŋicwofuŋ jâpe raku Jeriko wâneŋko, ŋicfâcne jaŋe beherâ tâtiehapie bâfuambiŋ.
9Erâ ŋicwofuŋ bâfua rorâ Hamati mâreŋko Ribela haeo Babe ŋicwofuŋ ŋewec erao barambiŋ. Eme eki dâŋ mutaracnewec.
10Ehuc mume Zedekia ŋokâfâcne jaŋe mamac‐jeŋicte ʒâŋe faio qâhâmoc‐jopambiŋ, erâ Judaŋic fekicne Ribela haeoa jopa‐fârembiŋ wâc.
11Erâ mume Zedekia jahacne ʒâŋene riporâ aeŋ niŋgiŋko râembiŋ. Erâ Babe ŋicwofuŋzia mume Babe haeo bararâ kâpâcwâru ficko râepie ira ŋehuc juhame hâmoc dameŋ‐ticne maickewec.
12Nebukaneza e Babe ŋicwofuŋ juhame jara 18 tarawec; eme irec faicnao mosa 5 irec ʒoaŋ gie bapa namba 10 ira ine Nebuʒaradaŋ e Babe ŋicwofuŋ momori fuŋfuŋfâc‐ticne jaŋere micne juhuc ŋicwofuŋte kiŋaŋ qahuc juweczi Jerusalem haeo fisiwec.
13Fisirâ Wofuŋte taha ufuŋ mecne, ŋicwofuŋte erific mecne â Jerusalemte fic wiac sasawa i turuŋkeme ʒawec.
14Â qânâsac Jerusalem hae râreckehuc fowec i Kaldea momori jaŋe ŋicwofuŋ momori fuŋfuŋfâcne jaŋere micne ehec jumbiŋzi heroc qâropiembiŋ.
15Eme ŋicwofuŋte momori fuŋfuŋfâc jaŋere micne Nebuʒaradaŋ e ŋic qarâ suriŋne mecne, â haeo ŋic nâfocne behec‐jopapie jumbiŋ jaŋe mecne, â wiserâ Babe ŋicwofuŋ erao ʒuhuckembiŋ jaŋe mecne, erâ metâ bapa ŋic ʒanʒaŋne jaŋe mâmâc bacjopa rawec.
16Momori fuŋfuŋfâc jaŋere micne Nebuʒaradaŋ e mâreŋ irecnec ŋic wahakicne jaŋeraonec gâcne jaŋe waiŋ gie bahuc he sarac eniŋte behec‐jopame ŋembiŋ.
17Wofuŋte taha ufuŋko wâtuŋ aeŋ bâbâroŋzi bakicne domawec, erâ râqâc irec ŋeŋe wiac â opâ râqâc sâko aeŋ bâbâroŋzia bakicne ŋewec i Kaldea ŋic jaŋe henʒaŋ qanʒaŋnerâ aeŋ bâbâroŋ‐ticne Babe haeo furu jaha barambiŋ.
18Erâ kuʒi mecne, sapac mecne, sâqe mecne, soc titiere râqâc mecne, hosâc âsu ririkere râqâc mecne, erâ wâcwiac gâcne sasawa aeŋ bâbâroŋzi bakicne â ufuŋko taha giere baju jumbieŋ i wâc rorâ mâmâc barambiŋ.
19Erâ râqâc wiac piic piic, ʒoc uucnere faŋ, soc titiere râqâc, kuʒi wiac, kendo dodoma, hosâc âsu ririkere râqâc erâ taha bâzire râqâc, ine hâcne wiac sasawa gol â siliwa jâmbâŋzi bakicne i momori fuŋfuŋfâc jaŋere micnezi barawec.
20Wâtuŋ jajahec, opâ râqâc sâko â bulimakao hawari 12 derâ doma rambiŋ, erâ Wofuŋ ufuŋ‐ticnere râqâc irec ŋeŋe wiac ŋicwofuŋ Salomozi mume bambiŋ, wiac i sasawa irec aeŋ bâbâroŋzi sigelio fefere sâc jâuruwec.
21Wâtuŋte ine ʒiŋuc: Wâtuŋ moc ʒoricne‐ticnere sâc 18 kubi, â oorâŋ‐ticne i muc râepie orâŋkeha 12 kubi ewec; wâtuŋ i maŋ hawecnehec, sahacnere ɋâfoŋne ine memotec 4 irec sâc ewec.
22Wâtuŋ fainao utune moc aeŋ bâbâroŋzi barâ râekicne i 5 kubi ferâ domawec; utune rârec rârec ine eri qâreŋ mizekicne â wiac moc jâchândâŋ tinac râekicne, wiac i aeŋ bâbâroŋzi bafârekicne hâcne. Eme wâtuŋ namba 2 irec wiac ijaha fowec.
23Qaŋeŋnao wiac jâchândâŋ tinac orâŋkehuc râekicne irec ʒare 96, â jâchândâŋ eri mimize râreckehuc fowec irec qâqâhâc ʒare ine 100.
24Ŋicwofuŋte momori fuŋfuŋfâc jaŋere micne e taha bapa sâko Seraja â babafic‐ticne Zefania erâ motâc soŋaŋ jahec â moc jaŋe bacjopa raocte rocjopawec.
25Jerusalem haeonec micne sâko moc momori jaŋere soŋaŋ juwec e mecne â ŋicwofuŋhec jumbiŋ ŋic i jaŋeraonec 7 haeoa juhapie mâmâc rocjopawec; erâ momori micne ere qâreŋŋic, hesarac ŋic jaŋe gie baniŋte qâreŋ‐jopa jujec, ŋic e hâcne erâ hesarac ŋic 60 haeoa juhapie bâfuac‐jopambiŋ jaŋe iŋuc jaha rocjopawec.
26Nebuʒaradaŋ, momori fuŋfuŋfâc jaŋere micnezi ŋic i jaŋe hâcne rocjoparâ Babe ŋicwofuŋ Ribela haeo ŋewec erao bacjopa rawec.
27Babe ŋicwofuŋ eki ine mume Hamati mâreŋko, Ribela haeo hâcne qâhâmoc‐jopambiŋ. Ehame Juda kikefuŋ jaŋe mâreŋ‐jeŋickonec kâpâcwâruo bacjopa rambiŋ.
28Nebukaneza e Juda ŋic ŋokac bacjopa rawec jaŋere ʒare ʒi: Ŋicwofuŋ erâ juhame jara 7 ewec dameŋ ira 3023 bacjopa rawec.
29Ŋicwofuŋ erâ juhame jara 18 ewec dameŋ ira Jerusalem haeonec ŋic 832 bacjopa rawec.
30Ŋicwofuŋ erâ juhame jara 23 ewec dameŋ ira Nebuʒaradaŋ, momori fuŋfuŋfâc jaŋere micne eki Judaŋic 745 bacjopa rawec. Qâqâhâc ʒare‐jeŋic ine 4600.
31Eme Juda ŋicwofuŋ Jojakiŋ e kâpâcwâruo jukuhame jara 36 â mosa 11 erâ ʒoaŋ gie bapa 24 tarame ine Babe ŋicwofuŋ Ewi‐Merodaczi akickehuc mume kâpâcwâruonec wahawec. Ine ŋicwofuŋ gie‐ticne fuŋkewec jara ira iŋuc ewec.
32Erâ âgo ecnehuc ŋeŋe‐ticne bafeme ŋicwofuŋ gâcne ehec Babe haeo jumbiŋ jaŋere ŋeŋe biri irec micnao ŋewec.
33Eme Jojakiŋ e kâpâcwâru ŋaqi‐ticne hetararâ ŋicwofuŋhec nânâ nâhuc jukuhame hâmoc dameŋ‐ticne maickewec.
34Sahacte dope wiac irec ʒiŋuc ekicne: Babe ŋicwofuŋ e ʒoaŋ sâc dope wiac‐ticne râcnehuc juhame hâmoc dameŋ‐ticnao tarawec.
